Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Katika Anak Tabiri te mukei segel je kaujue, sorga manjadi benyem kurang labih katahin satengah jam.
2 Palus aku mite uju malekat je mendeng intu taharep Hatalla, tuntang ewen inenga uju kabawak tarompet.
3 Malekat je beken, mimbit ije dadupa amas, dumah tuntang mendeng intu baun mesbeh. Akae inenga are toto garo mangat imbowor intu kare lakudoa ain salepah ungkup ain Hatalla tuntang uka inyarah intu mesbeh amas je aton hila baun padadusan.
4 Haya-hayak dengan kare lakudoan kare ungkup ain Hatalla, asep dadupa je hanyala te mangangkewul mandai bara lengen malekat je mendeng intu taharep Hatalla te.
5 Palus malekat te manduan dadupa te, tuntang manyuange hapan apui bara mesbeh, palus manjakahe akan hunjun petak. Maka nyaho mahin mangguroh tuntang kilat sir-sar manyambar, tuntang petak kea hagerek.
6 Limbah te, uju malekat je mimbing uju tarompet te manatap arepe handak mampahiau tarompet te.
7 Malekat je solake mampahiau tarompete, palus ujan es tuntang apui hewoi daha baduroh paham akan hunjun petak. Sapertelo petak lepah bakehu; kalote kea sapertelo bara kare batang kayu tuntang gagenep oru je belom bahijau.
8 Palus malekat je kaduee mampahiau tarompete, palus aton taloh je hai toto gitan sama kilau bukit je hagandang kilau apui je injakah akan huang tasik. Sapertelo tasik te hobah manjadi daha.
9 Tuntang sapertelo bara kare taloh belom hong tasik te uras matei; kalote kea sapertelo bara kare kapal lepah lumat.
10 Limbah te malekat je kateloe mampahiau tarompete, maka ije bintang hai, je hagandang manyala kilau obor, manjato bara langit, palus manempak sapertelo bara kare batang danum tuntang tahasak sungei.
11 (Aran bintang te "Bapait".) Maka sapertelo bara danum te manjadi bapait, tuntang are oloh matei awie mihop danum je jari bapait te.
12 Palus malekat je kaepate mampahiau tarompete. Balalu sapertelo matanandau te, tuntang sapertelo bulan tuntang sapertelo bara kare bintang uras buah karusak sampai sapertelo bara kaabas kalawa ain ewen te nihau. Tinai sapertelo andau jaton balawa, kalote kea sapertelo bara hamalem.
13 Palus aku mite, hayak mahining ije burong rajawali je metohe tarawang gantong intu langit, mangkariak, "Calaka! Calaka! Calaka toto oloh handiai hong hunjun petak amon ewen mahining katatelo malekat awang beken te kareh mampahiau tarompete!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA