Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ri wattunna Nareppe’ anjo Ana’ Gimbalaka segele’ makatujua, a’jari sinomi suruga nia’ kira-kira sitangnga jang sallona.

² Nampa kucini’ anjo tujua malaeka’ ammentenga ri dallekanNa Allata’ala, siagang nisarei ke’nanga tuju tarompe’.

³ Nia’mo sitau malaeka’ maraengang, battu ammenteng ri dallekanna tampa’ pakkoro’banganga; angngerangi se’re pa’dupang bulaeng. Sanna’ jaina kamanynyang nisareangi untu’ lanapanaung ri pappala’ doanganna sikontu umma’Na Allata’ala, siagang untu’ lanipassareanga ri tampa’ pakkoro’bangngang bulaenga nipare’ ri dallekanna empoang kala’biranga.

⁴ Anjo pappala’ doanganna sikontu Umma’Na Allata’ala nai’mi siagang umbuna anjo dupa nitunua, battu ri limanna anjo malaeka’ ammentenga ri dallekanNa Allata’ala.

⁵ Nampa naalle anjo malaekaka anjo pa’dupanga, na nasare pepe’ battua ri tampa’ pakkoro’bangngang, nampa napasambila irateanganna buttaya. Assa’ra lompomi gunturuka siagang assisambung-sambummi kilaka; kammayatompa ta’ge’goso’mi buttaya.

⁶ Le’baki anjo, sadia-sadiami anjo tujua malaeka’ anna’galaka tarompe’ untu’ ampasa’rai anjo tarompeka.

⁷ Napasa’rami tarompe’na malaeka’ makase’rea; turummi bosia kamma es siagang pepe’, accampuruki siagang cera’ sannaka batena a’lo’loro’ naung ri buttaya. La’busu’mi bage talluna linoa akkanre; kammayatompa bage tallunna poko’-poko’ kayua, siagang sikamma ruku’-ruku’ moncongbuloa.

⁸ Nampa napasa’ra tarompe’na malaeka’ makaruaya; nia’mo apa-apa sanna’ lompona, kammaya nicini’ bulu’ a’rinra-rinraya, nipasambilaya antama’ ri tamparanga. Amminrami a’jari cera’ bage talluna tamparanga,

⁹ siagang matemi bage talluna olo’-olo’ niaka ri tamparang; kammayatompa ancuru’ ngaseng tommi bage talluna sikamma kappalaka.

¹⁰ Nampa napasa’ra tarompe’na malaeka’ makatallua; na nia’mo se’re bintoeng lompo, a’rinra-rinraya sangkamma sulo, tu’guru’ battu rate ri langika, nanatuju bage talluna sikontu binangaya siagang sikontu timbusenna je’neka.

¹¹ (Arenna anjo bintoenga iamintu "Pai’".) Jari a’jari pai’mi bage talluna je’neka, najaimo tau mate lanri nainunna anjo je’ne’ a’jari paikamo.

¹² Nampa napasa’ra tarompe’na malaeka’ makaappaka. Natattunrummo bage talluna mataalloa, bage talluna bulanga, kammayatompa bage talluna sikontu bintoenga; sa’genna tappela’mi bage talluna cayana ke’nanga. Kammayatompa bage talluna singaraka tenamo nasingara’ siagang kamma tomminjo bage talluna bangngia.

¹³ Nampa kucinikimi pole; na nia’mo kulangngere’ sa’ra jangang-jangang rajawali sitabanga anri’ba’ tinggi rate ri allaka akkio’ angkana, "Cilakai! Cilakai! Cilakai sikontu tau niaka ri lino punna nalangngere’ sinampe’ anjo tallua malaeka’ maraenga ampasa’rai tarompe’na!"

Wahyu

Video Wahyu 8

Ikuti Kami:

KONTAK | PARTISIPASI | DONASI