Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kutiko Anak Domba tu mamacahi sege nan katujuah, sarugo manjadi langang salamo kiro-kiro satangah jam.

² Sudah tu ambo maliyek katujuah malekaik, nan tagak di adok-an Allah, mako inyo di agiah tujuah buwah tarumpik.

³ Surang malekaik lain, nan mambawok sabuwah tampaik pambaka kumayan nan dari ameh, tibo, sarato tagak di adok-an mezbah. Kabakenyo dibarikan kumayan nan sangaik banyak, untuak ka dilakekkan di dowa-dowa kasadonyo umaik Allah, sarato untuak ka dipasambahkan di mezbah ameh, nan talatak di adok-an kurisi.

⁴ Samo-samo jo dowa-dowa kasadonyo umaik Allah, asok kumayan nan sadang manyalo tu, manggabubu nayiak dari tangan malekaik, nan tagak di adok-an Allah tu.

⁵ Kudian malekaik tu ma ambiak tampaik pambaka kumayan tu, sarato ma isinyo jo api nan dari mezbah, sudah tu dibaekannyo ka bumi. Mako guruah pun bagamuruah, kilek sabuang-manyabuang, sarato tajadilah gampo.

⁶ Sasudah tu, tujuah malekaik nan mamacikkan tujuah tarumpik tu, lah basiyap-siyap untuak ka ma ambuih.

⁷ Malekaik nan partamu ma ambuih tarumpiknyo, mako mancorohlah salabek-labeknyo ujan es sarato jo api bacampua darah, jatuah ka bumi. Sapatigo dari bumi abih tabaka; baitu pulo sapatigo dari batang-batang kayu, sarato jo satiyok rumpuik nan ijau.

⁸ Sudah tu malekaik nan kaduwo ma ambuih tarumpiknyo, mako nampaklah sasuatu nan sangaik gadang, nan kaliyatan bakcando gunuang nan manyalo-nyalo, dibaekan masuak lauik. Sapatigo lauiktan barubah manjadi darah,

⁹ mako bi matilah sapatigo dari sagalo mukaluak nan di lauik; baitu pulo, mako bi cayielah sapatigo dari kapa-kapa nan ado.

¹⁰ Kudian malekaik nan katigo ma ambuih tarumpiknyo, mako nampaklah sabuwah bintang nan gadang, nan manyalo-nyalo bakcando suluah, jatuah dari langik, sudah tu manimpo sapatigo dari batang-batang ayie, sarato jo mato-mato ayie.

¹¹ (Namo bintang tu si "Payik".) Mako sapatigo dari ayie manjadi payik, mako bi matilah banyak urang dek karano minun ayie nan lah payik tu.

¹² Sudah tu malekaik nan ka ampek ma ambuih tarumpiknyo. Mako tatampalah sapatigo dari matoari, sapatigo dari bulan, sapatigo dari bintang-bintang, sainggo ilanglah sapatigo dari kakuatan cahayonyo. Sapatigo dari ari siang indak tarang lai, baitu pulo sapatigo dari malam.

¹³ Sudah tu ambo maliyek, mako ambo mandanga sikua buruang rajowali, nan sadang tabang tinggi di udaro, sambia ma imbaukan, "Cilako! Cilako! Cilakolah kasadonyo urang nan di bumi, jikok katigo malekaik nan lainnyo, ma ambuih tarumpiknyo isuak!"

Wahyu

Video Wahyu 8

Ikuti Kami:

KONTAK | PARTISIPASI | DONASI