Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda Adií in Domba tatua nomukat kom meterai inta impitunya, soroga nobalií no'ingongow totok degaí tobotakmai in jam ko'onggotea.
2 Bo aku'oi noko'ontong kom pitu im malaekat inta sinimindog kon tayowon i Allah bo inogoian doman in terompet pitu im mosia.
3 Tobatuí malaekat ibanea inta nodia kom pototubaían kong kamaya inta pinomia nongkon buḷawan, namangoi bo sinimindog kon tayowon meja pogogukatan kon sosumbah. Sia inogoian kamaya nobayong sim potakin kon sambayang mita im bayongan umat i Allah bo posumbah doman kom meja pototuduan kon sosumbah inta kon tayowon tampat pomomarenta'an.
4 Poyok ing kamaya tatua mamonik takin sambayang in umat mita i Allah. Kamaya tatua kokada-kadai im malaekat inta sinimindog makow kon tayowon i Allah.
5 Nopaḷut makow kon tua malaekat tatua nogamaí kon tampat pototubaían kong kamaya bodongka binonuannya in tuḷu inta nongkon tampat pobobogoian kon sosumbah. Nopaḷut makow pinogarabnya kom butaí na'a. Daí totokdon nonggotup bo nongilat inta moyodudu-duduimai bo nobaliídon in linug.
6 Nopaḷut makow kon tua, malaekat taya pitu inta notukid in terompet nobasadiadon nogirup.
7 Malaekat muna nogirup kon terompetnya, daí uyan in eis bo tuḷu noyoba'uk in duguí norogot totok noḷabuí monag kom butaí. Bo sepertiga in dunia na'a nodait nopokak, naí doman tua, sepertiga doman ing kayu bo bonok noḷaḷow.
8 Bo malaekat induanya nogirup kon terompetnya, daí oyuíon tobatuí barang inta moḷoben naonda bo buḷud inta kodoko-dokot pinogarab kom bonu in dagat, daí sepertiga in dagat tatua nobaḷui nobalií duguí.
9 Bo minatoi domandon sepertiga im mahaḷuk mita inta kon dagat; bo sepertiga doman ing kapaḷ mita noyoyang.
10 No'iduduimai kon tua malaekat intoḷunya nogirup kon terompetnya, daí tundi tobatuí inta moḷoben, inta koyongki-yongkit naonda bo poḷombow noḷabuí nongkon ḷangit bo no'iḷabuí kon sepertiga in ongkag mita bo bokakak.
11 (Tangoi in tundi tatua "Pa'it".) Daí sepertiga nongkon bayongan tubig nopaitdon doman bo nobayongdon intau minatoi sin nonginum kon tubig inta nopaitdon tatua.
12 Onda intua malaekat inggopatea nogirup domandon kon terompetnya. Daí no'idatongdon sepertiga mata in singgai, sepertiga im buḷan bo sepertiga doman in tundi mita, sahingga no'inggamaídon sepertiga nongkon kakuatan cahaya monia. Naí doman tua, sepertiga nongkon bayag diaídon notarang bo naí doman tua in doḷom.
13 Bo aku'oi noko'ontong bo nokodongog kom boniak tobatuí inta iḷumayug noḷantud nomaḷuí nana'a: "Mobodito! Mobodito! Moboditodon im bayongan intau kon dunia na'a aka mokodongogdon kom malaekat taya toḷu ibanea mogirup kon terompetnya!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA