Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu Ana nu Domba mangayali tondong to kapitu. Tempo Ia mangayali tondong to etu, samparia anu to re’e ri saruga tare mamoni ri rayanya bara santongo jam.
2 Wali yako etu, aku mangkita pitu pomakau i mPue Allah to biasa makore ri tangoNya. Pomakau to pitu etu rawaika tarompet samba’a pei samba’a.
3 Panewa ma’i wo’u samba’a pomakau i mPue Allah, ia ma’i makore ri awe mpalampa. Pomakau etu mangkongko yama weyawa to rapangantunu kemenyan. Wali ia rawaika kemenyan to bae. Kemenyan etu daragaloka pakai-kai ntau samparia to i Pue Allah Puenya, panewa kemenyan to sigalo pakai-kai etu darapampueka resi i Pue Allah ri wawo mpalampa weyawa to ri tango nggadera Makole.
4 Wali karoonya pomakau etu rawaika kemenyan, ia mangantunu kemenyan etu ri tango i mPue Allah. Wali pakai-kai ntau to i Pue Allah Puenya kangkumbungkumbu sindara pei kumbu nu ngkemenyan etu.
5 Roo see pomakau etu mangoko apu to yako ri wawo mpalampa, pei mamposaka ri raya nu yama rapangantunu kemenyan etu, panewa ia mangantajika yau ri lino. Wali ojo karoonya etu re’emo bilak kreto pasi lengko tana.
6 Wali pomakau i mPue Allah to pitu to mangkongko pitu tarompet, sira mampakaroso damantawuis tarompet etu.
7 Wali pomakau to uyunya, ia mangantawuis tarompet to si ia. Panewa mawali tiba pasi apu to sigalo raa ratajika yau ri wawo lino. Wali santila togo lino to mosi yau. Etu semo santila togo kaju pasi samparia junju to maruna mosi yau.
8 Wali yako etu pomakau to kadua mantawuis seja tarompet to si ia. Tempo ia mantawuis etu, re’e anu to ewa tongku to bae pasi mawea rapanasoka yau ri raya ntasi.
9 Wali ojo katudu anu etu ri raya ntasi, santila togo tasi etu to mawali yau raa, pasi santila togo seja anu to tuwu ri raya ntasi etu mate yau, pasi santila togo bangka to ri wawo ntasi etu maja’a yau.
10 Panewa yako etu pomakau to katogo ia mantawuis seja tarompet to si ia. Tempo ia mantawuis etu, samba’a batu’e to bae kojo maranta yako ndate yangi. Tempo batu’e etu maranta, ia mawea ewa suyu. Wali ia tudu ri wawonya santila togo yako ri koro nue pasi ri mata nue.
11 Sanga batu’e to maranta etu Apsintus. Wali ue to santila togo to katudunya etu, samparia ue etu mawali mapa’i, pasi boros tau to manginu ue to mapa’i etu mate yau.
12 Wali yako etu pomakau to kaopo ia mantawuis seja tarompet to si ia. Panewa santila togo yako ri mata nu eo, mata mbuya pasi batu’e rapakaja’a. Wali santila togo nu remenya mawali yau wuri. Wali ri poi eo, santila togo kareme rakurang. Panewa ri raya mburi seja santila togo kawurinya etu ratambang.
13 Yako etu aku mangalo’a pasi aku mangandonge loo nu bomboliano to mayoko malangan ndate rao. Wali bomboliano etu maroso loonya kaboo-boo tongo mpayokonya, ia manganto’o, “Masesa! Masesa! Kasesa danarata nto lino ane rata temponya ratawuis tarompet to tiroo danatawuis mpomakau to togo!”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA