Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wongose 'awi do-domoteika, "Naga wimoi wokaya-kaya, to 'una 'awi pipi ma ga-gao wimoi gee wisijagano 'awi harataa 'iodumu. Wokaya-kaya gu'una wo'isene 'ato 'awi pipi ma ga-gao gu'una 'o pipi wosihalebiru.

² So wi'asoko 'awi pipi ma ga-gao gu'una de kawongosekau, 'Ngoi togi'isenokau ngona nosihalebiru 'ai harataa. So ne'ena nositotarinou 'iodumu gee nama-manarama ma ngale najaga 'ai harataa 'iodumu, sababu ngona koidadiwau nodadi 'ai pipi ma ga-gao.'

³ So 'o pipi ma ga-gao gu'una wamatiba-tibangi de wi singina ma dodaka doka kawongosekau, 'Ngoi salingou 'okia todo'oa? 'Ai balusu woisiogorou. Topacolo, kotokuatuwa; tomaga-ga'asoko, 'imaeke.

⁴ Ngoi tanakokau salingou 'okia todiai la gee woisiogoroka, ma naga 'o nyawa 'idawongo tomanoa manga woaka!'

⁵ So 'o pipi ma ga-gao gu'una wakikoki'asoko gee yonagi-nagimoka 'awi balusika. De wosira-sirano woboa gee 'unaka kawongosekau, ''Okia moi 'ani nagimi 'ai balusoka?'

⁶ 'O nyawa gu'una wosango, ''O goooro 'o jeregeni ratusu moi.' 'O pipi ma ga-gao gu'una kawongosekau 'unaka, 'Neda 'ani nagimi ma surati. Nogogeruku de nomatai-taiti nalefo la 'ai balusu kowanakowasi 'ena nalefokou ka 'o jeregeni nagi motoa.'

⁷ Ge'enaka de wongose wimoikali, 'Ngona, 'Esa moi, 'ani nagimi 'okia moi?' 'O nyawa gu'una wosango, ''O bira 'o karongo caana moi.' 'O pipi ma ga-gao gu'una kawongosekau 'unaka, 'Neda 'ani nagimi ma surati. Nalefoku ka 'o ratusu tuangerou.'

⁸ 'O pipi ma ga-gao gu'una kowoloawa ma 'awi balusu kawoki-kiliri ngano 'awi 'akali 'idoto wosiliba ma ngale watibangi 'awi 'ahu 'o bio-bionika. De ma goungu 'o nyawa gee kowimote-motekuwa ma Jo'oungu ma Dutu, 'ifoloi manga 'akali 'idoto ya'aturu ka to 'ona ma sirete manga kia sonaa 'o duniaka ne'ena, positero 'o nyawa gee yo'ahu ma ngale wileleani ma Jo'oungu ma Dutu."

⁹ Ge'enaka de 'o Yesus wobicarali wongose 'ato, "So, niosigisene! Ngini salingou niapake 'o dunia ne'ena ma harataa ma ngale 'o nyawa niakiriwo la nimadamake 'ania manai ma dutu, la gee 'o dunia ne'ena ma harataa ma 'ija koi'iwakau, ngini 'asa nidawongo 'o ngii 'ika-kakalioka.

¹⁰ 'O nyawa gee 'idadi yakingaku 'okia sonaa ma di-dingoonoka, ge'ena 'idadi mita yakingaku 'okia sonaa 'ila-laagomoka. Ma 'o nyawa gee koidadiwa yakingaku 'okia sonaa ma di-dingoonoka, ge'ena koidadiwa yakingaku 'okia sonaa 'ila-laagomoka mita.

¹¹ So nako ngini koningakuwa nisijaga 'o harataa 'o duniaka ne'ena, nago'ona nisijaga 'o harataa 'ika-kakali?

¹² Nako koningakuwa niojaga 'o nyawa 'iregu manga harataa, dua komoiwa nikula 'okia naga gee 'imadadi to nginiou.

¹³ Komoiwa yomanarama manga balusu yamididioka; sababu dua wimoika 'ifoloi widora de gee wimoikali, bolo dua wimoika 'ifoloi wisingounu de gee wimoikali. Koge'enali mita ngini. Ngini koidadiwa niamanarama to ma Jo'oungu ma Dutu 'awi mau, ma de nio'ahu kanimadolomu 'o duniaka ma harataa."

¹⁴ 'O Farisioka yo'isene 'iodumu gee 'o Yesus wongose-ngose, de 'ona wirisela, sababu 'ona yodopokana 'o pipi.

¹⁵ Ma 'o Yesus kawongosekau 'onaka, "Nginiou ne'ena nako 'o kawasa manga bionoka ge'ena nimakeka niotiai, duga ma Jo'oungu ma Dutu wanako nia singina ma dodaka. 'Okia naga gee 'o dunia ma nyawa yamakeka yaowa so yosiie-ie, ge'ena ma Jo'oungu ma Dutu wodu'uduku.

¹⁶ 'O besesongo gee 'o Musa wokula-kula de 'o nabii manga do-dotoko, kayamotekosi sigado ma 'orasi 'o Yohanes Wo'osi-'osiki gu'una woboano. Ma 'orasi ge'enau de 'o Habari ma Owa 'isihabari ge'ena la kokia ma Jo'oungu ma Dutu wopareta ma ngale wokoana. De 'o nyawa yomapakisaa ma ngale yodadi ma Jo'oungu ma Dutu 'awi kawasa.

¹⁷ Ma Jo'oungu ma Dutu 'awi besesongoka gee 'o Musa wokula-kula de 'o nabii manga do-dotokoka, ka 'o hurup moi ma koiisanguwa. 'Ifoloi 'igapangi 'iisanga 'o diwanga de 'o dunia.

¹⁸ Nagu'una 'awi wekata waoluoka de wongaamokoli de 'o ngeweka 'iregu, 'una ge'ena wosongou. De nagu'una mingaamoko 'o di-dilikutu gumuna, 'una mita wosongou."

¹⁹ "Naga wimoi wokaya-kaya, 'awi pakeangi 'iodumu ka gee 'ihali-hali, de 'o wange 'isinoi-noimi kowomarame sababu 'awi 'ahu ma sigoronaka kokiawa moi 'ikurangi.

²⁰ 'Awi woa ma ngorana ma bionoka winoaku wimoi wosa-saigalere wi ronga 'o Lazarus. 'Awi roesie ge'ena ka 'o dabo 'ijaja-jaja 'imasi'omangie.

²¹ 'Una wodamaa 'o 'inomo ma dotaka womau wa'odomo wokaya-kaya 'awi meja ma timioka. De 'o kaso 'iboa yaaemoli 'awi dabo ge'ena.

²² Ma do-dogumuku 'o Lazarus wosongene, de 'o mala'ekati wi'asa 'o ngii 'isure-sureka 'o Abraham 'awi dateoka 'o sorogaaka. Wokaya-kaya gu'una wosongene mita de wipo'osuku.

²³ Yosonge-songene manga ngiioka, 'una wosangisara ma sala. De ge'enaka naga 'una womalega dakuie, wimakede 'o Abraham daku 'o ngii ma gurutieka de 'awi dateoka 'o Lazarus.

²⁴ Ge'enaka de wokaya-kaya gu'una womasigasoko 'o Abrahamuka wongose 'ato, 'Ee 'Aba, noidoranosi. Nosuloko 'o Lazarus 'awi raraga wawaruoka 'o 'akeruku de wauku 'ai nga-ngaeme wosipesakosi. Ngoi tosangisara ma sala 'o 'ukuoka ne'ena!'

²⁵ Ma 'o Abraham wosango, ''Ai ngowaka, nongano-nganono: Ngona sigado nosongenoka nomadamakekau 'iodumu gee yaowa-owa, ma 'o Lazarus 'una womadamake ka gee 'ito-torou. Ne'ena 'una wosanangi ne'enaka dau, ngona nosangisara.

²⁶ De ngona de ngomi nanga sigoronano de ma 'enau 'o luwutasa ma amoko moi, la 'o nyawa nongoka de yaika ma koidadiwau, de ge'enaka de yaino ningino ma koidadiwau!'

²⁷ Ge'enaka de wokaya-kaya gu'una kawongosekauoli, 'Nako koge'ena de toga'asoko tosidemogaroku, tanu 'Aba, nosuloko la 'o Lazarus waika 'ai dea wi woaka,

²⁸ sababu ge'enaka 'ai dodoto yamotoakasi. Toga'asoko tanu nosuloko 'o Lazarus wakisingano-nganonika la 'uwa sigado 'ona mita gee dua yosongenoka de yowosama 'o ngii 'isa-sangisaraku ne'ena.'

²⁹ 'O Abraham wosango, 'To 'ona manga Buku 'Itebi-tebini de ma 'enau gee 'o Musa de 'o nabii 'iregu-regu yositota-totara! So 'ona salingou yamoteke 'okia naga 'isilefo-lefoku ma bukuoka ge'ena!'

³⁰ Ma wokaya-kaya gu'una wosango, 'Nako kage'ena duga ge'ena koyosingounuwa ee 'Aba. Ma nako yosonge-songenokau yowangodeli de yaika yobicara 'onaka, 'ona 'asa yamada manga so-sowono.'

³¹ Ma 'o Abraham wongose, 'Nako 'ona koyosingounuwa 'okia naga 'ingose 'o Musa de 'o nabii 'iregu-regu manga bukuoka, ma raiokau ngaro naga 'o nyawa yosonge-songenokau yowangodeli ma koyongakuwa mita.'"

Lukas

Video Lukas 16

Ikuti Kami:

KONTAK | PARTISIPASI | DONASI