Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dung i didokkon Jesus ma tu angka siseanNia i, "Adong ma sada halak na kayo, na marbendahara. Jadi adong ma na paboahon tusia, bahaso na marroha-roha do bendahara i laho pangabiskon artonia.

² Jadi dipio ia ma bendahara i jana didok ia ma, 'Aha dehe na hubege taringot tu ho? Saonnari, pasahat ma jolo tu au paretonganmu taringot tu sudena hartongki. Mamungka saonnari nada tola be ho gabe bendahara.'

³ Jadi marpikir ma bendahara i, 'Aha do ulaning sibaenonku saonnari? Angke antahon ni tuanki ma au. Muda giot mamangkur, inda margogo be au, dung i mangido-ido maila au.

⁴ Madung huboto sibaenonku saonnari. Muda dung diantak au, angkon bahat ma nian donganku na ra manjagit au di bagas ni halahi!'

⁵ Jadi dipiohon bendahara i ma sude halak na marutang tu tuannia i. Tu na parjolo didok ia ma, 'Sadia utangmu tu tuanki?'

⁶ Dialusi halahi ma, 'Saratus gunci miak zetun.' Didok bendahara i ma tusia, 'Antong, indon ma surat ni utangmi. Juguk ma ho disi jana suratkon ma tibu lima pulu.'

⁷ Dung i didok ia ma tu na paduahon, 'Jadi hamu, sadia ma utangmu?' Dialusi halahi ma, 'Saratus harung eme.' Didok bendahara i ma tusia, 'Indon ma surat ni utangmi, suratkon ma salapan pulu.'

⁸ Dung i dipuji tuan ni bendahara i ma habisuhon ni bendahara na geduk i; angke umbisuk do angka jolma portibi on taringot tu angka urusan ni halahi ulang pado anak ni hatorangan i."

⁹ Dung i mandok hata ma Jesus mangulahi. Didok Ia ma, "Tangihon hamu ma jolo on: Pargunahon hamu ma mammon na geduk laho manjalahi dongan, anso dijagit hamu di inganan na hot muda dung so adong be sinadongan na di tano on.

¹⁰ Sanga ise haposan di angka pangalaho na menek, haposan muse ma ia di angka pangalaho na godang. Tapi anggo halak na so jujur di angka pangalaho na menek, nada jujur muse i di angka pangalaho na godang.

¹¹ Muda so haposan be hamu taringot tu sinadongan na di tano on, ise ma he na ra mangalehen pos ni roha di hamu taringot tu sinadongan na sian banua ginjang?

¹² Muda tardapot na so haposan hamu taringot tu barang ni halak na asing, ise ma he na ra mangalehen tu hamu nampunamunu sandiri?"

¹³ "Umpe adong sada halak naposo, na bisa gabe naposo ni dua tuan rap sanoli mangoloi; angke goyak do rohania tu tuannia na sada jana dihaholongi ia na sada nari, sanga pe dipasangap ia na sada hape na sada nari diapasi ia. Nada tarbaen jolma gabe pangoloi tu Debata dohot muse pangoloi tu mammon."

¹⁴ Dibege angka halak Parise do sude na nidok ni Jesus. Tapi dipartatai halahi ma ia hara ni por ni roha ni halahi di hepeng.

¹⁵ Tapi didok Jesus ma tu halahi, "Hamu ma angka na mandok di jolo ni halak, sai na tigor hamu. Tapi diboto Debata do isi ni rohamunu. Angke sanga aha na nietong ni roha ni jolma na gincat, i ma na toruk di panatapan ni Debata.

¹⁶ Olat ni si Johannes Pandidi laing margogo do Tona ni ugamo na nipasahat ni si Musa, dohot angka pangajaran na adong di buku ni angka panurirang. Mamungka sian i torus ma dijamitahon Jamita Na Denggan taringot tu Harajaan Ni Debata.

¹⁷ Tapi ummura dope mago langit dohot tano, ulang pado mago sada hurup sian Tona i.

¹⁸ Angka halak na manyirangkon dadaboruna jana mambuat boru na asing ia, na mangalangkup do i. Jana halaklahi na mambuat dadaboru na dung disirangkon i pe, na mangalangkup muse do i."

¹⁹ "Adong ma sada halak na kayo na mamake pakean surto, jana na marsonang-sonang ganop ari.

²⁰ Adong muse sada halak na pogos si Lasarus goarna, na baro-baroon sap pamatangna i. Somal do ia dioban tu pintu ni bagas ni na kayo i,

²¹ anso tarbaen ia manggohi butuhana sian teba-teba ni panganon na mardabuan sian meja ni na kayo i. Ro muse ma anjing mandilati angka baronia i.

²² Dung i jumolo ma halak na pogos i jana dioban surusuruan ma ia tu inganan na dumenggan di lambung ni si Abraham di banua ginjang i. Halak na kayo i pe jumolo muse ma jana ditanom.

²³ Mardangol situtu ma ia di inganan ni angka na mate i. Jadi di na manatap ia tu ginjang, diida ia ma si Abraham di sihadaoan, jana di lambung ni si Abraham ma si Lasarus.

²⁴ Dung i marsurak ma halak na kayo i, 'Jo amang Abraham! Ibo ma rohamu di au, suruhon ma jolo si Lasarus mangaronjomkon jari-jarinia tu aek anso ro ia palambokkon dilangkon. Markancit sajo do au di bagasan api on!'

²⁵ Tapi dialusi si Abraham ma, 'Ingot ma amang: Dompak di ngolumu madung dijagit ho sude angka na denggan, hape anggo si Lasarus hum na jat do. Saonnari sonang ma ia dison, tapi anggo ho markancit ma.

²⁶ Tamba ni i, madung dibaen lung na bidang mangkolangi ho dohot hami, anso ulang tarbaen sian hami on kehe tusi, songon i muse halak na sian i nada tarbaen ro tuson!'

²⁷ 'Anggo songon i do amang,

²⁸ gomos ma pangidoanku tu ho, anso suruhon ma si Lasarus kehe tu bagas ni damang, angke adong dope lima nari kahanggingku. Ibo rohana nian, anso ulang ro be halahi tu inganan pardangolan on!'

²⁹ Dung i dialusi si Abraham ma, 'Na he adong do angka buku ni si Musa dohot na nidok ni angka panurirang, na tarsurat di buku i ma diihutkon halahi!'

³⁰ Tapi dialusi halak na kayo i ma, 'Nada tuk i, amang Abraham. Tapi sugari adong ma halak na mate na mulak mangolu jana ro mandapotkon halahi, baru pe anso muba halahi sian angka dosa ni halahi.'

³¹ Tapi didok si Abraham ma tusia, 'Muda so diampirkon halahi do si Musa dohot angka panurirang i, indangkon na ra halahi porsaya haru pe adong halak na mate mulak mangolu.'"

Lukas

Video Lukas 16

Ikuti Kami:

KONTAK | PARTISIPASI | DONASI