Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa bemanik lẽq pengiring-pengiring-Ne, "Araq sopoq dengan sugih bedowẽ sopoq bendahare jari ngurus selapuq kesugihanne. Dengan sugih nike dengah laporan bahwe bendaharene nike ngambur-amburang kẽpẽngne.

² Empohne bendahare nike dait bebase lẽq ie, 'Napi niki laporan saq tiang dengah mengenai side? Mangkin, serahang lẽq tiang laporan saq lengkap mengenai tugasde ngurus kesugihan tiang. Side ndẽq bau malik jari bendahare tiang.'

³ Jari bendahare nike mikir, 'Napi saq harus tiang piaq mangkin? Majikan tiang mẽlẽ pengkah tiang. Nambah tiang ndẽq tao, jari tukang mekir, tiang ilaq.

⁴ Tiang araq akal adẽq lamun tiang tepengkah, araq dengan saq mẽlẽ nerimaq tiang lẽq balẽne!'

⁵ Terus bendahare nike ngempoh sebilang dengan saq berutang lẽq majikanne. Lẽq saq penembẽq ie beketuan, 'Pire utangde lẽq majikan tiang?'

⁶ Jawab dengan nike, 'Satus gentong minyak zaitun.' Bendahare nike bebase, 'Niki surat utangde. Silaq tokol terus becat tulis utangde sẽket gentong.'

⁷ Beterus ie bebase lẽq dengan saq kedue, 'Pire utangde?' Jawab dengan nike, 'Siyu karung gandum.' Bendahare nike bebase lẽq ie, 'Niki surat utangde, tulis baluq ratus.'

⁸ Make majikan nike puji bendahare saq ndẽq jujur nike, lantaran entane saq ceket nike; sẽngaq bije-bije dunie niki ceketan ngatur urusanne mẽsaq ketimbang bije-bije terang.

⁹ Tiang badaq side: Manpaatang kesugihan dunie niki jari mauq sahabat, adẽq lamun kesugihan dunie niki sampun ndẽq bau nulung malik, side pade gen teterimaq lẽq balẽ saq kekel.

¹⁰ Dengan saq bau tesaduq lẽq hal-hal saq kodẽq, bau ẽndah tesaduq lẽq hal-hal saq belẽq. Laguq dengan saq ndẽq bau tesaduq lẽq hal saq kodẽq, ndẽq bau ẽndah tesaduq lẽq hal saq belẽq.

¹¹ Jari lamun dalem hal kesugihan dunie niki side sampun ndẽq bau tesaduq malik, sai saq mẽlẽ percayeang tipaq side kesugihan saq sejati?

¹² Dait lamun side ndẽq setie lẽq dowẽ dengan lain, sai saq gen mẽlẽ nyerahang lẽq side napi saq jari dowẽnde mẽsaq?

¹³ Ndẽq araq dengan saq tao begawẽan lẽq due majikan; sẽngaq lamun maraq nike ie gen meriq lẽq saq sopoq dait ngasihin saq lain, atao ie gen setie lẽq saq sopoq dait ndẽq gen merhatiang saq lain. Maraq nike ẽndah halne side pade; side pade ndẽq bau begawẽan tipaq Allah dait tipaq dowẽ bande ẽndah."

¹⁴ Dengan-dengan Parisi dengahang selapuq saq temanikang siq Deside Isa. Terus ie pade ngerẽrẽqang Deside Isa, sẽngaq ie pade demen kẽpẽng.

¹⁵ Laguq Deside Isa bemanik lẽq ie pade, "Side pekenaq diriqde lẽq julun dengan lain, laguq Allah wikan angende. Sẽngaq napi saq teagung-agungang siq manusie, temeriq siq Allah.

¹⁶ Hukum Taurat dait kitab nabi-nabi, tetep tekadu jangke jaman Yahya. Lẽman waktu nike Kabar Solah mengenai Kerajaan Allah terus teberiteang. Dait luwẽq dengan berebutan tame lẽq dalem Kerajaan Allah nike.

¹⁷ Laguq molahan gumi dait langit musnah ketimbang sopoq hurup dalem Hukum Taurat tebatalang.

¹⁸ Sai-sai saq sẽang seninene, terus merariq malik kance dengan nine lain, ie bezinah. Dait dengan saq merariq kance dengan saq tesẽang siq semamene nike, ie ẽndah bezinah."

¹⁹ "Araq dengan sugih. Kelambine mahel-mahel dait idupne mẽwah sebilang jelo.

²⁰ Dait araq dengan miskin aranne Lazarus, awakne penoq siq korẽng, tindoq lẽq dẽkẽt lawang balẽn dengan sugih nike.

²¹ Lazarus melẽt ngisiq tianne siq napi juaq saq geriq lẽman mẽje dengan sugih nike. Malahan acong dateng dẽlat korẽngne.

²² Beterus dengan miskin nike ninggal terus jauqne siq malaẽkat ojok iwean Ibrahim. Dengan sugih nike ẽndah ninggal terus tekubur.

²³ Lẽq alam maut ie menderite gati. Dait sewaktu ie nongaq, lẽman jaoq serioqne Ibrahim dait Lazarus araq lẽq iweanne.

²⁴ 'Bapaq Ibrahim!' basen dengan sugih nike. 'Periakang tiang! Suruq Lazarus tamaq ranggotne ojok dalem aiq terus dateng basaqang ẽlaq tiang. Tiang sengsare gati lẽq dalem api niki!'

²⁵ Laguq jawab Ibrahim, 'Inget anak tiang: Sengonẽq side idup, side sampun mauq selapuq hal saq solah-solah, laguq Lazarus mauq saq lengẽ-lengẽ. Mangkin Lazarus seneng lẽq deriki, laguq side sengsare.

²⁶ Selain nike, lẽq antare side kance tiang pade araq sopoq jurang saq dalem, adẽq dengan lẽq deriki ndẽq bau ojok derike dait dengan lẽman derike ndẽq bau ojok deriki!'

²⁷ Basen dengan sugih nike, 'Lamun maraq nike, sanget siq tiang tunas adẽq Pelungguh ngutus Lazarus ojok balẽ bapaq tiang.

²⁸ Araq lime semeton tiang lẽq derike. Suruq Lazarus peringet ie pade, adẽq ndaq jangke ie pade ẽndah tame ojok taoq siksaqan niki.'

²⁹ Jawab Ibrahim, 'Dengan-dengan nike sampun bedowẽ Kitab Suci saq tesampẽang langan Musa dait kitab nabi-nabi saq lainne! Alurang ie pade taat lẽq napi saq tetulis lẽq dalem kitab-kitab nike!'

³⁰ Laguq dengan sugih nike bejawab, 'Nike ndẽq cukup, Bapaq Ibrahim. Laguq lamun araq dengan ninggal idup malik dait dateng lẽq ie pade, pasti ie pade gen tobat lẽman dose-dosene.'

³¹ Laguq jawab Ibrahim, 'Lamun ie pade ndẽq dengahang kesaksian Musa dait nabi-nabi, pasti ie pade ẽndah ndẽq percaye, timaqne araq dengan ninggal idup malik.'"

Lukas

Video Lukas 16

Ikuti Kami:

KONTAK | PARTISIPASI | DONASI