Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa Almasih mangecek kabake pangikuik-pangikuik-Nyo, "Adolah surang urang kayo. Inyo ado punyo surang pagawai tukang pacik pitih nan ma uruih aratonyo. Urang kayo tu mandapek kaba baraso pagawai tukang pacik pitih tu, ma abih-abihkan pitihnyo.

² Dek karano itu, inyo imbaulah pagawai tukang pacik pitih tu, sambia batanyo, 'Apokoh iyo batua tu, nan ambo danga tantang ulah wa-ang tu? Kiniko bawoklah kamari laporan nan langkok, tantang karajo wa-ang dalam ma uruih arato ambo. Wa-ang indak buliah lai manjadi pagawai tukang pacik pitih ambo.'

³ Mako pagawai tukang pacik pitih tu bapikie, 'Apo nan musti ambo karajokan kiniko? Induak samang ambo nak mamparantikan ambo. Mamangkua, di ambo indak talok; ka mintak sidakah ambo malu.

⁴ Ambo ado aka; jikok ambo diparantikan, sabalunnyo ambo musti mancari kanti nan banyak, nan lai ka namuah mambawok tompang ambo di rumahnyo!'

⁵ Dek karano itu, pagawai tukang pacik pitih tu mamanggie satiyok urang, nan ba utang kabake induak samangnyo. Kabake urang nan partamu inyo mangatokan, 'Bara utang angku kabake induak samang ambo?'

⁶ Urang tu manjawab, 'Saratuih embe minyak zaitun.' Pagawai tu bakato kabake inyo, 'Duduaklah, ikonyo surek utang angku, capeklah, surekkan sajolah limo puluah embe.'

⁷ Kudian inyo batanyo pulo kabake urang nan kaduwo, 'Angku, bara utang angku?' Urang tu manjawab, 'Saribu sumpik gandun.' Pagawai tukang pacik pitih tu bakato kabake inyo, 'Ikonyo surek utang angku. Tulihkanlah sajolah: salapan ratuih.'

⁸ Mako induak samang dari pagawai nan indak luruih tu, mamuji pagawainyo tu, dek karano akanyo nan cadiak tu; dek karano urang-urang dunia ko, labiah santiang ma atur sagalo karajonyo daripado urang-urang nan iduik dalam tarang."

⁹ Sudah tu Isa Almasih bakato pulo baliak, kecek Baliau, "Dangakanlah kecek Ambo ko! Pakailah arato dunia ko untuak pancari kanti, supayo jikok arato dunia ko lah indak ba arago lai, mako angku-angku ka ditarimo di tampaik tingga nan kaka.

¹⁰ Urang nan lai niyo ma aragoi parkaro-parkaro nan ketek, tantu inyo layi ma aragoi pulo parkaro-parkaro nan gadang. Tapi urang nan indak niyo ma aragoi parkaro-parkaro ketek, tantu inyo indak ka niyo pulo doh ma aragoi parkaro-parkaro nan gadang.

¹¹ Jadi, jikok tantang parkaro arato dunia ko, angku-angku lah indak dapek dipicayoi, tantu, siya pulolah urang nan ka namuah mampicayokan arato rohani kabake angku?

¹² Jikok tantang arato urang lain, angku-angku lah tabukti indak dapek dipicayoi, tantu, siya pulolah urang nan ka niyo ma agiahkan arato nan samustinyo ka manjadi miliak angku?

¹³ Indak ado doh urang nan bisa bakarajo untuak duwo urang induak samang; dek karano inyo ka labiah mangasiahi nan surang ko daripado nan ciyek lai, kok indak inyo ka labiah satiya kabake induak samangnyo nan ciyek ko, daripado ka nan surang lai. Baitu pulolah ka adaannyo angku-angku. Angku-angku indak ka bisa doh bakarajo untuak Allah, sarato bakarajo pulo untuak arato bando."

¹⁴ Urang-urang Farisi mandangakan kasadonyo, apo nan dikatokan dek Isa Almasih. Inyo bi mancimeehkan Baliau, dek karano urang Farisi tu cangok ka pitih.

¹⁵ Mako bakatolah Isa Almasih kabake urang Farisi tu, "Angku-angkulah urangnyo, jikok di adok-an urang, bakcando urang siyak, tapi Allah mangatawui isi ati angku-angku. Dek karano, apo nan disanjuang-sanjuang dek manusia, dibanci-i dek Allah.

¹⁶ Paratuaran agamo nan di ajakan dek Nabi Musa, sarato jo pangajaran nabi-nabi, tatap balaku sampai ka maso Nabi Yahya Pambaptis. Sajak dari wakatu itu, Kaba Baiak tantang baa caro Allah mamarentah, sabagai Rajo di muko bumi ko, taruih dibaritokan. Urang bi mamasokan diri untuak masuak Karajaan Allah tu.

¹⁷ Labiah mudah bumi jo langik ko ilang lanyok, daripado mambatakan ciyek uruih dalam Paratuaran Allah.

¹⁸ Siya nan mancaraikan bininyo, sudah tu inyo babini ka padusi nan lain, urang tu samo jo bajina. Baitu pulo urang nan babini ka padusi nan lah dicaraikan dek lakinyo, urang tu samo pulo tu jo bajina."

¹⁹ "Adolah surang urang nan kayo. Bajunyo dari kain nan sangaik maha, baitu pulo iduiknyo dalam kamewahan satiyok ari.

²⁰ Di adok-an pintu rumahnyo ado surang urang nan sangaik bansaik nan banamo si Lazarus. Badannyo panuah dek kada.

²¹ Inyo nak ma isi paruiknyo jo rimah-rimah nan jatuah dari meja urang kayo tu. Malah anjiang tibo manjilek-i kadanyo.

²² Kamudian urang nan bansaik tu maningga, sudah tu, inyo dibawok dek malekaik ka tampaik nan ta aromaik, di dakek Nabi Ibrahim di sarugo. Urang nan kayo tu pun maningga pulo, lansuang pulo dikubuakan.

²³ Di dunia urang mati, urang nan kayo tu sangaik barek sansaronyo. Kutiko inyo maliyek dari sinan arah ka ateh, inyo manampak Nabi Ibrahim di tampaik nan jauah, si Lazarus tagak di dakek Nabi Ibrahim.

²⁴ Urang nan kayo tu, ma ariak ma imbau Nabi Ibrahim. 'Oih angku Ibrahim, iboilah ambo ko. Suruahlah si Lazarus marandamkan jarinyo ka dalam ayie, sudah tu, suruahlah inyo kamari untuak mambasahi lidah ambo ko. Sangaik bana padiahnyo, ajab sansaro nan ambo tangguangkan dalam api ko!'

²⁵ Tapi Nabi Ibrahim manjawab, 'Oih anak den, kana-ilah iduik angkau salamo di dunie: dawulu angkau lah mandapek kasadonyo nan elok-elok, sadangkan si Lazarus kutiko itu, mandapek nan buruak-buruak. Kiniko inyo iduik sanang disiko, angkau sandiri sansaro.

²⁶ Salain daripado itu, di antaro angkau jo kami, lah dibuwek ngarai pambateh nan sangaik dalam, supayo urang nan dari siko indak bisa payi kasinan, baitu pulo, urang nan disinan indak dapek doh datang kamari!'

²⁷ Urang kayo tu bakato, 'Jikok baitu ngku, ambo sabana mamintak tolong kabake angku, untuak manyuruah si Lazarus payi ka rumah urang gaek ambo.

²⁸ Ado limo urang dunsanak ambo disinan. Suruahlah si Lazarus untuak mamparingekkan inyo, supayo inyo jan sampai masuak pulo ka tampaik nan sansaro ko.'

²⁹ Nabi Ibrahim manjawab, 'Lah ado kitab-kitab Nabi Musa, sarato jo kitab nabi-nabi, di dunsanak angkau tu! Padiyakan sajolah, buliah nak inyo turuikkan, sagalo apo nan tatulih di kitab tu!'

³⁰ Tapi urang kayo tu bakato pulo, 'Jikok bakcando itu sajo, rasonyo alun cukuik tu lai angku. Tapi, jikok ado urang nan lah mati, iduik baliak, sudah tu datang kabake dunsanak ambo, mako inyo ka bi batobaik dari doso-dosonyo.'

³¹ Mako Nabi Ibrahim bakato pulo, 'Jikok dunsanak-dunsanak angkau tu, indak ma acuahkan parentah Nabi Musa, sarato jo parentah nabi-nabi, mako indak ka mungkin doh dunsanak angkau tu, ka manjadi urang nan ba iman, biyapun, ado bana urang nan lah mati, iduik baliak.'"

Lukas

Video Lukas 16

Ikuti Kami:

KONTAK | PARTISIPASI | DONASI