Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa cawa jama jelma-jelma sai nutuk Ia, "Wat jelma sai mebatin. Ia ngedok sai pegawai keuangan sai ngurus hartani. Jelma batin ano mangsa laporan pegawai keuanganni ngeborosko duitni.

² Jadi ia ngurau pegawai keuanganni ano rik cawa, 'Api inji sai kudengi tentang niku? Tano, serahko jama nyak laporan sai lengkap tentang tugasmu ngurus hartaku. Niku mak dapok lagi jadi pegawai keuanganku.'

³ Pegawai keuangan ano bepiker, 'Api sai haga kusani tano? Majikanku haga ngeluahko nyak. Macul, nyak mak kuat; jadi pengemis, nyak meliom.

⁴ Nyak wat akal; rik nyak radu diluahko, nyak haga ngedok lamon kantik sai haga nampung nyak di lambanni tian!'

⁵ Raduni pegawai keuangan ano ngurau unggal jelma sai wat utang jama majikanni. Jama sai mula-mula, ia cawa, 'Pira utangmu jama majikanku?'

⁶ Jelma seno ngejawab, 'Seratus runcung minyak zaitun.' Pegawai ano cawa jama ia, 'Ajo surat utangmu. Mejongdo geluk tulisko: lima puluh.'

⁷ Kak raduni ia cawa jama jelma sai kerua, 'Kantik, pira utangmu?' Jelma ano ngejawab, 'Seribu karung gandum.' Pegawai keuangan ano cawa jama ia, 'Inji surat utangmu. Tulisko: walu ratus.'

⁸ Majikanni pegawai keuangan sai mak jujor ano muji pegawaini ulihni tindakanni sai cerdik ano; mani jelma-jelma di dunia inji lebih cerdik ngator urusan tian jak jelma-jelma sai hurik delom terang."

⁹ Kak raduni Isa cawa lagi, cawa-Ni, "Dengiko! Pakaido harta dunia inji untuk nyepok kantik in kik harta dunia inji radu mak berega lagi, keti haga diterima di rang sai abadi.

¹⁰ Jelma sai dapok dipercaya delom hal-hal sai lunik, dapok dipercaya juga delom hal-hal sai balak. Kidangni jelma sai mak dapok dipercaya delom hal lunik, mak dapok dipercaya delom hal-hal sai balak.

¹¹ Jadi, kik mengenai harta dunia inji keti radu mak dapok dipercaya, sapa sai haga mempercayako jama niku kebatinan rohani?

¹² Rik mengenai barang sai milik ulun bareh, keti tebukti mak dapok dipercaya, sapa haga ngeni jama niku api sai jadi milikmu?

¹³ Mak ngedok sai jelma pun dapok beguai jama rua majikan; mani ia haga lebih sayang jama salah sai majikanni, atau ia haga lebih setia jama tuan sai sai jak sai bareh. Reno muneh jama keti. Keti mak dapok beguai untuk Allah rik untuk harta benda juga."

¹⁴ Jelma-jelma Farisi ngedengi unyinni sai dicawako ulihni Isa. Kak raduni tian ngelalangko-Ni, mani tian gering jama duit.

¹⁵ Kidangni Isa cawa jama tian, "Ketido jelma sai di hadap ulun bareh keliakan benor, kidang Allah pandai isi hatimu. Mani api sai dianggap langgar ulih jelma, dipandang rendah ulihni Allah.

¹⁶ Hukum sai dikeni ulihni Musa rik ajaran nabi-nabi, tetap belaku sampai pada masani Yohanes Pembaptis. Pada waktu senodo Kabar Betik tentang injuk repa Allah merintah injuk Raja diberitako terus. Rik jelma memaksako dirini jadi umat Allah.

¹⁷ Kidangni lebih mudah bagi langit rik bumi lebon, jak sai huruf delom Hukum Allah jadi batal.

¹⁸ Sapa sai nyeraiko inggomni kak raduni ia kawin jama bebai bareh, jelma seno bezinah. Rik jelma bakas sai kawin jama bebai sai radu diceraiko kajongni, hukumni bezinah juga."

¹⁹ "Wat sai jelma mebatin. Kawaini mahal-mahal, rik hurikni mewah unggal rani.

²⁰ Di hadap rangok lambanni dipikko sai jelma mejerih gelarni Lazarus. Badanni latap jama keridas.

²¹ Ia haga ngisi tenaini jama remah-remah sai gugor jak mija jelma batin ano. Kaci bahkan ratong ngebelak keridasni.

²² Jelma sai mejerih ano kak raduni mati, kak raduni diusung malaikat mik rang sai tehormat di kebelah Abraham di surga. Jelma batin ano mati muneh raduni dikuborko.

²³ Di dunia ulun mati ia menderita nihan. Rik waktu ia ngeliak di atas, ia ngeliak Abraham di rang jaoh nihan, Lazarus wat di kebelah Abraham.

²⁴ 'Bapak Abraham!' cawani jelma batin ano. 'Kesian pai jama nyak. Kayun pai Lazarus nyelupko jarini delom way kak raduni ratong ngebasohko emaku. Nyak sengsara nihan delom apui inji!'

²⁵ Kidangni Abraham ngejawab, 'Ingokdo anakku: seumor hurikmu niku radu dapok sunyinni sai betik-betik, sedangko Lazarus dapok sai burak-burak. Tano ia senang di dija, rik niku sengsara.

²⁶ Lain jak seno, hantara niku jama sekam radu wat rulah sai relam, in jelma jak ija mak dapok mik di san, reno muneh jelma jak disan mak dapok mik dija!'

²⁷ 'Rik injuk reno, Pak,' ani jelma batin ano, 'nyak ngeharap nihan Bapak ngayun Lazarus mik lambanni bakku.

²⁸ Wat lima puariku di dudi. Kayundo Lazarus ngingokko tian, in dang sampai tian kuruk di rang penyiksaan inji.'

²⁹ Abraham ngejawab, 'Tian radu ngedok buku-buku Musa rik buku para nabi! Tagando tian nutuk api sai tetulis delom buku-buku udi!'

³⁰ Kidang jelma batin udi ngejawab, 'Seno mak cukup, Bapak Abraham. Kidang kik wat jelma mati hurik luot ratong jama tian, tian haga betubat jak dusa-dusani tian.'

³¹ Kidang Abraham cawa, 'Kik tian mak ngehirauko perintah Musa rik nabi-nabi, pasti tian mak haga percaya juga, walaupun wat jelma mati sai hurik luot.'"

Lukas

Video Lukas 16

Ikuti Kami:

KONTAK | PARTISIPASI | DONASI