Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Yesus nafa'da ana manatunga nala nae, "Hapu tou kamasu'ik esa. Touk ia nanuu pegawi manape'da doik esa, fo ana ito-ato su'i-bete nala. Hataholi kamasu'ik ia hapu hala nafafa'dak lae, pegawi manape'da doi na didilo-dodolo tali doin.

² Da'di nalo pegawi manape'da doik ndia ma nae, 'Au amanene basa hata lala'ena la'eneu o so? Besak ia, fe au hala nafafa'da matetuk la'eneu o ue-le'dim ito-ato au su'i-beteng. O ta bole da'di au pegawi manape'da doing so'on.'

³ Boema pegawi manape'da doik ndia doodoo nae, 'Au muse tao beek besak ia? Au Tua nga sanga kaluaheni au ia so. Au ta foi abe'i dae fa. Da'di hataholi mananoke-nokek boeo, au mae.

⁴ Naa, au hapu enok. Au muse anuu tia-lai ba'u, fo ala nau au leo nai sila uman, metema au nanakalua henik!'

⁵ Da'di pegawi manape'da doik ndia nalo hataholi mana mahutak neu tua na esa-esak. Nafa'da hataholi makasososa ka nae, 'O mahuta de'ubee?'

⁶ Hataholi ndia nataa nae, 'Mina zetun nggala natun esa.' Pegawi manape'da doik ndia nafa'dan nae, 'O susula huta ma nde ia. Mangatuuk leona fo sulak lai-lai: limahulu.'

⁷ Basa boema nafa'da hataholi kadua. 'Ma o mahuta de'ubee?' Hataholi ndia nataa nae, 'Gandum kalong lifun esa.' Pegawi mana pe'da doik ndia nafa'dan nae, 'O susula huta ma nde ia. Sulak natun falu leona.'

⁸ Boema pegawi manape'da doik fo manaputa-paik ndia, malanga na koa-kion, nanahu tatao-nono'i puta-pain ndia. Maso'dak nai daebafak ia, sama na leondiak! Hataholi daebafak ia la ito-ato puta-paik lalelak sila ito-aton neme hataholi fo naso'da nai mangale'do ka dalek."

⁹ Boema Yesus kokolak seluk nae, "Mamanene leona! Pake su'i-bete daebafak ia, soaneu hapu tia-laik, fo ela metema su'i-bete daebafak ia ta nabeli so'on soona, neukose emi nanasipok nai mamanak fo matea-mahele ka.

¹⁰ Hataholi fo bisa nananamahelek nai dede'a kome'doana la dalek, bisa nananamahelek nai dede'a matuaina la dalek boe. Tehu hataholi fo ta bisa nananamahelek nai dede'a kome'doana la dalek fa, ta bisa nananamahelek nai dede'a matuaina la dalek boe.

¹¹ Da'di, metema la'eneu su'ibete daebafak ia, emi ta hapu nananamahelek seluk fa soona, see nau fe namahehelek neu emi soaneu ito-ato su'ibete samane ka?

¹² Ma metema la'eneu buas fo hataholi fe'ek nuun, fo ala bubuluk ta bisa lamahele emi fa soona, see nau fe emi hata fo ana da'di emi nuum?

¹³ Ta hapu hataholi esa boen fo naue-nale'di soaneu tuan dua fa, nana neukose ana sue-lai esa lenaheni esa ka mai, do neukose ana lilineka neu tuan esa lenaheni esa ka mai. Leondiak boe no emi. Emi ta hapu maue-male'di soaneu Manetualain, ma soaneu su'ibetes boen."

¹⁴ Hataholi Farisi la lamanene basa hata fo Yesus nafa'da kala. Boema ala hikan, nana ala hii ka'da doi ka.

¹⁵ Tehu Yesus nafa'das nae, "Emi nde hataholi fo nai hataholi fe'ek matan soona, nananitak ndos, tehu Manetualain bubuluk emi dale ma oe isin lala'ena. Nana hata fo hataholi daebafa ka nafa'da nae madema, Manetualain meten soona, kaba'oanak.

¹⁶ Hoholo-lalanek fo Musa fe ka ma nabi la nanoli nala nanapakek nahelek losa Yohanis Mana Salani ka tepo lele na. Neme lelek ndia, Hala Malole la'eneu tao leo beek fo Manetualain paleta da'dileo Mane ka, nanatui-bengak nakandoo. Boema hataholi a da'di Manetualain hataholi kamahehelen no nakasetik.

¹⁷ Tehu mu'dak la'iesa kana soaneu lalai no daebafa ka sapulalo, neme Manetualain hoholo-lalanen de'e seseli anak esa da'di nanapake tak.

¹⁸ See elaheni saoina na boema ana sao seluk ina fe'ek soona, hataholi ndia hohonge. Ma hataholi fo ana sao inak fo nanaelahenik ndia soona, ana hohonge boe."

¹⁹ "Hapu hataholi kamasu'ik esa. Bualo'a papakena kabelik mesa-mesan, ma nana'a-nininun malole-mala'da tunga faik.

²⁰ Nai lelesuina na bafa na hataholi nuu ta-hata tak esa na'de Lasarus nangape'uk lee lee nai ndia, fo namahena ana hapu isi tei na ninik nana'ak fo manatu'da leme hataholi kamasu'ik ndia mein lain mai.

²¹ Ao na henuk no pulu-pai ka, nalosa busa la ala hii ka'da lalamemei pulu-pain ndia. Lena-lenak busa la mai fo lalamemei pulu-pai na.

²² Makabui na boema hataholi nuu ta-hata tak ndia maten, de ata nusa so'da kala lon leo mamana maha'da-holomata ka nai nusa so'da ka fo nai Abraham boboa na. Hataholi kamasu'ik ndia boeo maten de latoin.

²³ Nai daebafa hataholi manamate ka, ana doidoso nanseli. De nai lelek nanganalo neme naa leo lain neu te, nita Abraham nai mamana ka doo na seli, ma nita Lasarus nai Abraham boboa na.

²⁴ Boema hataholi kamasu'ik ndia nalo bou-bou nae, 'Ama Abraham! Sue-lai au dei. Madenu Lasarus dope lima ku'u na leo oe dale neu, boema ana mai fo nakadoe au maa nga dei. Te au doidoso anseli nai ha'ipilak ia dalek!'

²⁵ Tehu Abraham nataa nae, 'Mafandendelek ana ngonei: nai o fai maso'da ma dalek, o hapu basa hata fo malole lala'ena so, tehu Lasarus hapu basa hata ta malole lala'ena. Besak ia namahoko nai ia, ma o doidoso nai naa.

²⁶ Fe'ek neme ndia mai, nai o ma ami tala'da, hapu fela matuaina esa, fo ela hataholi neme ia ta hapu leo naa neu fa, ma hataholi neme naa ta hapu leo ia mai fa!'

²⁷ Boema hataholi kamasu'ik ndia nae, 'Metema leondiak soona, au dokodoe anseli, fo Ama madenu Lasarus neu leo au Amang uman neu.

²⁸ Te au tolanoong lima bei lai ndia. Madenu Lasarus neu fo ana fes nasanene'dak, fo daenga boso nalosak sila boeo masok leo mamana doidosok ia mai.'

²⁹ Boema Abraham nataa nae, 'Sila lanuu Musa ma nabi la susula nala so! Nemena fo ala tunga hata fo nanasulak nai susulak sila la dalek!'

³⁰ Tehu hataholi kamasu'ik ndia nataa nae, 'Ndia beita dai fa, Ama Abraham. Metema hapu hataholi manamate ka naso'da falik fo neu nafa'das soona, neukose ala tukatei-saledale leme sala-singo nala mai.'

³¹ Tehu Abraham nae, 'Metema ala ta taoafik neu Musa ma nabi la paleta na fa soona, tao leo bee o neukose ala ta lamahele boen, leomae hapu hataholi manamatek naso'da falik fo nafa'das boe.'"

Lukas

Video Lukas 16

Ikuti Kami:

KONTAK | PARTISIPASI | DONASI