Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Yesus nombatesa ka topantuki-topantuki I'a porapa e'i wo'u. "Naria samba'a tau nasugi to naria samba'a wakelena nombaurusi kakalumanana. Tau nasugi etu nangepe kareba nggari ja'i tau ntanina to nanguli wakelena etu nompakaopu kakalumanana.

² Jadi nipokiona wakelena etu pade niulina, 'Natantu mpu'u tesa niepeku ewa inggumu! We'i-we'i kawia pakagana suramu ewa panggawiamu nombaurusi kakalumanaku, sabana komi mana mamala majadi wakeleku.'

³ Nangepe etu nompekirimo wakele etu riara nta'ina, 'Hai, iwenumo aku e'i? Balenggaku e'i madota manggabasaka aku. Nuapa kukawia ngina? Ane aku motonggo da'a mana kupakule. Ane merapi-rapi ri jala maeya mataku.

⁴ A, iwe'imo akalaku! Ane aku rakabasaka kana madea roaku to madota mantarima aku ri sapo ira.'

⁵ Jadi nalaumo i'a nompokio pura-pura tau to noinda doi ri ja'i balenggana. Niulina ka tau pamulana, 'Sakuyamo indamu ri ja'i balenggaku?'

⁶ Nesonomo tau etu, 'Satu ongu gumba lana.' Nangulimo wakele etu, 'E'imo sura inda komi. Kamaimo pekatoko ri se'i, masasinta ratulisi komi limampulu ongu gumba.'

⁷ Pade niulina ka tau ntanina, 'Sakuyamo indamu?' Nesonomo tau etu, 'Sanjobu karu ose.' Pade nangulimo wakele etu, 'E'imo sura inda komi. Tulisimo waluatu karu.'

⁸ Tempo tau nasugi etu nangepe nuapa to nikawia wakelena to nadenggo rarana etu i'a nombatoiya wakelena etu sabana nata'u akalana." Pade Yesus nompakaopu tesana iwe'i: "Tau-tau to nadenggo rarana ri dunia e'i neliu nggapandepa nompakasiayu bago ira nggari tau-tau to nanoa rara to natuwu riara karemena.

⁹ Pade kuuli wo'u ka komi, pakemo kakalumana dunia e'i, naupa naja'a, rapombarata roa ala tempona kakalumana dunia mana ria olina komi kana ratarima ri peto'o to nabelona ri suruga.

¹⁰ Tau-tau to namala niparasaya ante mbara-mbara sakedi namala wo'u niparasaya ante mbara-mbara to nadea. Tapi tau-tau to nadenggo rarana ante mbara-mbara sakedi nadenggo wo'u rarana ante mbara-mbara to nadeana.

¹¹ Jadi ane komi da'a namala niparasaya ante kakalumana nggari dunia to naja'ana e'i, natantumo da'a ria to madota momparasaya ka komi kakalumana to nabelona nggari suruga.

¹² Pade ane komi da'a namala niparasaya ante mbara-mbara tau ntanina, natantumo da'a ria to madota mombawai ka komi kakalumana majadi bagiamu.

¹³ Da'a namala samba'a tau majadi batua nggari romba'a madika. Sabana i'a kana magigi rarana ri ja'i madika to samba'ana pade mompotowe madika ntanina etu. Atau i'a kana mombabila madika to samba'ana pade momporau rara madika ntanina etu. Iwetu wo'u ante komi. Da'a mamala komi mepue sanggani ka Alatala bo manjarumaka mbara-mbara ri dunia e'i."

¹⁴ Tau-tau to Parisi nangepe pura-pura to nitesa Yesus pane'a. Pade ira nompongiri Yesus sabana ira nompotowe doi.

¹⁵ Tapi nangulimo Yesus ka ira, "Komi tau to nantakono inggu komi mboto ri ngayo tau ntanina, tapi Alatala nangginjani isi rara nta'imu. Da'a nipokonona pokainggumu iwetu. Toramo! Nuapa to nabelo nantuki pombarata manusia, etumo to nipoja'a rara Alatala.

¹⁶ Atura-atura agama Yahudi pade nuapa to nipatuduki nabi-nabi ka kita nipatolele sampe karata Yohanes Topediu. Nompamula nggari tempo etu Kareba Belo ewa Alatala ante Poparentana nipatolele ka tau-tau sampe we'i-we'i. Pade pura-pura tau nompasimbuku mpu'u nosimpago mesua riara Poparenta nu Alatala etu.

¹⁷ Neliu nggagampapa langi bo dunia malipo pade saongu huruf nggari Atura-atura agama etu rapakalipo."

¹⁸ Pade nanguli wo'umo Yesus, "Isema-sema to nombasompo rongona besi pade nomporongo besi ntanina i'a etu nebualo. Pade tau to nomporongo besi to nisompomo, i'a wo'u topebualo."

¹⁹ Nanguli wo'umo Yesus, "Naria samba'a tau nasugi, pakeana nasuli mpu'u olina, katuwuna eo-eo nabelo.

²⁰ Naria wo'u samba'a tau nakasiasi nosanga ka i Lazarus. Korona pura-pura nabaka. I'a nabiasa nikeni ntau mpaka ri pewobo ntau nasugi etu.

²¹ Nisarumakana bara mamala i'a manggoni rombo panggoni to nanawu nggari meja ntau nasugi etu. Pade asu-asu wo'u narata nombajila bakana.

²² Naratamo tempona tau nakasiasi etu namate pade i'a nikeni malaeka mpaka ri peto'o to nibila ri sinjori Abraham ri suruga. Tau nasugi etu wo'u namate pade nitana. Pade i'a nitajiaka riara naraka.

²³ Ri setu i'a nandasa mpu'u. Tempona i'a nantingoa ri kalangana nikitana Abraham ri peto'o nakawao pade i Lazarus ri sinjorina ri setu.

²⁴ Pade nongaremo tau nasugi etu, 'Umaku, Abraham, potowemo aku! Pakaumo i Lazarus mantonomaka sanggoya palena ri ue pade marata mombasasii jilaku, sabana nandasa mpu'umo aku riara apu e'i!'

²⁵ Tapi nesonomo Abraham, 'Toramo, anaku, iko nadamba-damba katuwumu nggari kakedi-kedimu sampe iko namate, tapi Lazarus e'i tau nandasa. We'i-we'i i'a nipakadamba ri se'i, tapi iko nipakandasa.

²⁶ Ntanina nggari etu, ri olo kita e'i naria limba to nandalana ala tau nggari se'i da'a namala gusetu, pade tau-tau nggari setu da'a namala momai guse'i.'

²⁷ Nangepe etu nangulimo tau nasugi etu, 'Ane iwetu, kuperapi ka komi, pakaumo i Lazarus mpaka ri sapo nu umaku.

²⁸ Danariapa limamba'a sampesuwuku ri setu. Pakaumo i Lazarus etu malau mompopanjani ka ira ala ira wo'u ne'e mesua ri peto'o to nandasa e'i.'

²⁹ Tapi nesonomo Abraham, 'Nariamo buku-buku i Musa ante buku-buku nabi-nabi ri ja'i ira. Palambamo ira mantuki nuapa to nitulisi riara buku-buku etu!'

³⁰ Tapi nesonomo tau nasugi etu, 'Etu da'a nagana, Uma. Tapi ane maria tau namate matuwu bali malau mpaka ri ja'i ira, kana majea ira nggari silaka-silaka ira.'

³¹ Tapi nesonomo Abraham, 'Da'a nakono! Ane ira da'a nantuki tesa to nitewai Musa ante nabi-nabi ntanina, naudamo tomate membangu matuwu bali, da'a wo'u rapompangala ira.'"

Lukas

Video Lukas 16

Ikuti Kami:

KONTAK | PARTISIPASI | DONASI