Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iw̃a'õ Yesu khõ ndra nifahaõ-Nia, "So samõsa niha si kayo. So samõsa fagaw̃enia sondrorogõ haratonia andrõ. Itema wangadu niha si kayo andrõ, wa no ihorigõ gefenia fagaw̃e da'õ.

² Ikaoni fagaw̃e sololohe kefenia andrõ ba imane, 'Hadia nirongogu andrõ sanandrõsa khõu? Iada'e, be'e khõgu wamoturia waõwaõ gefegu. I'otarai iada'e tenga sa'ae ya'ugõ zololohe kefe.'

³ Andrõ mangerangera fagaw̃e sololohe kefe andrõ, 'Hadia nilaugu iada'e? Bõrõ me i'efa'õ ndra'o sokhõ ya'o. Tebai ndra'o wamaku tanõ, ba aila ndra'o gõi wangandrõngandrõ bõli gõgu.

⁴ U'ila iada'e hadia nilaugu. Na no la'efa'õ ndra'o, sõkhi na oya nawõgu si tola manema ya'o ba nomora!'

⁵ Andrõ izarazara fagaw̃e sololohe kefe andrõ wogaoni niha so'õmõ khõ zokhõ ya'ia. Ba niha si fõfõna imane, 'Ha'uga gõmõu khõ zokhõ ya'o?'

⁶ Itema linia niha andrõ, 'Otu bele wanikha zaitu!' Imane khõnia fagaw̃e sololohe kefe andrõ, 'Ya'e zura gõmõu. Dadao ba da'õ: ba sura lima wulu tõ.'

⁷ Aefa da'õ imane ba ganete da'õ, 'Ha'uga gõmõu gõi, talifusõ?' Itema li niha andrõ, 'Saribu karu gandru!' Ba imane fagaw̃e andrõ khõnia, 'Ya'e zura gõmõu. Sura: w̃alu ngaotu!'

⁸ Ba isuno fagaw̃e da'õ sokhõ ya'ia ba wa'onekhenia andrõ, abõlõ sa onekhe niha gulidanõ da'e ba gombayasõra moroi ba ndraono haga."

⁹ Ifuli zui fahuhuo Yesu. Imane, "Mifondrondrongo da'e: mi'oguna'õ gana'a gulidanõ andrõ ba wangoya'õ awõmi, ena'õ na irugi inõtõ lõ bõli gana'a gulidanõ andre dania, latema'õ dania ami ba nahia si lõ tebulõ.

¹⁰ Niha nifaduhusi tõdõ ba ngawalõ zide'ide, tola mufaduhusi tõdõ gõi ba zebua. Ba hiza niha si tebai mufaduhusi tõdõ ba ngawalõ zide'ide, tebai gõi tefaduhusi tõdõ ba ngawalõ zebua.

¹¹ Na tebai nifaduhusi tõdõ ami ba gana'a gulidanõ andre, haniha zomasi faduhu tõdõ khõmi ba gana'a soroi zorugo?

¹² Ba na ba gamagama niha bõ'õ oroma wa tebai nifaduhusi tõdõ ami, haniha zomasi mame'e khõmi sinangea khõmi?

¹³ Samõsa lõ si tola mõi enoni khõ zi darua sangoni; bõrõ me i'afõkhõi tõdõ zi samõsa dania, ba i'omasi'õ zi samõsa, ma zui i'o'õ li zi samõsa ba i'osilõ'õgõ zi samõsa. Tebai mõi enoni Lowalangi niha ba enoni gana'a gõi."

¹⁴ Larongo fefu ira Farizai'o wehede Yesu. La'igi'õ Ia bõrõ me somasi kefe ira.

¹⁵ Ba Imane khõra Yesu, "Ya'ami zanguma'õ fõna niha wa ya'ami zindruhu. Ba hiza, Lowalangi zangila õsi dõdõmi. Bõrõ me ni'alaw̃a'õ niha, da'õ ni'ide'ide'õ Lowalangi.

¹⁶ Oroisa nibe'e Moze awõ wamahaõ ba mbuku ndra sama'ele'õ, ba te'oguna'õ manõ irugi ginõtõ Yohane Samayagõ Idanõ. I'otarai da'õ teturiaigõ manõ Duria Somuso Dõdõ sanandrõsa ba wamatõrõ Lowalangi. Ba laforege niha we'amõi Ono mbanua amatõrõw̃a Lowalangi.

¹⁷ Ba hiza, abõlõ aoha taya mbanua si yaw̃a awõ danõ, moroi na lõ alua zi sambua hurufo bakha ba Huku nibe'e Lowalangi.

¹⁸ Solau horõ niha samabali fo'omonia ba aefa da'õ ilau mangowalu ba ndra alawe bõ'õ. Ba solau horõ gõi ndra matua sangowalu ba ndra alawe si no mufabali andrõ moroi khõ wo'omonia."

¹⁹ "So samõsa niha si kayo, sonukha si sõkhi, somuso tõdõ bõrõ wa lõ fa'ambõ ero ma'õkhõ.

²⁰ Ba so samõsa zi numana sotõi Lazaro, safõnu gimõgimõ sageu botonia. Si to'õlõnia i'iagõ gahe nora nomo niha si kayo andrõ,

²¹ ena'õ tola ifo'õsi dalunia faoma akhõkhõla gõ satoru moroi ba meza niha si kayo andrõ. Ba tohare nasu wamelamelai gimõgimõnia.

²² Lõ ara aefa da'õ mate zi numana andrõ ba la'ohe ia ira mala'ika ba nahia sabõlõ sõkhi ba zinga Gaberahamo ba zorugo. Ba mate gõi niha si kayo, ba lako'o.

²³ Tefakao sibai ia ba nahia zi mate andrõ. Ba me ifakhõlõ ia wamaigi si yaw̃a, i'ila ba zarõu Gaberahamo awõ Lazaro ba zingania.

²⁴ Mu'ao niha si kayo andrõ, 'He Amagu Aberahamo! Hakhõsi tõdõ ndra'o. Fatenge Lazaro andrõ akha itutugõ durunia ba nidanõ ba wangokafui lelagu. Marase sibai ndra'o ba galitõ andre!'

²⁵ Ba imane Aberahamo, 'Tõrõ tõdõu onogu: me auri'õ, no õtema fefu zi sõkhi, ba no itema zi lõ sõkhi Lazaro. Iada'e sana ia ba da'e, ba ya'ugõ si marase.

²⁶ Baero da'õ, no so mbaho sabakha ba gotaluada, ena'õ bõi mõi niha moroi ba da'e numalõ ba da'õ ba niha moroi ba da'õ bõi mõi ba da'e!'

²⁷ Imane niha si kayo andrõ, 'Na si manõ Ama, u'andrõ sibai khõu ena'õ õfatenge Lazaro andrõ we'amõi ba nomogu,

²⁸ ena'õ ifangelama ndra talifusõgu, bõrõ me so dalima tõ ira. Akha bõi mõi ira ba nahia wa'amarase andre!'

²⁹ Ba imane Aberahamo, 'No so khõra mbuku Moze awõ mbukubuku ndra sama'ele'õ! Akha la'o'õ hadia niw̃a'õ Moze awõ ndra sama'ele'õ ba mbuku andrõ!'

³⁰ Ba itema li niha si kayo andrõ, 'Ambõ da'õ Amagu Aberahamo. Na auri zi mate mangawuli ba we'amõi khõra, awena lafalalini gera'erara larõi horõra.'

³¹ Ba hiza, imane Aberahamo khõnia, 'Na lõ ba dõdõra Moze awõ ndra sama'ele'õ, lõ gõi faduhu dõdõra he na auri zi mate mangawuli.'"

Lukas

Video Lukas 16

Ikuti Kami:

KONTAK | PARTISIPASI | DONASI