Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mawu Yesus něhengetang su manga murit'E, "Piạ nạung sěngkatau kalạ. I sie piạ sawohị e měngangurusẹ̌ kakakalạe. Tau kalạ ene nakaěbạe aduhangu sawohịe kai mẹ̌gẹ̌gagholọu roite.

² Kutẹu i sie nakireạeng sawohịe kụ nẹ̌bera, 'Kai apạe ngae ikẹ̌karingihẹ̌ku mạanun kau? Orasẹ̌ ini, pěhabarẹ̌ko pakaunsu-unsui hal᷊ẹ̌u pananahimatanu su rarotongku. U i kau seng tawe wotonge makoạ sawohị u měngangurusẹ̌ doitẹ̌ku.'

³ Tangu sawohị ene mẹ̌sẹ̌sipirẹ̌, 'Kai mẹ̌kapurạ e tangu iạ e? Mawuku e kai mělẹ̌lohosu iạ. Mamacolẹ̌ iạ tawe makakoạ; mẹ̌taharorong iạ e kai mamea.

⁴ Iạ nakahěngangke; kereu iạ nal᷊ohosete, iạ harusẹ̌ lawọ hapịku manarimạ u iạ su wal᷊en sire!'

⁵ Kutẹu sawohị ene kimuị e si sire apan piạ utange su mawune. Su humotonge, i sie nẹ̌bera, 'Pirạ e utangu su mawuku e?'

⁶ Tau ene simimbang, 'Mahasụ su wěnsad'u lanang zaitun.' Sawohị e nẹ̌bera si sie, 'Al᷊ạko surat'u utangu. Kaiangke kụ lighạ pěmohẹ: l᷊iman pul᷊o.'

⁷ Bọu e i sie nẹ̌bera su tau karuane, 'Kụ si kau pirạ e utangu e?' Tau e simimbang, 'Sěhiwu su karong'u gandung.' Sawohị e nẹ̌bera si sie, 'Ini al᷊ạko surat'u utangu. Bohẹ e: ual᷊u hasụ.'

⁸ Tangu mawun sawohị u roitẹ̌ kụ tawẹ katul᷊ide e nẹ̌dalo si sie ual᷊ingu kakanoạ e matahuěnna; u manga taumatan dunia e limembo matahuěnna mạngatorẹ̌ urusang i sire wọu manga taumata měbẹ̌biahẹ̌ su tualagẹ̌."

⁹ Mase i Yesus saụewe něhengetang kapia, angkuěnge, "Pěmpẹ̌daringihẹ̌ko! Pakẹko arětạ u dunia ini waugu makareạ hapị, tadeạu kereu arětạ u dunia ini seng tạ arẹ̌gane, i kamene sarung ikatarimạ su ěllong kakalẹ̌ e.

¹⁰ I saing kẹ̌kapangimangeng su ral᷊ungu manga hal᷊ẹ̌ dararodọ kẹ̌kapangimangeng l᷊ai su manga hal᷊ẹ̌ gaghaghuwạ. Arawe i sain ta ikapangimangeng su ral᷊ungu manga hal᷊ẹ̌ dararodọ, mal᷊aing ta ikapangimangeng su manga hal᷊ẹ̌ gaghaghuwạ.

¹¹ Kerene, kamageng su hal᷊ẹ̌u arẹ̌tạ u dunia e i kamene seng ta ikapangangimangeng, i sai tangu mapulu mangumbalang kamene su hal᷊ẹ̌u arětạ marohkẹ̌?

¹² Dingangu kereu su rarotongu wal᷊ine i kamene l᷊ěnnạu ta ikapangimangeng, ute i sai wue mapulu mangonggọ apan makoạ tataghuaneng i kamene?

¹³ Tawẹu sarang sěngkatau makapẹ̌tahamawu su mawune rarua; watụ u i sie kuměndagewen sěmbaụ něngalembo wọu wal᷊ine, arau i sie masatia su mawune sěmbaụ wọu wal᷊ine. Kerene lai i kamene. I kamene tawe makapẹ̌tahamawu su Mawu Ruata ringangu l᷊ai su arětạ."

¹⁴ Tau Farisi nakaringihẹ̌ kěbị apan nipěhengetang i Yesus, mase i sire němpahul᷊ẹ̌ge nẹ̌baheaun Sie, watụ u i sire papuluang su roitẹ̌.

¹⁵ Arawe i Yesus něhengetang si sire, "I kamene kai taumata ikẹ̌kasilo adilẹ̌ su těngong taumata wal᷊ine, kai Mawu Ruata e masingkạ u ral᷊ungu naung i kamene. U apan lẹ̌ěnnaěng marangẹ su taumata, kai kẹ̌kakěllaěng masanạ su Mawu Ruata e.

¹⁶ Toratẹ̌ kụ nigaghěllị i Musa e ringangu těntirong manga nabi e, wodang mạpakẹ sarang tempon Yohanes Mananahani. Dokeng tempo ene Injilẹ̌ mạanung kereapa Mawu Ruata mẹ̌parenta kere sěngkatau Ratu měngkate hanesẹ̌ ipẹ̌dẹ̌dal᷊ahabarẹ̌. Kụ taumata e měngkai měpẹ̌papul᷊aho makoạ umat'u Mawu Ruata.

¹⁷ Kai ěndọu katewe langị dingangu dunia e mapaghohẹ̌, sul᷊ungu piạ hurupẹ̌ sěmbaụ bọu torat'u Mawu e mailang.

¹⁸ I sai manindo kawinge mase mẹ̌kawing dingangu wawine wal᷊ine, tau ene e nawuang. Dingangu i sai mẹ̌kawing dingangu wawine kụ nisindoěnge mal᷊aing nawuang."

¹⁹ "Ene nạung piạ tau kalạ. Pakeange měngkai mal᷊al᷊ẹ̌gadẹ̌, kụ měngkatewe mẹ̌sẹ̌sal᷊iwang ěllo-ěllo e.

²⁰ Kụ piạko tau kasiang mạpapěllọ su pasěllangengu wal᷊ene arenge i Lazarus. Awạe napěpidu hempang.

²¹ I sie mapulu měloho tiange dingangu popahu kaěng mạhondosẹ̌ bọu mẹdang tau kalạ ene. Asu rụděntakol᷊ai měmpẹ̌lẹ̌lewa hempange.

²² Tau kasiange wọu e nate, kụ niěntud'u malạekatẹ̌ sarang tampạ kawantugange su sěndihang i Abraham su sorga. Tau kalạ e nate e l᷊ai kụ nilẹ̌bing.

²³ Su katanakeng u taumata nate i sie měngkate apa masigẹ̌sa. Kụ su tempong i sie rimal᷊ingara ute, i sie nakasilọe si Abraham dasị marangẹ dingangu i Lazarus susěndihang i Abraham.

²⁴ 'Tuang Abraham!' kakuịen tau kalạ. 'Tal᷊ěntukon iạ. Oroiko i Lazarus apangunon tal᷊imẹ̌done su akẹ, kụ apěnantạ lilaku. Iạ mangkewen nasunsara su ral᷊ungu rěllịu putung ini!'

²⁵ Kutẹu i Abraham simimbang, 'Pětahěndung bue anạku: kanandụen pẹ̌bawiah'u i kau seng nakatarimạ apan mapapia, arawe i Lazarus e nakahombang dal᷊akị e. Kụ ini i sie mal᷊unsemahẹ̌ arawe i kau e masunsara.

²⁶ Tapengu lai, su tal᷊oarang kau ringangu i kami e seng piạ tagial᷊ụe mal᷊oang tadeạu i sain bọu ini tawe makatamai ringangu i sain bọu pai e tawe makaramahi!'

²⁷ 'Kamageng kerene, Tuang,' angkuěng u tau kalạ e, 'iạ mědẹ̌dorong sěngapang botonge si Tuang pěndoloh'i Lazarus sarang bal᷊eng amangku e.

²⁸ Piạ l᷊imangkatau anạ u sěngkatauku sene. Dolohẹ̌ko i Lazarus apěnasako si sire, madiring i sire lai manawo su tampạ masunsara ini.'

²⁹ I Abraham simimbahẹ̌, 'Si sire seng piạ manga bukẹ̌ i Musa ringangu bukẹ̌ u manga nabi! Balạ e i sire raringihẹ̌ apam mạbawohẹ su ral᷊ungu manga bukẹ̌ ene!'

³⁰ Arawe tau kalạ e simimbang, 'Ene kai tawe makahětibẹ̌, Tuang Abraham. Kai kereu piạ taumata nate mẹ̌bangung kapia kụ duměnta sarang anun sire, ute i sire měmpẹ̌tobatẹ̌ bọu kal᷊awọu rosan sire.'

³¹ Kutẹu i Abraham nẹ̌bera, 'Kereu i sire tawe rumaringihẹ̌ parentang Musa ringangu manga nabi ute, nal᷊ahẹu i sire tawe měmpangimang manilaing piạ taumata nate mẹ̌bangung kapia.'"

Lukas

Video Lukas 16

Ikuti Kami:

KONTAK | PARTISIPASI | DONASI