Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kebala Yésus kuan anak-anak sekola' ineh, "Inan seburur lun do' luk inan selemulun luk ngasa' binawehneh; idi lemulun ineh inadu' lun baken inan tuanneh ngaceku nengebura' binaweh tuanneh.
2 Idi tuan ineh nenawar neneh, idi kebalaneh, 'Anunké luk pindengerku ratnan iko luk inadu' lun? Maré negku nekini aceh surat luk ngegala' ratnan binawehku luk bang paladmu, ngaceku na iko miak mangun ku lun ngasa' binawehku peh.'
3 Idi keburi' lun luk ngasa' binawehneh ineh bang niatneh, 'Anunké luk miak ruenku? Ngaceku tuanku nala' negku ratnan kekamen ngasa' binaweh ini? Idi ngukat tana' ui na metueh, idi mutuh usin mo'-mo' pana' ui migu'.
4 Nekini ui kali' anun luk miak ruenku kareb ui pangeh tila' ratnan kekamen ngasa' binaweh ini pad ui miak lapen semuet bang ruma' lun baken.'
5 Idi ieh nenawar anid-anid lemulun luk pangeh nepebaleh inan tuanneh idi nepebala kuan luk pun-pun, 'Tuda' balehmu inan tuanku?'
6 Keburi'neh, 'Umau saitun meratu ngutin.' Idi keburi'neh kuanneh, 'Ngalap surat balehmu ini, do' iko tudo miket idi ngayud limeh ngepulu'.'
7 Idi ieh nepebala kuan luk baken, 'Iko ini tuda'ké balehmu?' Idi keburi'neh, 'Padé 8,000 gatang.' Idi keburi'neh kuanneh, 'Ngalap surat balehmu ini, ngayud 6,000.'
8 Idi tuanneh ineh pana' nengubur lun luk ngasa' binawehneh luk na matu ineh, ngaceku ratnan luk inau'neh ineh dengan ilehneh; ngaceku anak-anak tana' ini meluun ileh ratnan anak-anak acang."
9 Idi teh kebala Yésus, "Ui pebala nemuyuh: nganau' lun rurum kuan burur muyuh sebuleng dengan binaweh tana' ini luk na matu ineh; idi kareb binaweh tana' ini metutu' rat nemuyuh, muyuh miak lapen amé' bang ruma' luk meruked.
10 Lemulun luk lutep niat bang kekamen luk isuut ini, ieh teh lutep niat bang kekamen luk rayeh; idi lemulun luk na matu bang kekamen luk isuut, ieh teh na matu bang kekamen luk rayeh.
11 Kudeng muyuh na lutep niat ngimet binaweh tana' ini, idéké luk merapet nemuyuh ratnan binaweh luk matu?
12 Kudeng muyuh na lutep niat dengan binaweh lun baken, idéké luk miak maré kuan muyuh binaweh muyuh sebuleng?
13 "Na luk idi seburur demulun miak ngakem kuan dueh tuan, ngaceku na miak na seburur inanneh megateh idi luk baken ineh inanneh mawa, idi ieh ngimet meraben dengan seburur idi ngedat luk baken. Idi muyuh na miak mangun ku demulun Allah idi demulun usin."
14 Kareb lun Parisi neninger amung bala luk kudeng ineh, idi ideh nesitunga nan Yésus, ngaceku ideh melili ku usin.
15 Iamo' kebala Yésus nedeh, "Muyuh luk ngatu burur muyuh sebuleng pa kiung lemulun, iamo' Allah kali' niat muyuh; ngaceku anun-anun luk siren medita' pa kiung lemulun, na ulekneh pa kiung Allah.
16 "Ukum Musa ineh idi surat nabi-nabi lutep pad macing kareb Yahya; idi rat kareb ineh pana' Imet Allah bida' peh, idi anid-anid lemulun singaro semuet bang ineh.
17 Iamo' meluun malé langit idi tana' ini metutu' ratnan ngetutu' sesuut Ukum Musa.
18 "Idé-idé luk ngelagkan awanneh, idi ngaweh lun baken teh, ieh pasét peh; idi lemulun luk ngaweh decur luk ligkan deléi ineh idi ieh pana' pasét teh.
19 "Inan seburur lun do'; idi ieh ngayung ku kibung luk sia' merirem idi kibung luk mesalud, idi mulun dengan do' anid-anid aco.
20 Inan teh seburur lun masi' luk mebaké, ngadanneh Lasarus, telubid munung tanga' lun do' ineh.
21 Idi ieh melili ku areg nuba' luk luun téng lun do' ineh; idi uko' pana' macing ngil bakéneh ineh.
22 Idi na mio ratnan ineh lemulun luk mutuh usin ineh pana' naté idi inuit melaikat amé ni Ibrahim. Idi lun do' ineh pana' naté teh, idi ieh tinanem.
23 Ieh pelaba dereh bang Su luk inan Até, idi ieh netukag, idi nenier Ibrahim luk mado idi Lasarus iringneh.
24 Idi ieh nengitang, keburi'neh, 'O tamanku Ibrahim! Méi' negku, idi ngecuk Lasarus amé' negku idi ngerereb paped bua' ticu'neh bang abpa', idi ngeteneb dila'ku ngaceku ui pelaba dereh bang apui ini.'
25 Iamo' kebala Ibrahim, 'O anakku, do' ngerawé, iko pangeh nengalap luk do' kareb iko mulun, idi Lasarus ini nengalap dereh; iamo' nekini ieh inubuk peh, iamo' iko pidereh peh.
26 Idi teh arang muyuh dengan kai inan aceh lubang luk rayeh, pad lemulun rat ieni luk sikal amé' déi' na miak, idi lemulun rat déi' pana' na miak guta amé' nekai.'
27 Idi keburi' lun do' ineh, 'Ngaceku ineh, ui mutuh namu ngecuk neneh amé' ruma' tamanku,
28 ngaceku ui inan limeh kinanak deléi; do' ieh maré kali' kuandeh, pad ideh na miak semuet bang dereh ini.'
29 Iamo' kebala Ibrahim, 'Ideh inan surat Musa idi nabi-nabi pana', do' ideh maya' ineh.'
30 Idi keburi' lun do' ineh, 'Na ineh petap, O tamanku Ibrahim, iamo' kudeng seburur lemulun rat arang lun naté amé' nedeh, kali' rungen ideh uren.'
31 Iamo' kebala Ibrahim, 'Kudeng ideh na sikal ninger surat Musa idi nabi-nabi, meluun teh ideh na miak mubuk kudeng seburur lemulun tumui rat arang lun naté pana'.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA