Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Paulus de 'o Silas manga do-dagi yosigila yaboa 'o Amfipolis de 'o Apoloniade, so yototara 'o Tesalonikako. Ge'enaka dau 'o Yahudioka manga lo-lomu ma woa.

² So 'o Paulus mita wotagi ma lo-lomu ma woaka ge'ena, 'isoka biasau wodiai nako la naga 'o Yahudioka manga lo-lomu ma woa moi. Ge'enaka de 'una de 'o nyawa-nyawa ge'enaka dau gee 'o dibangi yomakakula ma ngale 'o Buku 'Itebi-tebini ma bo-bula. 'Una wodiai koge'ena Pomaoma-omasa ma Wange ma sa'angeno.

³ Moteke ma bukuoka ma bo-bula 'una wosiwaiti de wosidumutu 'ato ma Koana Wiiri-iriki 'o Nyawa Wosilaha-laha gee ma Jo'oungu ma Dutu wosijajiokau salingou wosangisara deika womomikoli ngaro wosongenukou ma. 'O Paulus wongose, "'O Yesus gee ngoi tinisiha-habari nginika, 'unau ge'ena ma Koana Wosilaha-laha gee ma Jo'oungu ma Dutu wosijajiokau."

⁴ Yamuruo naga yongaku so yakimoteke 'o Paulus de 'o Silas; de ge'ena dau ma dodaka mita 'o Yunanioka manga gudai gee ma Jo'oungu ma Dutuka wisingou-ngounu, de mita manga gudai 'o nge-ngeweka gee 'o nyawa yakiho-horomati.

⁵ Ma 'o Yahudioka manga singina 'isiri, so 'o nyawa yopa-paradiduka yakisigaro yosigoko manga bolu moi ma ngale yotigi-tigi. Ge'enaka de 'ona yoruahe ma kota ge'ena yasuluunuku de yodingika wongaku-ngaku wimoi wi ronga 'o Yason 'awi woa ma ngale yakinonu 'o Paulus de 'o Silas, sababu 'ona yomau yaki'asa yakisitaari 'o nyawa yoku-kudaika.

⁶ Ma gee koyakimakewa 'o Paulus de 'o Silas, de 'o Yason de 'o nyawa 'iregu yongaku-ngaku yamuruo naga gee yaki'asa yopa-paretaka ge'ena ma kotaka. De yosigaso-gasoko yongose 'ato, "'O nyawa no'ona yoruahe kiaka naga bato! De ne'ena naga to ngone nanga kotaka mita yoboanou,

⁷ de 'o Yason wakika'elinou wi woaka. 'Ona yoodumu yaparenokau 'o Kaisar wi hukumu, sababu yongose 'ato ma Koana wimoiosi naga wi ronga 'o Yesus."

⁸ Koge'ena yongose so ma kawasa de 'o nyawa yola-laagomo ma kotaka ge'ena yoruahe.

⁹ Ge'enaka de yopa-pareta go'ona yosuloko 'o Yason de 'iregu yongaku-ngaku gee yofangu la yakisisupu. Ge'ena 'iduanga 'asa deika yakipidili.

¹⁰ Ge'ena ma obiruku yongaku-ngaku 'o Tesalonika ma kotaka gee yosuloko 'o Paulus de 'o Silas yosikaoko 'o Bereako. Kayototaroko de yotagi 'o Yahudioka manga lo-lomu ma woaka.

¹¹ 'O Bereaka 'ona 'ifoloi manga di-dibangi 'ipelenga ngaro de 'o Tesalonikaka ma. 'Ona yoduaka yosigisene 'o Yesus wi habari. De 'o wange yosinoi-noimi 'o Buku 'Itebi-tebini yolega ma diai la yanako 'o Paulus wi do-dotoko ge'ena yadaene bolo ko'uwa.

¹² 'O Yahudioka gee 'o Bereaka yomanoa-noa manga gudai yongaku 'o Yesusika, de 'o Yunanioka ma nau-nauru de ma nge-ngeweka gee yakiho-horomati mita manga gudai yongaku.

¹³ 'O Yahudioka ma nyawa gee 'o Tesalonikaka yomanoa-noa yo'isene 'ato ma Jo'oungu ma Dutu wi demo 'o Paulus wosihabari 'o Bereaka, de yaoko 'o Bereako yakisisau-sauku so ma rai manga singina 'isusa.

¹⁴ 'O Berea ma nyawa yosijai-jai 'o Paulus wi'otaokau dina 'o ngo'otiri yosipusu-pusuku ma ngiisa, ma 'o Silas de 'o Timotius 'ona kage'ena ma kotaka.

¹⁵ 'O Atenaka wisitotarie 'asa de yolio, de 'o Paulus wobesesongo 'ato 'o Silas de 'o Timotius yomataitie.

¹⁶ 'O Paulus wakida-dadanuosi 'o Silas de 'o Timotius 'o Atenaka, de wi singina 'isusa sababu wamake ma kotaka ge'ena 'o barahala ma woa 'ikudai.

¹⁷ So ma rai 'o lo-lomu ma woaka yomasikadibangi de 'o Yahudioka de 'o nyawa 'iregu ma Jo'oungu ma Dutuka wisuba-suba ge'enaka dau gee. Koge'enali mita 'o pasaroka 'o wange 'isinoimi 'o dibangi yomakakula ma ngale 'o Yesus 'awi habari de 'o nyawa-nyawa ge'enaka dau gee.

¹⁸ 'O Epikuros de 'o Stoa ma guru-guru mita yomakasango de de 'una. De munuka kayongosekau, "'O nyawa nu'una 'okia wanako? Kawo'urudetoro duga ma ko 'okiawa wosikanako!" Munukali gee yongose, "Poilia 'una wosihabari 'o nyawa 'iregu manga gomanga ma dutu." 'Ona koge'ena yongose sababu 'o Paulus wobi-bicara ma ngale 'o Yesus de mita gee wosongenukou de womomikoli.

¹⁹ Ge'enaka de 'o Paulus wi'asa 'o lo-lomuka 'o Areopagus ma gigie ma dekuoka. Ge'enaka de kayongosekau 'unaka, "Ngomi miomau mianako 'ani do-dotoko ma sungi gee nositota-totara.

²⁰ Sababu ngona nosidemo 'okia naga gee mio'isenika miohera-herangi. Ge'enau so ngomi miomau mianako ma ngale."

²¹ (Sababu 'o Atena ma nyawa de 'o nyawa ma dudunino yomanoa-noa ge'enaka gee, yoduaka kayomaogo-ogoruwa yosigisene de yosibi-bicara 'o di-dibangi ma sungi-sungi.)

²² Gee 'o Paulus woma'okode 'o nyawa yomalomu-lomuno manga bionoka 'o Areopagusoka de kawongosekau, "He, 'o Atenaka ma nyawa! Naga 'o sagala moioka tamakeka ngini posironga de niamoteoka 'ania goma-gomanga ma dutu.

²³ Sababu gee toki-kiloliti 'ania kota de nia barahala ma woa tokakalega-lega, de tamake mita 'o su-suba ma ngii ngai moi 'isilefoka, 'Ne'enaka posuba-suba ma Jo'oungu ma Dutuka gee kopowinako-nakowasi!' Aa! Ma Jo'oungu ma Dutu gee winisuba-suba ma kowininako-nakowasi, gu'unau ngoi tinisidemo nginika.

²⁴ Ma Jo'oungu ma Dutu gee wosidadi-dadi 'o dunia de ma doda 'iodumu, gu'unau ma Jou 'o sorogaaka de 'o duniaka. 'Una kowomanoawa 'o barahala ma woaka gee ka 'o nyawa yodi-diaiku.

²⁵ 'Una mita kowakaranawa ngone powiriwo 'isoka kogee wisidukurangi, ma 'ena ngone po'ahu de poomasa, de nanga kia sonaa ge'ena 'iodumu ka 'unaka de yaino.

²⁶ Ka 'o nyawa wimoino 'una wadiai 'o soana 'ila-laagomo de wakisuloko 'o duniaka yomasi'omangika. 'Unau ge'ena mita wosito-togumukau ma sirasi, muruoka de kiaka 'idadi 'o nyawa yo'ahu.

²⁷ Ma Jo'oungu ma Dutu koge'ena wodiai, la 'o nyawa winonu 'una. Tanu wimake gee winonu de. Ma ma gou-goungu ma Jo'oungu ma Dutu kowonakurutikawa, ma 'una naga ngoneka.

²⁸ 'Isoka gee 'o nyawa yongosekau, 'Ngone po'ahu, pomaitiri, de pogogere 'o duniaka ne'ena, sababu to 'una wi kuasa.' Kaimatero mita de yamuruo naga nia dolabololo ma betongo yodi-diai. 'Ona yongose 'ato, 'Ngone poodumu ge'ena to 'una 'awi ngowa-ngowaka!'

²⁹ Aa! Sababu ngone ne'ena ma Jo'oungu ma Dutu wi ngowa-ngowaka, ngone koidadiwa pongose 'ato ma Jo'oungu ma Dutu kaimatero de 'o patongo 'o guraci bolo 'o saaka, bolo gee 'o teto 'o nyawa yadiaiku moteke to 'ona manga barija.

³⁰ So to ngone nanga haga-haga ge'ena ma Jo'oungu ma Dutu kowongano-nganonuawau. Ma ne'ena 'una wosuloko 'o nyawa 'iodumu 'o duniaka gee yomaogoro 'o sowono yodiai de yolio 'unaka.

³¹ Sababu 'una wosito-togumokau ma 'orasi ma ngale wahakimi 'o nyawa 'o duniaka ne'ena moteke ma diai. Ma manarama ge'ena dua 'asa wimoi ma Jo'oungu ma Dutu Wiiri-iriokau wa'ao. De ma dumutu la 'o nyawa 'iodumu yanako ge'ena, so ma Jo'oungu ma Dutu wisimomiokau 'o nyawa gu'una ngaro wosongenokau ma!"

³² 'O nyawa go'ona gee yogi'isenoka 'ato 'o nyawa yosonge-songenokau yo'ahuoli, de munuka wisi'iete 'o Paulusika. Ma munuka kayongosekau, "Ngomi mioduaka dua kanobi-bicarasi, 'Esa moi, ma ngale ne'ena."

³³ Ge'enaka de 'o Paulus wosupuokau 'o lo-lomuoka ge'ena.

³⁴ Ma munuka widomoteoka 'o Paulus de yongaku 'o Yesusika, 'ona ge'ena la: 'O Dionisius 'o Areopagus ma hakimi moi, de mimoi mi ronga ngo Damaris, de yamuruosi naga.

Kisah Para Rasul

Video Kisah Para Rasul 17

Ikuti Kami:

KONTAK | PARTISIPASI | DONASI