Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Paulus dait Silas ngelanjutang kelampanne langan Ampipolis, dait Apolonia, terus dateng lẽq Tesalonika. Lẽq derike araq balẽ ibadah dengan Yahudi.

² Make Paulus ẽndah lumbar ojok balẽ ibadah nike -- maraq saq biase ie laksaneang -- terus ie pade saling tukah pendapet kance dengan-dengan lẽq derike mengenai ayat-ayat Kitab Suci. Ie laksaneang nike telu jelo Sabat beturut-turut.

³ Siq dasar ayat-ayat Kitab Suci ie jelasang dait buktiang bahwe Almasih saq tejanjiqang siq Allah harus menderite dait teidupang malik lẽman ninggal. Basen Paulus, "Deside Isa saq tiang beriteang tipaq side nike, Almasih saq tejanjiqang."

⁴ Araq pire dengan jari percaye, terus turut Paulus dait Silas, maraq nike ẽndah luwẽq dengan bangse-bangse lain saq takut lẽq Allah, dait luwẽq malik dengan-dengan nine saq tehormatin.

⁵ Laguq dengan-dengan Yahudi talon atẽ. Ie pade ngempoh dengan-dengan jahat saq begerame lẽq peken, terus ie pade ngorayang lẽq selapuq kote nike dait nyerbu balẽ sopoq dengan percaye aranne Yason, jari boyaq Paulus dait Silas, sẽngaq ie pade mẽlẽ jauq Paulus dait Silas sugul ngadep dengan luwẽq.

⁶ Laguq sewaktu ie pade ndẽq ndait Paulus dait Silas, ie pade ngoros Yason dait pire dengan percaye lainne ojok arepan pejabat-pejabat kote nike. Ie pade bekuih, "Dengan-dengan niki ngorayang lẽq mbẽ-mbẽ! Mangkin kotente ẽndah tedatengin siq ie pade,

⁷ dait Yason sampun nerimaq ie pade lẽq balẽne. Ie pade ngelanggar aturan-aturan Kaisar Roma, sẽngaq ie pade bebase bahwe araq malik raje lain saq bepesẽngan Deside Isa."

⁸ Siq ucapan-ucapanne nike, ie pade miaq dengan luwẽq dait pare pejabat kote nike jari osah.

⁹ Laguq sesampun ie pade mauq jaminan lẽman Yason dait lẽman semeton-semeton seiman lainne, make ie pade telepas.

¹⁰ Lẽq kelem nike dengan-dengan percaye lẽq kote nike, suruq Paulus dait Silas ojok Berea. Sesampun dateng lẽq derike, Paulus dait Silas lumbar ojok balẽ ibadah Yahudi.

¹¹ Dengan-dengan lẽq Berea solahan atẽne tebanding dengan-dengan lẽq Tesalonika. Seneng gati angen ie pade dengahang berite mengenai Deside Isa, dait sebilang jelo ie pade berajah Kitab Suci adẽqne nenaoq napi pengajahan Paulus nike kenaq atao ndẽq.

¹² Luwẽq lẽq antare ie pade saq percaye lẽq Deside Isa, dait ndẽqne sekediq ẽndah dengan-dengan Yunani saq tehormatin saq percaye; nine atao mame.

¹³ Waktu dengan-dengan Yahudi lẽq Tesalonika dengah bahwe Paulus nyampẽang ẽndah Manik Allah lẽq Berea, ie pade dateng ẽndah ojok Berea ngasut dengan-dengan lẽq derike dait miaq ie pade osah.

¹⁴ Becat-becat semeton-semeton lẽq Berea nike ngatong Paulus ojok pesisi, laguq Silas dait Timotius tetep ndot lẽq kote nike.

¹⁵ Sesampun ie pade ngatong Paulus jangke dateng Atena, semeton-semeton nike tulak ojok Berea dait jauq pesen lẽman Paulus adẽq Silas dait Timotius becat-becat boyaq ie.

¹⁶ Sewaktu Paulus kenyeke ngantih Silas dait Timotius lẽq Atena, asẽq gati angenne serioq kote nike penoq siq berhale-berhale.

¹⁷ Keranaq nike lẽq balẽ ibadah, Paulus saling tukah pendapet kance dengan-dengan Yahudi dait dengan-dengan lain saq nyembah Allah lẽq derike. Maraq nike ẽndah lẽq peken-peken, sebilang jelo ie saling tukah pendapet kance sebilang dengan saq araq lẽq derike.

¹⁸ Guru-guru lẽman aliran Epikuros dait aliran Stoa bedebat ẽndah kance ie. Pire dengan lẽman ie pade bebase, "Napi saq mẽlẽ teraosang siq dengan niki? Penenaoqne cume sekediq, laguq ie luwẽq raos!" Dengan-dengan saq lain bebase, "Ruene ie beriteang mengenai dẽwe-dẽwe bangse lain." Ie pade bebase maraq nike, lantaran Paulus bebaos mengenai Deside Isa dait mengenai idup malik sesampun ninggal.

¹⁹ Terus ie pade jauq Paulus ngadep sidang Areopagus. Lẽq derike ie pade beketuan tipaq Paulus, "Tiang pade melẽt nenaoq pengajahan baru saq side beriteang nike.

²⁰ Sẽngaq side nyampẽang hal-hal saq lain gati kedengahanne lẽq kentok tiang pade. Keranaq nike tiang pade melẽt nenaoq artine."

²¹ (Sẽngaq selapuq dengan Atena dait dengan-dengan pendateng saq ndot lẽq derike seneng gati kadu sise waktune jari dengahang dait ngeraosang berite-berite saq paling baru.)

²² Sewaktu Paulus nganjeng lẽq julu dengan-dengan saq bekumpul lẽq Areopagus nike, Paulus bebase, "Hai dengan-dengan Atena! Tiang serioq bahwe dalem selapuq hal side taat beribadah tipaq dẽwe-dẽwe.

²³ Sẽngaq waktu tiang lampaq-lampaq lẽq sekiter kotende, sambil merhatiang taoq-taoqde sembahyang, tiang serioq ẽndah sopoq mẽje taoq kurban; lẽq derike araq tetulis, 'Tipaq Allah Saq Nẽnten Tekenal'. Allah saq side pade sembah laguq ndẽq side pade kenal nike, Ie saq tiang beriteang tipaq side pade.

²⁴ Allah saq cipteang dunie niki dait selapuq isine, Ie Tuhan penguase langit dait gumi. Ie nẽnten meneng lẽq dalem balẽ-balẽ dẽwe saq tepiaq siq manusie.

²⁵ Ie ẽndah nẽnten merluang bantuan manusie, sẽngaq Ie saq ngicanin idup dait embok dait selapuqne tipaq manusie.

²⁶ Lẽman sopoq manusie Ie jariang selapuq bangse dait mrẽntahang ie pade ndot lẽq seantẽro gumi. Ie ẽndah saq nentuang lẽman penembẽqne, piran dait lẽq mbẽ ie pade kanggo idup.

²⁷ Allah ngelaksaneang nike adẽq ie pade boyaq Ie. Mudah-mudahan ie pade bedait kance Allah lẽq waktu ie pade boyaq Ie. Laguq setetune Allah nẽnten jaoq lẽman ite sopoq-sopoq.

²⁸ Maraq saq ite dengah lẽman dengan, 'Ite idup dait bau ngeruit dait araq lẽq gumi niki lantaran kuase Allah.' Pade ẽndah kance napi saq teucapang siq penyair-penyairde. Basen ie pade, 'Ite niki bangse saq tejariang siq Allah ẽndah.'

²⁹ Sẽngaq ite niki bangse saq tejariang siq Allah, ite ndẽq kanggo nganggep Allah pade maraq tetato saq tepiaq lẽman emas atao perak atao batu saq tepiaq menurut kepinteran manusie.

³⁰ Selapuq perbuatante saq bodo nike sampun telupaqang siq Allah, laguq mangkin Allah mrẽntahang selapuq dengan lẽq seantẽro dunie betobat lẽman dose-dose ie pade.

³¹ Sẽngaq Allah sampun nentuang sopoq waktu jari ngadilin seantẽro dunie secare adil. Tugas nike gen telaksaneang siq sopoq dengan saq sampun tetentuang siq Allah lẽq hal nike. Dait adẽq selapuq dengan yakin lẽq hal nike, Allah sampun ngidupang malik dengan nike lẽman ninggal!"

³² Waktu dengan-dengan nike dengah mengenai idup malik sesampun ninggal, araq lẽman ie pade saq kelelẽqang Paulus. Araq ẽndah saq bebase, "Tiang pade melẽt dengah side bebaos malik mengenai hal niki lẽq waktu saq lain."

³³ Beterus Paulus bilin ie pade.

³⁴ Laguq araq lẽq antare ie pade saq bepihak lẽq Paulus dait percaye lẽq Deside Isa, lẽq antarene: Dionisius, anggote majelis Areopagus dait sopoq dengan nine aranne Damaris, dait araq pire dengan malik.

Kisah Para Rasul

Video Kisah Para Rasul 17

Ikuti Kami:

KONTAK | PARTISIPASI | DONASI