Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kalak enda nerusken perdalanenna arah Ampipolis ras Apolonia jenari seh ia i Tesalonika. I Tesalonika lit sada rumah persembahen kalak Jahudi.

² Bagi biasana, bengket Paulus ku rumah persembahen kalak Jahudi. Telu kali wari Sabat erturut-turut ituriken Paulus ras kalak e bagin-bagin Pustaka Si Badia.

³ Iterangken Paulus bagin-bagin Pustaka Si Badia e janah arah e ibuktikenna maka Raja si ipadanken Dibata e la banci lang ngenanami kiniseran janah keke i bas si mate nari. Iterusken Paulus tole ngerana nina, "Jesus si kucakapken man bandu enda, Ia me Raja si ipadanken Dibata."

⁴ Piga-piga i bas kalak e, tek dingen igabungkenna bana ras Paulus ras Silas. Kalak Junani si nembah man Dibatana pe nterem tek man Jesus dingen kalak e pe nggabungken bana ras Paulus ras Silas; i bas si e subuk pe diberu-diberu si mbelin pengaruhna i tengah masarakat.

⁵ Tapi cian ate kalak Jahudi ngidah si enda. Emaka ipepulungna kalak si gutul-gutul i tiga nari guna ngguntari. Jenari gujuh ibahanna i belang-belang kuta e. Iserbuna ku rumah Jason guna nangkap Paulus ras Silas, sabap atena maba Paulus ras Silas ku lebe-lebe kalak si nterem.

⁶ Tapi perbahan la ia jumpa ras Paulus bage pe Silas emaka isarenna Jason ras piga-piga kalak si nggo tek man Jesus. Ibabana kalak enda ngadap man pengulu-pengulu, janah nina, "Kalak si ngguntari i japa pe genduari nggo seh ku jenda,

⁷ janah Jason ngaloken ia kesilang i bas rumahna. Kerina ia nggo ngelawan undang-undang si ibereken Kaisar Roma man banta. Ikatakenna maka lit raja si deban, gelarna Jesus."

⁸ Megi kata enda gulut ukur kalak si nterem ras pengulu-pengulu.

⁹ Kenca isuruh pengulu-pengulu si Jason ras senina-senina e nggalar duit jaminen emaka ia ipulahi.

¹⁰ Kenca wari nggo gelap perpulungen Tesalonika minter nuruh Paulus ras Silas berkat ku Berea. Kenca seh i Berea lawes ia ku rumah persembahen kalak Jahudi.

¹¹ Ulin ukur kalak Jahudi si i kuta Berea asangken kalak Jahudi si i kuta Tesalonika. Kalak Jahudi si i kuta Berea mesikel kal megiken kai si ikataken Paulus. Tep-tep wari ipelajarina Pustaka Si Badia pepayo ntah tuhu kin si iajarken Paulus e.

¹² Nterem kalak si i je jadi tek. I bas si e nterem pe kalak Junani subuk dilaki bage pe diberu-diberu si ihamati kalak.

¹³ Tapi kenca ibegi kalak Jahudi si ringan i Tesalonika maka i Berea pe nggo iberitaken Paulus Kata Dibata, reh ia ku Berea. Iajuk-ajukna kalak si nterem gelah ngguntari.

¹⁴ Emaka minter isuruh perpulungen e Paulus lawes ku pelabuhen. Silas ras Timotius tading i Berea.

¹⁵ Piga-piga kalak anggota perpulungen e nemani Paulus seh ku Aten. Jenari mulihken ia ku Berea alu maba tenah i bas Paulus nari gelah Silas ras Timotius pedas reh ndahi ia.

¹⁶ Asum Paulus nima-nimai kerehen Silas ras Timotius i Aten, nembeh kal atena sabap melala idahna patung-patung i kuta e.

¹⁷ Perbahan si e ngerana ia ras kalak Jahudi bage pe ras kalak si deban si ikut nembah man Dibata i rumah persembahen. Bage pe tep-tep wari ngerana ia i tiga ras kalak si mentas, si nggit megiken ia.

¹⁸ Reh pe piga-piga guru i bas golongen Epikurea ras guru-guru i bas golongen Setoa nari ersoal ras Paulus. Janah lit kalak ngerana ncakapken Paulus nina, "Kai nge si ikataken tukang koyok ena? Kai pe labo lit pemetehna." Nina ka deba, "Tempa-tempa ia meritaken dua dibata si asing." Ikataken kalak enda bage sabap ituriken Paulus kerna Jesus ras kerna kekeken.

¹⁹ Emaka ibabana Paulus ku sidang Areopagus jenari nina, "Banci iturikenndu man kami, kuga kin pengajaren si mbaru si iajarkenndu e?

²⁰ Piga-piga si iturikenndu e langa pernah ibegi kami, emaka merincuh kami metehsa."

²¹ (Kalak Aten bage pe kalak si deban si ringan i Kota Aten nggit kal engkeriken wari-warina guna nuriken ras megi-megi kerna kai-kai si mbaru.)

²² Tedis Paulus i lebe-lebe sidang Areopagus jenari nina, "O kalak Aten! Nggo kuidah maka kam kalak tutus tuhu-tuhu i bas agama.

²³ Sabap asum aku erdalan-dalan i kutandu enda, janah asum aku ngenennen inganndu ersembah man dibata, kuidah sada ingan persembahen si lit tulisenna, 'Man Dibata Si La Itandai'. Dage Dibata si isembahndu, si la itandaindu e, eme ateku ku petandaken man bandu genduari.

²⁴ Dibata si nggo njadiken doni ras isina, Ia me Tuhan si engkuasai langit ras doni. Janah Ia labo ringan i bas ingan sembah-sembahen si ibahan manusia.

²⁵ Labo perban lit si kurang i bas Ia maka IalokenNa persembahen manusia, sabap Ia jine kap mereken kegeluhen, kesah, ras kerina keperlun manusia.

²⁶ I bas sekalak jelma nari nggo IjadikenNa kerina bangsa manusia si ngiani doni enda. Ope denga ijadiken Dibata bangsa-bangsa manusia, nggo leben ItetapkenNa ndigan bangsa-bangsa manusia e nggeluh janah i ja ia ringan.

²⁷ Si enda IbahanNa gelah idarami manusia e Ia, gelah alu dadap-dadap banci idat manusia e Ia. Tapi si tuhuna Dibata e labo ndauh i bas kita nari sekalak-sekalak.

²⁸ Bagi si ikataken sekalak jelma, 'I bas Ia kita nggeluh, muit, dingen lit.' Bage pe bagi si ikataken piga-piga kalak penyair i tengah-tengahndu nari nina, 'Kita pe KesusurenNa kap.'

²⁹ Dage adi kita kesusuren Dibata, ula min siakap maka Dibata e bali ras patung emas ntah pirak, ntah patung batu si ibahan tukang si beluh.

³⁰ I bas paksa si nggo lepas, asum manusia langa erpemeteh kerna Ia, Dibata tutup mata. Tapi genduari isuruh Dibata kerina manusia i belang-belang doni enda gelah jera.

³¹ Sabap nggo itetapken Dibata maka i bas sada wari IadiliNa me kerina manusia i belang-belang doni enda alu bujur arah sekalak si nggo IpilihNa. Gelah manusia tek kerna si e, nggo IpekekeNa kalak si IpilihNa e i bas si mate nari."

³² Asum ibegi kalak e Paulus ngerana kerna si mate nggeluh mulihi, piga-piga kalak i bas si megi e nguncimi Paulus. Tapi lit deba si ngataken, "Merincuh kami gelah iturikenndu tole kerna si enda man kami."

³³ Emaka lawes Paulus nadingken kalak ndai.

³⁴ Tapi lit piga-piga kalak tek dingen ngikutken Paulus. Piga-piga kalak i bas si nggo tek e subuk Dionisius, eme sekalak anggota sidang Areopagus, ras sekalak diberu, gelarna Damaris, bage pe piga-piga kalak si debanna.

Kisah Para Rasul

Video Kisah Para Rasul 17

Ikuti Kami:

KONTAK | PARTISIPASI | DONASI