Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Didueh nenalan lemaba Ampipolis idi Apolonia, idi nacing déi' Tesalonika su luk inan aceh ruma' sembayang lun Yahudi.
2 Idi maya' kudeng luk pekalai, Paulus iné' tebubpun bang ruma' sembayang ineh. Idi bang teluh Aco luk inan Mudeng ieh nepekitun dengan lemulun ineh ratnan Surat Allah,
3 dengan nemada' idi nengelio ratnan Keristus na miak na medereh idi tumui rat arang lun naté, keburi'neh, "Yésus luk ui mada' kuan muyuh, Ieh ineh Keristus."
4 Idi inan sebuang rat arangdeh luk manu pad ideh nemaya' ni Paulus idi Silas. Kudeng ineh teh mula' lun Grika luk sembayang nan Allah, idi teh mula' decur rat arang lun do'.
5 Iamo' lun Yahudi ineh mét niat. Ideh nenguit tuda'-tuda' lemulun luk dat luk nalan mo'-mo' déi' kadai, idi ideh nengamung nelun mula' pad ngagau bawang ineh. Idi nengelibut ruma' Yason idi nenakap rasul-rasul, pian nguit nedidueh remuat kuan lun mula'.
6 Iamo' kareb ideh na nekali' nedidueh, idi ideh nengeruid ni Yason idi tuda'-tuda' kinanak luk baken amé' matun lun rayeh bawang ineh. Idi ideh nengitang, keburi'deh, "lemulun ini pangeh nengagau iapeh-iapeh pana'! Nekini ideh pangeh nacing bawang tau;
7 idi Yason pangeh nengasa' nedeh. Amungdeh ineh ngelaba ukum raca' Rum, kerburi'deh, inan teh raca' luk baken, ngadanNeh Yésus."
8 Idi lun mula' dengan lun rayeh-rayeh bawang ineh negagap ku bala ineh.
9 Idi lun rayeh-rayeh nengalap usin rat ni Yason idi lun baken teh, pad ideh nemuit nedeh.
10 Kareb medacem kinanak-kinanak ineh nengecuk Paulus idi Silas amé' Beria. Kareb didueh nacing déi', idi petacu didueh nesemuet bang ruma' sembayang lun Yahudi.
11 Idi déi' lemulun meluun do' terawé ratnan lun Tesalonika. Ideh pangeh nengalap bala ineh dengan mawang niatdeh, idi anid-anid aco ideh nengelio Surat Allah, pian kali' kudeng matu amung luk bila Paulus ineh.
12 Mula' rat arangdeh manu, kudeng ineh teh rat arang decur lun Grika luk lun do'. Idi mula deléi lun Grika manu teh.
13 Iamo' kareb lun Yahudi luk déi' Tesalonika nekali' bala Allah ineh pangeh bida' Paulus déi' Beria pana', idi ideh iné' déi' pian ngagau nelun mula' ineh.
14 Idi kinanak-kinanak ineh petacu nengecuk Paulus nalan amé' tangeb abpa' rayeh, iamo' Silas idi Timotius tudo déi' Beria.
15 Iamo' lemulun luk nenguit ni Paulus nenated neneh macing déi' Atina. Pangeh ineh ideh nelemubed iné' Beria dengan bala rat ni Paulus kuan Silas idi Timotius, neteng nedidueh amé' neneh dengan miket.
16 Kareb Paulus nenganét ni Silas idi Timotius déi' Atina, idi niatneh mesusa' nenier bawang ineh mepanu' ku akang.
17 Idi ieh nepekitun bang ruma' sembayang dengan lun Yahudi idi amung lemulun luk sembayang nan Allah, idi teh déi' luun natad pana' anid-anid aco dengan lemulun luk lemaba déi'.
18 Idi inan teh tuda'-tuda' guru lun Epikuri idi Stoiki nepesaad neneh. Idi inan teh luk nepebala, "Anunké luk pian belén lun ini luk mesuki tang?" Iamo' lun baken nepebala, "Ayuneh lemulun ini mada' ratnan allah-allah lun pupu baken." Ideh nepebala kudeng ineh ngaceku Paulus nemada' ratnan Yésus idi tuiNeh.
19 Idi ideh nenguit ni Paulus amé' pa atun lun luk pegayam déi' Ariopagus, keburi'deh, "Miakké kai kali' amung-amung bada' luk mebaruh luk bida'mu ini?
20 Iko nguit bala luk inan kai mawa, idi kai sikal kali' ilung bala ineh."
21 (Ngaceku amung-amung lun Atina idi lun sakai luk netudo déi' pana' na pian ku luk baken, iamo' ideh pebala idi ninger anun-anun luk mebaruh mo'.)
22 Paulus netuped luun uned Ariopagus ineh idi nepebala, "O lun Atina, bang amung-amung lawé muyuh, ui kali' nemuyuh lun luk ngerawé tu-tu ratnan sembayang muyuh.
23 Ngaceku kareb ui nenalan idi nenier amung luk inan muyuh sembayang, ui nekali' aceh bubpun luk inan ayud luunneh kudeng ini, 'Kuan Allah luk na kai nekali'.' Ngaceku ineh luk inan muyuh sembayang dengan na nekali' miak badénku nemuyuh.
24 Allah luk nemudut tana' ini idi amung uangneh, Ieh ineh Tuhan tana' idi langit. Idi Ieh na miak tudo bang ruma' luk pinudut ticu'.
25 Idi Allah na isa' ticu' lemulun, ngaceku na Ieh masi' ratnan anun-anun, iamo' Ieh sebuleng luk maré ulun idi niat idi amung-amung luk baken teh kuan amung lemulun,
26 Idi ratnan seburur lemulun Ieh nemudut amung-amung pupu, idi nenganau' nedeh tudo aput tana'. Ieh sebuleng nengeletep atun, karebdeh, idi su lakan luk inandeh tudo,
27 pad ideh nakap Allah idi merapet miak ideh mekakap Neneh pad ideh ngalap Neneh, sagan pana' Ieh na mado ratnan anid-anid burur tau,
28 ngaceku pangeh bila lun, 'Bang Neneh tau mudeng idi sigio idi mulun teh.' Maya' kudeng luk inayud tuda'-tuda' lun mileh nulu rat arang muyuh, 'Tau ini pana' mangun ku anak-anakNeh teh.'
29 Idi ngaceku tau ini anak-anak Allah, na do' tau ngerawé Allah mepad kudeng amas, pirak, batu luk inarit dengan ileh idi terawé lemulun.
30 Idi Allah nepirud ratnan kareb luk mebacé ineh, iamo' nekini amung-amung lemulun iapeh-iapeh pana' icukNeh uren.
31 Ngaceku Ieh pangeh nengeletep seaco luk inanNeh maré ukum luk matu kuan amung tana' ini ratnan Selemulun luk pinili'Neh. Idi bala ini pangeh ginala' Allah kuan amung-amung lemulun, kareb Ieh nenui Lemulun ineh rat arang lun naté."
32 Kareb lemulun ineh neninger ratnan tui lun naté, idi sebuang lemulun sikal situnga; iamo' lun baken nepebala, "Kai sikal ninger namu ratnan ineh sekua' teh."
33 Idi Paulus neburo rat bang gayam ineh.
34 Iamo' inan teh tuda'-tuda' lemulun luk neperurum neneh idi manu teh. Arangdeh iman Dionisius lun Ariopagus, idi seburur decur, ngadanneh Damaris idi lun baken teh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA