Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Latohugõ wofanõ ira Faulo ba Sila latõrõ Gamefipoli awõ Gafolonia ba larugi Desalonika. Ba da'õ so gosali ba niha Yahudi.
2 Mõi Waulo ba gosali andrõ -- si mane si to'õlõ nilaunia na so gosali niha Yahudi -- fahuhuo ia ba niha si so ba da'õ sanandrõsa ba Mbuku Ni'amoni'õ. Tõlu kali luo Sabato ilau zi manõ.
3 Modanedane ba Mbuku Ni'amoni'õ i'ombakha'õ ba i'oroma'õ wa Razo Sangorifi andrõ si no Ifabu'u Lowalangi lõ tola lõ tefakao ba ifuli auri mangawuli moroi ba wa'amate. Imane Faulo, "Yesu nituriaigõgu khõmi, no Ya'ia Razo Sangorifi andrõ nifabu'u."
4 So õsa zi faduhu tõdõ, ba maoso ira la'o'õ Waulo ba Sila; si manõ gõi ato niha Yunani sangata'ufi Lowalangi, ba ato ndra alawe sotõi ni'ata'ufi ba mbanua andrõ.
5 Ba hiza afõkhõ dõdõ niha Yahudi. Lakaoni niha si lõ halõhalõw̃õ ba lala ba tobali ira ngawawa niha samawukaisi. Lafawukaisi zi sagõrõ banua andrõ ba lasuwõ nomo Yaso ba wangalui Faulo ba Sila, bõrõ me omasi ira la'ohe baero Waulo ba Sila fõna niha sato.
6 Ba hiza lõ lasõndra Waulo ba Sila, irege lasõbi Yaso ba samati bõ'õ la'ohe fõna ndra samatõrõ ba mbanua andrõ. Mu'ao ira lamane, "Samawukaisi niha andre gofu heza! Hiza, so ira iada'e ba mbanuada,
7 ba no itema ira Yaso ba nomonia. No sanawõ huku Kaisaro Roma ira, bõrõ me lamane so nasa razo tanõ bõ'õ sotõi Yesu."
8 Tobali dõdõ niha sato awõ ndra samatõrõ ba wehedera andrõ.
9 La'andrõ ira samatõrõ khõ Yaso awõ zamati bõ'õ ena'õ labe'e gefe si tobali lohelohe dõdõ. Aefa da'õ awena la'efa'õ ira.
10 Ba zi bongi da'õ, lafatenge ndra Faulo ba Sila ira samati numalõ ba Mberea. Me larugi da'õ numalõ Waulo ba Sila ba gosali niha Yahudi.
11 Abõlõ sõkhi dõdõ niha Mberea moroi ba niha Desalonika. Si fao fa'omasi lafondrondrongo duria sanandrõsa khõ Yesu, ba ero ma'õkhõ la'alui ba Mbuku Ni'amoni'õ hadia sindruhu wamahaõ Waulo andrõ.
12 Ato ba gotaluara zi faduhu tõdõ khõ Yesu, ba ato gõi ndra salaw̃a ba niha Yunani, zi faduhu tõdõ; he ira alawe ba ira matua gõi.
13 Me larongo niha Yahudi ba Desalonika wa no ituriaigõ daroma li Lowalangi Faulo ba Mberea, tohare ira ba Mberea ba lafawe'e niha irege lõ fa'ahono dõdõra.
14 La'alio'õ lafasao Waulo ba zinga nasi ira talifusõ ba Mberea andrõ. Ba Sila awõ Dimoteo torõi nasa ba mbanua andrõ.
15 Me no lafasao Waulo irugi Atena ba mangawuli ndra talifusõ andrõ ba Mberea la'ohe goroisa Waulo ena'õ la'alio'õ la'o'õ ia ira Sila ba Timoteo.
16 Gasagasa wombaloi Waulo ira Sila ba Timoteo, abu dõdõnia wamaigi banua andrõ safõnu adu.
17 Bõrõ da'õ ba gosali, fahuhuo Waulo khõ ndra niha Yahudi awõ niha tanõ bõ'õ samosumange Lowalangi ba da'õ. Si manõ gõi ba fasa misa, ero ma'õkhõ fahuhuo ia ba niha si so ba da'õ.
18 Ba fada'aw̃a khõnia ndra guruguru Efikuro ba Sitoa. So ba gotaluara zanguma'õ, "Hadia ni'ila niha da'a? Ha ma'ifu wa'atuatuania, ba no ebua sibai mbawania!" So õsa gõi zanguma'õ, "Ituriaigõ lowalangi soi bõ'õ." Law̃aõ da'õ bõrõ, me fahuhuo Waulo sanandrõsa khõ Yesu ba sanandrõsa ba wemaoso moroi ba wa'amate.
19 La'ohe Waulo ba nahia wa'owulora ba Hili Areofage. Ba da'õ lamane khõnia, "Omasi ndra'aga ma'ila wamahaõ si bohou ni'ombakha'õmõ andrõ.
20 Bõrõ me lõ irai marongo tõgi dalingama ni'ombakha'õmõ. Andrõ wa omasi ndra'aga ma'ila hadia geluahania."
21 (Fefu niha ba Atena awõ niha si fatewu ba da'õ omasi lahorigõ ginõtõra ba wamondrongo awõ wamahuhuosi ngawalõ hadia ia zi bohou.)
22 Muzizio Waulo fõna niha sowulo ba Areofage andrõ, imane, "He ya'ami niha Atena! Aboto ba dõdõgu wa no niha samosumange lowalangi ami.
23 Me ufanõrõnõrõ ndra'o ba zi fasui mbanua andre khõmi ba uhaogõ wamaigi nahinahia wangandrõ, ba u'ila sambua nahia wame'e sumange; ba nahia andrõ no musura, 'Khõ Lowalangi si lõ ta'ila.' Lowalangi nifosumangemi da'õ, si lõ mi'ila andrõ, Ya'ia andrõ nituriaigõgu khõmi.
24 Lowalangi sombõi ulidanõ andre awõ nõsinia, Ya'ia Zo'aya sokhõ banua ba ulidanõ. Lõ torõi Ia ba nomo'omo nifazõkhi danga niha.
25 Lõ gõi moguna khõ-Nia wanolo soroi niha, bõrõ me Ya'ia zame'e fa'auri ba hanuhanu awõ fefu ngawalõ hadia ia ba niha.
26 Moroi ba zi samõsa niha Ifazõkhi fefu soi ba Ifatenge ira wangiagõ si sagõrõ ulidanõ. Ya'ia gõi zangahonogõi i'otarai mbõrõta, hawa'ara ba heza auri ira.
27 Ilau fefu da'õ Lowalangi ena'õ la'alui Ia. Ma'atõ falukha ira khõ-Nia ba wangalungaluira Ya'ia andrõ. Sindruhunia lõ arõu Lowalangi moroi khõda zamõsana.
28 Si mane niw̃a'õ niha, 'Auri ita, maliw̃a ita ba so ita ba gulidanõ andre bõrõ wa'abõlõ-Nia.' Si mane niw̃a'õ zanunõ andrõ khõmi gõi. Lamane, 'Ono-Nia fefu ita.'
29 Tobali, bõrõ me ono Lowalangi ita, ba bõi tafaomagõ Lowalangi ba nadu ana'a ma adu firõ ba ma adu kara nifazõkhi dali wa'atuatua niha.
30 No I'olifuagõ Lowalangi ginõtõ wa'abododa andrõ, ba hiza iada'e I'o'ou niha fefu ba zi sagõrõ ulidanõ ena'õ lafalalini gera'erara, larõi horõra.
31 No Ihongõi ginõtõ wanguhuku zi sagõrõ ulidanõ andrõ si fao fanguhuku satulõ. Halõw̃õ andrõ nihalõ niha si no Ifili Lowalangi. Ba ena'õ faduhu dõdõ niha ba da'õ, andrõ wa I'orifi mangawuli Lowalangi niha andrõ moroi ba wa'amate!"
32 Ba me larongo wa tola auri mangawuli moroi ba wa'amate, so ba gotaluara zo'igi'õ Faulo. Ba so gõi zanguma'õ, "Omasi ndra'aga marongo moroi khõu da'e nasa."
33 Ba irõi gowuloa andrõ Faulo.
34 Ba so ba gotaluara zi fao tõdõ khõ Waulo ba si faduhu tõdõ khõ Yesu, ya'ia da'õ: Dionizio, ndrotondroto zohalõw̃õ ba Areofage, ba samõsa ndra alawe sotõi Damari, ba tanõ bõ'õnia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA