Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Paulus no Silas la'ok lakandoo de ala tunga Amfipolis ma Apolonia, boema ala losa Tesalonika. Hataholi Yahudi la uma mamaso na nai ndia boe.

² Boema Paulus neu leo uma mamasok ndia neu sama leo tatao mandoo fai na, metema hapu hataholi Yahudi la uma mamason esa soona, neu fo natukaaafik no hataholi manai sila la, la'eneu Susula Malalao ka isi-liin. Ana tao leondiak iko-iko fai Sabat telu dale na.

³ Ana pake Susula Malalao ka isi-liin fo nafa'da mangalele'do ma ana fe buti nae, Mane Mana Fe So'dak fo Manetualain helu ka, Ana muse doidoso, ma naso'da falik neme mamate sa mai. Paulus nae, "Yesus fo au tui-bengan neu emi ndia, nde Mane Mana Fe So'dak fo nanahelu ka"

⁴ Hataholi de'ubee lamahele, boema ala tunga Paulus no Silas. Leondiak boe, hataholi Yunani mana bii Manetualain makadotok nan seluk bai.

⁵ Tehu hataholi Yahudi la lape'da dalek. Lalo la hataholi mada'baoek manai eno kala lain de lapadedeik hataholi mana tao tasi'bu la nakabubua na. Boema ala mulai tao tasi'bu nai basa kota ndia lala'ena. Leu sapu la hataholi kamahehelek esa na'de Yason uma na fo ala sanga Paulus no Silas, nana ala sanga lo duas leu lataa hataholi makadoto kala.

⁶ Tehu lelek fo ala ta hapu Paulus no Silas fa boema, ala lele'a-loloso Yason ma hataholi kamahehele fe'ek de'ubee leo mana mana paleta fo mana koasa manai kota ndia matan leu. Ala eki ma lae, "Hataholi ia la tao tasi'bu nai basa mamanak lala'ena! De besak ia ala losa ita kota na so,

⁷ de Yason nde sipo kasa nai ndia uman. Da'di sila basa-basas la'olena Kesel Roma nakeketu nala, nana lafa'da lae, bei hapu seluk mane fe'ek esa na'de Yesus."

⁸ No dede'a-kokolak sila la, de ala tao la hataholi makadotok ma mana koasa manai kota ia, ala nggenge la de latataneaok.

⁹ Boema loke Yason no hataholi kamahehele fe'ek sila la bae doik fo besa ka ala po'is.

¹⁰ Le'odaek ndia, hataholi kamahehelek manai kota ndia, ladenu Paulus no Silas leu leo Berea leu. Ala losa naa boema, leu leo hataholi Yahudi la uma mamason dale leu.

¹¹ Hataholi manai Berea la hii lamanene Paulus no Silas tutui-bebengan, lenaheni hataholi Tesalonika la. Lamanene Lamatuak Yesus dede'a-kokolan no namahokok, ma tunga faik ala lees Susula Malalao ka fo ala bubuluk, ade Paulus nanolin sila la tete'e ka do ta.

¹² Sila ba'u ka lamahele Yesus, ma hataholi Yunani nananita-nalelak ba'u ka, nau inak do touk boe, lamahele.

¹³ Lelek fo hataholi Yahudi manai Tesalonika la lamanene lae, Paulus tui-benga Manetualain dede'a-kokolan nai Berea boe, boema sila boeo leu leo Berea leu, de ala dudungu-papau hataholi manai sila la, de dale nala ta tesa-tama fa.

¹⁴ Boema no lai-laik tolanook manai Berea la lo Paulus leo tasi su'u na neu, tehu Silas no Timotius soona, ala leo lahele leme kota ndia.

¹⁵ Lo Paulus losa Atena boema, tolanook sila la fali leo Berea leu. Paulus helus fo leu soona, lafa'da Silas no Timotius fo no lai-laik, duas leu tunga Paulus nai Atena.

¹⁶ Paulus nahani Silas no Timotius mamai na nai Atena, tehu dale na he'di sa, nana nita nai kota ndia dalek, henuk no sosongo-tatango ka.

¹⁷ Hu ndia de nai uma mamaso kala dalek, Paulus natukaaafik no hataholi Yahudi la, ma hataholi kamahehelek neu Manetualai na. Leondiak boe, tunga faik natukaaafik no hataholi manai pasa kala.

¹⁸ Nakabua Epikuro sa mese nala lo nakabua Stoa mese nala boeo, lase'i lo Paulus. Sila hataholin nggelok lae, "Hataholi ia bubuluk beek? Malela nala ka'da faanak mesan, tehu bafa na soona, loa na seli!" Sila hataholin nggelok soona lae, "Me'dan te ana tui-benga leoina fe'e kala nitu lalai nala nde ndia." Ala kokolak lae leondia nana Paulus kokolak la'eneu Yesus, ma la'eneu hataholi a ana mate, tehu naso'da falik.

¹⁹ Boema lo Paulus leo mamana nakabuak esa nai Pupuku Areopagus lain neu. Ala losa boema lafa'da Paulus lae, "Ami hii bubuluk nanoli beuk fo o tui-bengak ndia.

²⁰ Nana o kokolak dede'a kala, nenenen soona nanoli mata beuk ndia. Hu ndia de ami nau malelak sosoa-ndandaan."

²¹ Nana basa hataholi Atena la lo hataholi manamai leo nai kota ndia, ala hii ka'da labasa le'do fai nala soaneu lamanene ma ala kokolak la'eneu dede'a beuk.

²² Lelek fo Paulus napadeik neu hataholi sila mata nala boema ana kokolak nae, "Hei hataholi Atena la lemin! Au ita nai basa dede'ak lala'ena dalek, emi hataholi maagama kala,

²³ Nana nai lelek fo au la'ok okofefeo emi kota ma de au taoafik neu emi mamana huhule-haladoim, boema au ita mamana tutunu-hohotuk esa boe. Nai mamanak ndia nanasulak nae, 'Neu Manetualain Fo Ta Nananalela ka fa.' Naa, Manetualain emi fo sene-do'o kana tehu emi ta malela kana ndia nde, au tui-bengan neu emi a.

²⁴ Manetualain fo mana makadada'dik daebafak ia no basa oe isin lala'ena. Ndia nde bee na Lamatuak neu lalai a no daebafa ka. Ana ta leo nai nitu lalais ala uman, fo hataholi daebafa ka tao ka fa.

²⁵ Ndia boeo ta paluu hataholi daebafa ka tutulu-fafalin fa, nana Ndia nde mana fe maso'da ka, ani hahae ka, ma basa hata lala'ena neu hataholi daebafa ka.

²⁶ Neme ka'da hataholi esa mesa kana de nakadada'dik basa leoina lala'ena, boema nadenus fo ala leo lai basa daebafa ka lala'ena. Ndia boeo nde mana naketu basa neme makasososan mai a, faihi'da, ma nai bee, hataholi daebafa ka bole naso'da.

²⁷ Manetualain tao dede'ak ndia fo ela hataholi daebafa ka sangan. Sa'di leo bee fo latongo lon nai lelek fo ala sanga nana. Tehu tunga ndoo na, Manetualain ta doo ka neme ita esa-esak mai fa.

²⁸ Sama leo hataholi la lafa'da basan lae, 'Ita taso'da ma ita takababale nai daebafak ia, nana Manetualain koasa na.' Sama leo emi hataholi mana tao binim de'ubee lafa'da lae, 'Ita basa-basa tala nde bee na, Manetualain anan.'

²⁹ Naa, hu ka nde ita ia Manetualain anan, de ita ta bole tafa'da tae, Manetualain sama na leo hata esa nanadoki dulak neme lilopilas, lilofulak, do ai batu fo nanadoki-dulak tunga hataholi daebafa ka malela na.

³⁰ Manetualain nafandeleheni ita nggoa na so, tehu besak ia nadenu basa hataholi daebafa ka tukatei-saledale leme sala-singo nala mai.

³¹ Nana naketu basa faik esa soaneu naketu-nala'di basa daebafak ia lala'ena tunga matetu na. Manetualain hele basa hataholi esa soaneu nakalala'ok bela ba'uk ndia. Boema fo ela basa hataholi lala'ena lamahele dede'ak ndia de Manetualain tao naso'da falik hataholi ndia neme mamate sa mai so!"

³² Lelek fo hataholi sila la lamanene Paulus kokolak nae, hataholi mana mate kala laso'da falik, boema sila nggelok hika Paulus. Nggelok bai soona lae, "Ami hii mamanene tolanoo ka kokolak seluk dede'ak ndia."

³³ Boema Paulus la'oela mamana nakabuak ndia.

³⁴ Tehu hapu sila hataholin nggelok lok Paulus de lamahele Yesus. Hataholi sila nde, Dionisius fo majelis nai Areopagu sa, ma inak esa na'de Damaris, ma hataholi de'ubee seluk bai.

Kisah Para Rasul

Video Kisah Para Rasul 17

Ikuti Kami:

KONTAK | PARTISIPASI | DONASI