Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mpatarruhmi kalingkanna Paulus sola Silas nnola jio kota Amfipolis sola Apolonia, naratu lako kota Tesalonika. Den bola passambajangan to-Yahudi jio.

² Malemi Paulus lako ntuu joo bola passambajangan susi biasanna, pentallun Allo Katorroan situru'-turu' nanii ncuritai sola tau to issinna Sura' Allataala.

³ Naajahhii napabuttian tooi mpake Sura' Allataala, kumua ia to Raja Mangpasalama' to napau Sura' Allataala, la mate Ia, natuo pole' jio mai kamatean. Nakuapa Paulus, "Raja Mangpasalama' to Puang Isa kupangpeissenan lako kamu'."

⁴ Ba'tu pira-pira to tau memmatappa' na menturu' lako Paulus sola Silas. Buda toda to-Yunani, to mangngagama to-Yahudimo, memmatappa', na budapa to baine todipekapuangngi.

⁵ Iamo joo namasere ati to to-Yahudi, narempun ba'tu pira-pira tomasa'ga' jio mai to sumongge'-mongge' bang jio pasa' anna mpaden rongka lan kota. Simaleanmi lako bolana Yason nnangah Paulus sola Silas la napangngolo lako kasirempunan tobuda,

⁶ apa te'da naampa'i. Iamo joo nasirui'-rui'ii to Yason na ba'tu pira-pira tomatappa' laenna lako olona tomangparenta lan kota. Napetambanni nakua, "Ia tee mai tau ntampa bang ia ricu, moi umbo nanii! Na mangten-ten too allo ratumi ntee mai kotata',

⁷ napupangbongii Yason jio bolana. Ia tee tau te'da nakasiri'i to parentana Tomaraja Roma, sanga nakua ia kumua, denpa ia raja laen disanga Puang Isa."

⁸ Ia joo kadanna mpamarongka tobuda sola tomangparenta lan joo kota.

⁹ Nasuami tomangparenta to Yason sola to tomatappa' pira' mbajah doi' napuboro'. Mangkai joo namane' dila'paran.

¹⁰ Ta'pa nasua bang unami tomatappa' to Paulus sola Silas namale bongi lako kota Berea. Ia tonna ratumo lako, malei lako bola passambajangan to-Yahudi.

¹¹ Ia to to-Yahudi jio kota Berea la'bi melo ia penawanna na ia to to-Yahudi jio kota Tesalonika. Masannang ia ssa'ding karebanna Puang Isa, na allo-allo bang mbaca Sura' Allataala, madoang la nnissenni kumua sicoco'raka pangngajaranna Paulus.

¹² Budai to-Yahudi matappa' lako Puang Isa, na buda toda to-Yunani todipekapuangngi memmatappa' la baine la muane.

¹³ Ia tonna sa'dingngi to-Yahudi jio kota Tesalonika kumua napangpeissenan too Paulus to kadan-Na Puang Allataala jio kota Berea, male todami lako rrasii na pamausa' tobuda jio.

¹⁴ Ta'pa nasolanmi tomatappa' to Paulus lako randan tasik, apa torro bangngi ia Silas sola Timotius jio.

¹⁵ Ia tonna mangkamo ssolan Paulus ratu lako kota Atena, polemi to tomatappa' lako kota Berea, napasanni Paulus to Silas sola Timotius namadoi' undi lako.

¹⁶ Ia tonna tajan bangmi Paulus to Silas sola Timotius jio kota Atena, masussami penawanna ngkitai joo kota ponno tau-tau dewata.

¹⁷ Iamo joo nasipangkadaii Paulus lan bola passambajangan sola to-Yahudi na tolaen to ssompa toda Puang Allataala. Susi too nasipangkadai to tonasitammuan jio pasa' keallo-keallo.

¹⁸ Sihakiki tooi sola guru to nturu' pangngajaranna Epikuros na Stoa. Denni to mangkada nakua, "Apara la naissen tee tau! Sangkanuku malotongra to paissenna, apa buda kadari!" Ba'tu pira-pira tolaen nakua, "Susi ia to mpangpeissenan dewata jio mai tondok laen." Ia namangkada susi joo, nasaba' ia to Puang Isa na katuoanna pole' tolino jio mai kamatean napangpeissenan Paulus.

¹⁹ Jaji nasolanni to Paulus lako kasirempunan jio buntu Areopagus nakuanni, "Madoangkan nnissenni to pangngajaran baru mipangpeissenan.

²⁰ Nasaba' ia to apa mipau makalaen-laen lako pangpesa'dingki'. Na madoangkan nnissenni to battuananna."

²¹ Ia to to-Atena sola tomentama jio, gaja nakabudai mmatean allona mpesa'dingngi sola mbicarai to apa-apa baru.

²² Ia tonna ke'deh Paulus jio olona tosirempun jio buntu Areopagus, mangkadai nakua, "Tabe' lako kamu' to-Atena! Budamo to kukita mpamanassai kumua pangngagama ta'da' kamu' sola ngasan.

²³ Nasaba' ia tongkumale lumingka llelei tee kotami angkukitai to apa misompa, den too mesa' ngenan pangkaroban kukita nanii pangnguki' kumua, 'Lako puang to tangdiissen.' Jaji ia to apa misompa te'da miissenni, iamo la kupangpeissenan lako kalemi.

²⁴ Puang Allataala to mangka mpadenni tee lino sola issinna, Iamo Puangna langi' na lino. Te'da Ia natorro lan bola dewata panggaraga tolino.

²⁵ Te'da too Ia naparallui pangtulung tolino, butung to den kakuranganna, nasaba' Iara mben katuoan, penawa na sininna kaparalluanna tolino.

²⁶ Mesa'ri tau nanii mpaollongngi to sininna rapu tau ntorroi tee kuli'na padang. Ia toomo mpattantuanni pentaunan mellao jiona mai na pangnganggeanna to la nanii mari'pih.

²⁷ Iamo napaden Puang Allataala to tolino, nakua anna angahhi naampa'i. Apa sitonganna te'da namambela jio mai kale simesa'-mesa'ta'.

²⁸ Ia mpadenki', mpatuoki', mpapundiuki', susi to pura napau too tomaccammi nakua, 'Ia tee kita' bati'na todaki' Allataala.'

²⁹ Te'da tawa'ding mpapadai tau-tau bulawan, ba'tu salaka, ba'tu tau-tau batu, panggaraga to tomacca, nasaba' bati'naki' Allataala.

³⁰ Te'damo napallan penawai to wattu katangpaissenanta', apa ia tee too nasua ngasan to tau lan lino mengkatoba' jio mai dosana.

³¹ Nasaba' mangkamo napattantuan mesa' allo la dinii rra'tahhi to panggaukanna to tolino situru' kamarurusan-Na. Denmo mesa' tau napilei la mpugaukki joo. Mangkamo napatuo pole' joo tau jio mai kamatean, dikua anna manassa kumua Iamo napilei."

³² Ia tonna sa'dingmi tau tee kadanna Paulus, denni to mpetawaii, nasaba' te'da nakatappa'i kumua la tuo pole' to tau jio mai kamatean. Den too to kumua, "Madoang unapakan ssa'ding pole'ko mpaui tee."

³³ Mangkai joo messunmi Paulus lan mai joo kasirempunan.

³⁴ Apa den toda to rempe' lako Paulus, nasaba' matappa' lako Puang Isa, susinna Dionisius sala mesa'na tongkapalai kasirempunan jio buntu Areopagus, na mesa' baine disanga Damaris, na ba'tu pirapa to laenna.

Kisah Para Rasul

Video Kisah Para Rasul 17

Ikuti Kami:

KONTAK | PARTISIPASI | DONASI