Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjaha ibontas sidea ma Ampipolis ampa Apollonia, gabe das ma sidea hu Tessalonika. Adong do ijai rumah parguruan ni halak Jahudi.
2 Jadi songon na somal, masuk ma si Paulus hujai, anjaha marsahap ma ia bani sidea tolu ari Sabat tuntun humbani surat in,
3 patugahkon ampa patorangkon, paboa na maningon marsitaronon anjaha puho do use Kristus in humbani na matei, anjaha ihatahon, “Jesus, na hubaritahon in bani nasiam, in do Kristus in.”
4 Deba humbani sidea marhatongonkon ai, gabe mardomu hubani si Paulus ampa si Silas; sonai homa halak Gorik sihabiari Naibata, buei tumang, age naboru na sangap pe humbuei do.
5 Tapi subil do uhur ni halak Jahudi, gabe iarahkon sidea ma piga-piga jolma na jahat laho pajobu-jobu halak na mabuei ai, gabe geor ma haganup huta ai. Martumpu ma sidea i lobei ni rumah ni si Jason laho mamboan si Paulus ampa si Silas hu lobei ni sidang rayat.
6 Tapi halani seng jumpah sidea, isarad ma si Jason ampa piga-piga hasoman ai hu lobei ni pamarentah kota ai, lanjar mardilo-dilo: “Roh do homa hu banta on sigeori sab dunia on,
7 anjaha si Jason do manjalo sidea ibagas rumahni. Haganup do sidea siimbang aturan ni Kesar, ai ihatahon, adong do raja na legan, ai ma Jesus.”
8 Geor do ibahen sidea halak na mabuei ampa pamarentah kota pabogei-bogei ai.
9 Dob ijalo sidea pe jaminan humbani si Jason ampa halak na legan ai, ase ipaluah sidea.
10 Jadi mintor ipabingkat sanina ai ma si Paulus ampa si Silas, bornginni ai hu Beroa, anjaha dob das hujai, laho ma sidea hu rumah parguruan ni Jahudi.
11 Bujuran do halak na ijai ai ase na i Tessalonika, ai malas do uhur ni sidea manjalo hata in, anjaha ganup ari do itangkasi Surat in atap na sintong do sonai.
12 Buei do humbani sidea na gabe porsaya, nai homa buei humbani halak Gorik, na sangap naboru age dalahi.
13 Tapi dob ibotoh halak Jahudi na i Tessalonika, na dob ibaritahon si Paulus homa hata ni Naibata i Beroa, roh ma sidea hujai, laho pajobu-jobuhon ampa manggeori halak na mabuei ai.
14 Jadi mintor ipaingkat hasoman ai ma si Paulus laho dompak laut; tading ma anggo si Silas ampa si Timoteus ijai.
15 Das do si Paulus itaruhkon sidea ronsi Aten, anjaha dob ai mulak ma sidea, dob ijalo sidea tonahni bani si Silas ampa si Timoteus mangkatahon, ase roh sidea sapodas-podasni mangkasomanisi.
16 Sanggah na ipaima-ima si Paulus sidea i Aten, gok ringis tumang ma uhurni ibagas, mangidah buei ni gana-gana i huta ai.
17 Jadi sai iparsahapkon do i rumah parguruan halak Jahudi ampa sihabiari Naibata, sonai homa ari-ari i tiga halak na roh hujai.
18 Marsual ma deba parpilsapat Epikurei ampa Stoiki pakonsi. Deba mangkatahon, “Aha do na sihol hatahonon ni sibuei sahap in?” Na deba mangkatahon, “Siambilankon naibata na legan do gakni on, ai ibaritahon do Jesus ampa parpuhoon humbani na matei.”
19 Jadi ialop sidea ma ia, iboan ma hu Areopagus, anjaha nini sidea ma, “Boi do botohonnami atap podah baru aha do na hinatahonmin?
20 Ai songon na legan do podah na binobanmin bennami, sihol botohannami do pasal in.”
21 Ia halak Aten haganup ampa halak na legan na ijai, seng dong panorangni dompak na legan sobali na mansahapkon ampa na mambogei pingkiran baru.
22 Ase jongjong ma si Paulus i tongah-tongah ni Areopagus ai, nini ma, “Nasiam halak Aten, huidah bani haganup, pongkut do nasiam bani parugamaon.
23 Ai sanggah na mardalani ahu, paidah-idah sisombahon nasiam, gabe jumpah ahu ma sada anjapanjap na marsurat, ʻBani Naibata na so tinanda.ʼ Jadi na so tinanda, na sinombah nasiam ai, in do na sihol baritahononku bani nasiam.
24 Ia Naibata, sitompa dunia on ampa haganup isini, in ma Tuhan ni langit ampa tanoh, seng marianan Ia i rumah pinauli ni tangan.
25 Seng hurangan Ia, mambahen pala idangan ni tangan ni jolma Ia, ai Ia do sibere bani ganup na tinompa hagoluhan ampa hosah ampa haganupan ai.
26 Hun bani sada jolma do ijadihon bangsa ni manisia, ase iiani haganup sisik ni tanoh on. Itotaphon hinan do panorang ni ganup bangsa ampa parbalogan ni ianan bani sidea,
27 ase ipindahi sidea Naibata, andohar tardadap sidea Ia, anjaha jumpahsi, ai seng daoh Ia humbani ganup hita.
28 Ai ibagas diri-Ni do hita manggoluh, miut anjaha marhosah, songon na hinatahon ni deba pandoding nasiam, ʻGinompar-Ni do tongon hita.ʼ
29 Ai pe, anggo ginompar na marasal humbani Naibata do hita, ulang ma iagan uhurta, usih Naibata bani omas, barang bani pirak, barang bani batu na tinukangan atap na piningkiran ni uhur ni jolma.
30 Domma isalpuhon panonggor ni Naibata tahun haotoon, tapi anggo nuan ihatahon do bani haganup hajolmaon, ija-ija pe, ase ipaubah uhurni,
31 ai domma itontuhon sada ari paruhuman bani dunia on, ibagas hapintoron, marhitei sada halak na pinilih-Ni. Anjaha ibere do bani haganup jolma dalan ase boi porsaya Bani, marhitei na ipuhoi Ia humbani na matei.”
32 Tapi dob ibogei sidea hatani ai pasal parpuhoon, manrisai ma na deba, anjaha na deba mangkatahon, “Sihol bogeionnami ope hatamu sahali nari pasal ai.”
33 Dob sonai, laho ma si Paulus hun tongah-tongah ni sidea.
34 Tapi adong do deba na mangihutkonsi, na gabe porsaya, songon si Dionisius, sada pagori ni Areopagus ai, ambah ni ai sada naboru, na margoran si Damaris, ampa deba nari hasoman ni sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA