Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 An penatua welahiyon inowen Allahn mumal tarisi hiyap men umalikisi anden nindi anggolo enesug lahiyon men fahet suwesingga aru emberuk lahi. Anden eneg nindi henesug lahi fug, Allahn tem toho uruk ane inindi anggat toho werehon arimanowen inindi henesug lit wereg.
2 Allahn tem toho uruk ane ninindi fam wenggel haruk lit weregman eneg welamuhuk.
3 Ninikni Allah men Amloho Yesus Kristus menen Inindi nenesug lit ninindi yuwahap neneptuk lamuhup ulug sembahyang uruk lahi. Honori fahet hinindi enesug lit Allah wene tem toho ulug wenggel haruk lamuhup.
4 Hat humalikisi winonen fano ane turukmu isarikik ane fahet nahiyeg anggolo haruk lahi. Iren fano ane turukon ari Ninikni Allahn komo neneptuk ane hikit toho turuk.
5 Nisinga, anden hubam heng uruk lahiyon aru nit obog toho hiyabet abet nonori fahet ninindi roho welamuhuken hubam uruk lahi. Uruk lahiyon aru alem keron uruk lahi fug. Ari roho turuk lamuhup ulug Yesusen tam komo nenepfag ane emberuk lahi.
6 Ap inindi enesuhon arimanowen Allahn komo neneptisi ane hikit toho turuk. Ak teberuk lit hiyag hisarukmu holtikip ane Yesusen komo nenepfahon iminon aru: Ap winon hinindi enesug lamuhup.
7 Enele si hiyag isaruk inap anggolo o pumbuk obog toho saho rurusa. It arimanowen Yesus Kristus kinangma watfahon ino fahet ap hag toho watfag fug ulug awiya waruk. Ari uruk inap arimano Kristus men seli roho wereg lit ap inindi ninap eneptuk.
8 Hit sehelimu wereg lit niren sat toho turuk latukuk ane ari il misig longgo uhu rohon fano foroho lamuhup. Onggo suwon obog toho nininggikmu amag ulug yami ruruk lamuhup.
9 Ap sa Kristus inowen hiyag nisaruk latfahon wenggel ha fug angge ambol yig utuk ahun inowen Allah ngi roho welaruhu fug. Ap san Kristus inowen hiyag nisaruk latfag ane senetuk ahun inowen Ikniyet Amlohowet ngi roho welaruhu.
10 Ap misig henembeg waharuk lit Kristus inowen hiyag nisibahon hikit toho hiyag hisa fug angge un ane uruk halug hiren ap ino hi ruruk lit hinibam hondoko kilabuk fug.
11 Ap san at ino hi ruruk halug aren ele si ane hiyag isarukon ino ubam aruhu.
12 Anggolo komo heneptuk lit hiyag hesele angge famen suwesingga fam haharoho embemin peruk lahi fug. Henembeg waruhukteg nenehiyeg toho hit men ambiyeg wereg lit nenele uhuk peruk lahi.
13 Hat hehe tuma werehon Allahn mumal tarisiyon umalikisiyen nori ulug hi haptuk.
2 Yohanes
Video 2 Yohanes 1
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA