Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas Pertua nari. Man Kemberahen si ipilih Dibata ras anak-anakna si kukelengi. Labo aku saja si erkeleng ate man bandu, tapi pe kerina kalak si meteh kai si benar ngkelengi kam.

² Sabap kai si benar e ringan i bas kita janah lit i bas kita seh rasa lalap.

³ Dibata Bapa ras Jesus Kristus Anak Bapa e mereken lias ate, perkuah ate, ras kemalemen ate man banta gelah; kerina si enda jadi sikerajangenta i bas kita nggeluh alu bujur ras dem keleng ate.

⁴ Seh kal riahna kuakap meteh maka lit anak-anakndu si nggeluh i bas kebujuren bali ras si iperentahken Bapa e man banta.

⁵ Janah genduari kupindo man bandu o, Kemberahen: Sikeleng-kelengenlah kita. Labo perentah si mbaru si kusuratken man bandu enda, tapi si nggo lit i bas kita mula-mulana nari kin.

⁶ Kekelengen e ertina nggeluh sue ras perentah-perentah Dibata. Perentah e, sue ras si nggo ibegindu mula-mulana nari, arus jadi palas kegeluhenndu.

⁷ Nterem penipu nggo merap i doni enda si la ngakui maka Jesus Kristus reh selaku manusia. Kalak si bage penipu janah musuh Kristus kap.

⁸ Jagalah bandu, gelah ula bene kai si nggo idahikenndu e, tapi dem pagi ialokenndu upahndu.

⁹ Kalak si la ringan i bas ajaren Kristus, tapi ndarat i jenari, ia la er-Dibata. Ise si ringan i bas ajaren e, Bapa ras Anak e lit i bas ia.

¹⁰ Dage, adi lit kalak si ndahi kam la maba ajaren Kristus e, ula aloken ia i bas rumahndu, janah ula kataken mejuah-juah man bana.

¹¹ Sabap ise si ngatakenca mejuah-juah man kalak si bage, ia ikut i bas perbahanenna si jahat e.

¹² Melala kal ateku si kuturiken man bandu, tapi la pada kulakoken e alu kertas ras tinta, tapi kuarap maka banci kudahi kam janah ngerana sebabah ras kam, gelah dem kal keriahenta.

¹³ Anak-anak seninandu, si nggo ipilih Dibata, ngataken mejuah-juah man bandu.

2 Yohanes

Video 2 Yohanes 1

Ikuti Kami:

KONTAK | PARTISIPASI | DONASI