Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngoi ne'ena 'o jamati ma balusu tolefo 'o surati ne'ena, tositago-tago ngonaka, 'Esa, gee ma Jo'oungu ma Dutu woniiri-irikokau, de mita 'ani ngowa-ngowaika gee posironga tinisibosonoka. De duga ka ngoiwa tinisibosono so 'ena 'o nyawa 'iodumu gee ma Jo'oungu ma Dutu winako-nakokau.

² Sababu ma Jo'oungu ma Dutu naga nanga singinaka, de 'una dua kaisi'ado-'adonika de de ngone.

³ Toga'asoko la 'o barakati, 'o simara'ai, de 'o singina ma sanangi nanga Dea ma Jo'oungu ma Dutuno de 'awi Ngowaka ma Yesus Kristusino dua naga koitogu-togumuwa ngoneka. Tanu ge'ena 'iodumu padawongo de nanga singina 'iti-tiai de nanga dora.

⁴ Ngoi tomorene 'ifoloi sababu to'isene 'ato, 'Esa, 'ani ngowa-ngowaka naga de ma 'ena yo'ahu moteke ma Jo'oungu ma Dutu 'awi do-dotoko, gee 'isoka 'o 'Aba ma Jo'oungu ma Dutu wosulokokau ngoneno.

⁵ Ge'enau so 'Esa, ngoi toga'asoko la ngone poodumu pomasikamara'ai. Ngoi tositotara ne'ena ko 'o besesongo ma sungiwa; 'o besesongo ne'ena 'inakulakau ka gee ngone 'ikurue pongaku.

⁶ Pomakadora ge'ena ma ngale po'ahu moteke ma Jo'oungu ma Dutu 'awi besesongo. De 'o besesongo gee nio'isenokau ma sirasi, ge'ena la ngini salingou nimakadora moi de moi.

⁷ Yosiliba-liba manga gudaiokau 'o duniaka ne'ena, 'ona ge'ena koyongakuwa 'ato ma Yesus Kristus woboakau 'o duniano ge'ena ma gou-goungu wodadi 'o nyawa. 'O nyawa koge'ena ge'ena yotipu-tipu de ma Kristusika wimusu-musu.

⁸ Sababu ge'ena, niaka'eli niosidiaino 'okia naga gee minidu'usahanou. Niomariwo la niamake ma Jo'oungu ma Dutuno 'ania parasengi 'iodumu.

⁹ 'O nyawa gee koyomasiga-gaowa ma Kristus 'awi do-dotokika, so kayosiregu de gee 'okia naga wosidoto-dotoko, 'ona koyomarimoiwa de ma Jo'oungu ma Dutu. Nago'ona yomasiga-gao ma Kristus 'awi do-dotokoka, 'ona yomarimoi de 'o 'Aba ma Jo'oungu ma Dutu de 'awi Ngowaka.

¹⁰ Sababu ge'ena nako moikani yoboa de nisidotoko 'o do-dotoko gee ko ma Kristusuwa wosidoto-dotoko, 'uwa niakisidabino nia woano, de 'uwa niakitabea 'isoka 'o nyawa manga ngo-ngaku 'iti-tiai.

¹¹ Sababu nago'ona yakitabea 'isoka 'o nyawa manga ngo-ngaku 'iti-tiai 'o nyawa koge'ena, 'ona mita yomotekokau de 'o nyawa gee 'o dorou yodi-diai.

¹² 'Ena 'o gudai salingou tinisitotara, duga tamao 'ifoloi yaowa 'uwa ka de 'o surati. Ngoi tomau taika nginika de pomabi-bicara la nanga singina ma gou-goungu 'imorene.

¹³ 'Esa, 'ani dodoto 'ami ngowa-ngowaka gee ma Jo'oungu ma Dutu wakiiri-iriki mita, manga tabea yosidingoto ngonaka.

2 Yohanes

Video 2 Yohanes 1

Ikuti Kami:

KONTAK | PARTISIPASI | DONASI