Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Si Ninang pinilen Mawu Ruata ringangu manga ahus'i Ninang. Suratẹ̌ ini e kai wọu iạ, těmbonangu jamaatẹ̌ kụ kahěnga-hěngang kụkěndagi kamene. Bal᷊inewe kětạu iạ, kaiso kai kẹ̌bị taumata masingkạu Mawu Ruata kahěngang, mal᷊aing kụ kěndag'i kamene.

² Batụu Mawu Ruata e mětẹ̌tumanạ su ral᷊ungu naung'i kitẹ, dingangu sarung hanesẹ̌ dingangi kitẹ sarang karěngụe.

³ Karimạko i kitẹ gělirang u al᷊amatẹ̌, tatal᷊ěntụ dingangu karal᷊unsemahẹ̌ kahian Duata i Amang dingang'i Yesus Kristus Ahus'i Amang ene. Karimạko kěbị ene e taghuanengu naungi kitẹ matul᷊idẹ̌ dingangu ual᷊ingu kakěndagẹ̌.

⁴ Iạ e mambeng limuasẹ̌ kahěngang, nakakasingkạ u piạ manga ahus'i Ninange měbẹ̌biahẹ̌ tụtuhụ těntiron Mawu Kasěllahenge kerẹewe seng nịlaorom Mawu kasěllahenge si kitẹ.

⁵ Ual᷊ingu ene Ninang, iạ e měgẹ̌gausẹ̌ sěngapam botonge tadeạu i kitẹ kěbị e mẹ̌kakakěndagẹ̌. Takụ ipẹ̌paul᷊ị ini e wal᷊inewe sěmbaụ tita wuhu; kaiso seng tita těbe nipaul᷊ị si kitẹ dokeng bọu tětạu i kitẹ mạngimang.

⁶ Kuměndagẹ̌ e mangal᷊ene mẹ̌biahẹ̌ tumuhụ titan Mawu kasěllahenge. Kụ tita seng kinaringih'i kamene dokeng bọu tětạe ute i kamene harusẹ̌be mẹ̌biahẹ̌ mẹ̌kakakěndagẹ̌ sěmbaụ dingangu wal᷊ine.

⁷ Lawọ tahapamitaugu ral᷊akị e seng nakeke su dunia e. I sire kai taumata tawe měngaku u i Yesus Kristus riměnta su dunia e tabidạu sěngkatau taumata. Taumata kerene ute kai tahapamitaugẹ̌ e kụ kai Sekẹ i Kristus e.

⁸ Ual᷊ingu ene ute, pakapapia wue i kamene, mạdiring i kamene kailangengu wuan saghed'i kami e. Pẹ̌sal᷊imaẹ bue tadeạu i kamene makatarimạ asẹ̌kinu wọu Ruata masukụ.

⁹ I sain ta mangangumbelẹ su těntirong Kristus, taumata ene tawẹ Duatane. I saịewen tatapẹ̌ su ral᷊ungu těntirong Kristus, ute mạnaghuangbe kurai Ruata i Amang kuraiewe Ruata Ahusẹ̌.

¹⁰ Ual᷊ingu ene kereu piạu ruměnta ringangu měhabarẹ̌ si kamene těntiro tai tatěntirong Kristus e, ute kumbahang bue měnarimạ u tau ene su ral᷊ungu wal᷊enu arau mangonggọu adatẹ̌ si sire.

¹¹ U taumata měngadatẹ̌ su taumata kerene ute mal᷊aing tụtol᷊e ringangu tau ene su ral᷊ungu kakanoạ dal᷊akisẹ̌.

¹² Mal᷊awọ kahěngang hinon takụ ihabarẹ̌ si kamene, kaiso mapiangbe wal᷊ine ringangu suratẹ̌. Sukiral᷊ingku e iạ makapẹ̌tiwo ringangu makapẹ̌bisara hala ringang'i kamene, tadeạu naung i kitẹ e kahěnga-hěngangbe mal᷊uasẹ̌.

¹³ Manga anạ u tuarin Ninang kụ pinilen Mawu Ruata e, mal᷊aing něndohong adatẹ̌ e si Ninang.

2 Yohanes

Video 2 Yohanes 1

Ikuti Kami:

KONTAK | PARTISIPASI | DONASI