Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pade ingetang anggote jemaahde adẽq ie pade tunduk lẽq pemrẽntah dait dengan-dengan saq bekuase, dait mẽlẽ ngelaksaneang sebilang pegawẽan saq solah.

² Badaq ie pade adẽqne ndaq pitnah dengan atao betungkasan kance sai juaq, laguq adẽqne gerasaq dait harus tetep lemah lembut tipaq selapuq dengan.

³ Sẽngaq laẽq ite mẽsaq ẽndah bodo, sesat dait ndẽq taat. Ite tejariang hambe siq macem-macem napsu dait kemẽlẽq; ite idup siq niat-niat saq jahat dait talon atẽ, dait ite saling meriq.

⁴ Laguq Allah, Juruselamette nyatayang kasih dait kesolahan-Ne tipaq ite.

⁵ Lẽq waktu nike Ie sampun nyelametang ite, ndẽqne lantaran perbuatan solah saq sampun ite laksaneang, laguq lantaran rahmat-Ne. Allah nyelametang ite langan Roh-Ne saq ngicanin ite kelahiran baru dait idup baru, siq care persiq ite.

⁶ Allah ngicanin ite Roh-Ne siq perantarean Deside Isa Almasih, Juruselamette,

⁷ adẽq ite sebagẽ dengan saq tejariang kenaq lẽq arepan Allah sehingge hubungante kance Allah jari solah malik siq rahmat-Ne, berhak nerimaq idup saq kekel menurut pengharepante.

⁸ Ucapan niki tetu-tetu kenaq. Dait tiang mẽlẽ adẽq side tegesang hal-hal niki, adẽq dengan-dengan saq percaye lẽq Allah tetu-tetu berusahe ngelaksaneang pegawẽan-pegawẽan saq solah dait bemanpaat tipaq selapuq dengan.

⁹ Jaoqang diriqde lẽman pegejuhan saq ndẽq araq manpaatne, cerite-cerite silsilah, betungkasan dait besiaq mengenai Hukum Taurat. Selapuqne nike ndẽq araq manpaatne dait sie-sie.

¹⁰ Dengan saq jari penyebap perpecahan lẽq dalem jemaah, harus side peringet sekali due; sesampun nike ndaq malik bebatur kance ie.

¹¹ Side nenaoq bahwe dengan saq maraq nike tetu-tetu sesat dait dose-dosene ngukum diriqne mẽsaq.

¹² Tiang gen becat ngutus Artemas atao Titikus ojok side, pade berusahe dateng ojok tiang lẽq Nikopolis, sẽngaq tiang sampun mutusang jari ndot lẽq derike sengonẽq musim telih.

¹³ Pade berusahe pacu-pacu jari nulung Zenas, ahli Taurat nike, dait Apolos, adẽq ie pade bau berangkat dait ndẽqne kekurangan napi-napi.

¹⁴ Dengan-dengante harus berajah ngelaksaneang hal-hal saq solah, adẽqne bau nyukupang keperluan-keperluan saq mule tetu-tetu teperluang; ndaq jangke ie pade idup ndẽq araq manpaatne.

¹⁵ Selapuq semeton saq araq bareng tiang, ngirim salam tipaq side. Sampẽang salam tiang tipaq ie pade saq ngasihin tiang pade lẽq dalem iman. Rahmat Tuhan araq bareng kance side pade.

Titus

Video Titus 3

Ikuti Kami:

KONTAK | PARTISIPASI | DONASI