Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pangngingaranni sininna to tomatappa' iti', namenturu' lako to ambe' lan tondok na tomangparenta, anna danggi' nabali-balii. La sadia bang mpugauk panggaukan melo,

² danggi' pau gaja' tau, danggi' massipura, apa la mabassa na mangkada rampa' too lako sininna rupa tau.

³ Nasaba' moi kita' tonna jolona bango' tooki', antalao sala, te'da too taturu' Puang Allataala. Napukaunan tooki' mangrupa-rupa kamadoangan sola pakkaeloran penawa. Mpugauk tooki' kagajatan sola masere ati, na massikaba'ci bangki'.

⁴ Apa Puang Allataala, Tomangpasalama'ta', mpakitanki' pangpakamoja'-Na sola kameloan penawan-Na.

⁵ Napasalama'miki', tangngia kumua mpugaukmiki' kameloan, sangadinna nasaba' pangkamasean-Na lako kita'. Nabaseiki' jio mai dosata' antadijajian pole', napemeloii to penawanta' mpake kuasan-Na Roh Allataala.

⁶ Nasuami Puang Allataala to Puang Isa, Tomangpasalama'ta', mpakabuhhiki' Roh Allataala,

⁷ dikua antaampa' katuoan melo te'da cappa'na, susi to pangrannuanta', sanga mangkamiki' dipupenjaji tomelo nasaba' kameloan penawan-Na.

⁸ Tongan tee kada mangka kupau. Madoangna' ammupangpangngajaran tonganni sininna joo, dikua anna ia to tomatappa'mo lako Puang Allataala natongan-tongannii mpugaukki to panggaukan melo na den bua'na lako tobuda.

⁹ Danggi' musite'gehhi to curita tangkebattuan sola nunnungan nene. Danggi' too mupassipuraii ba'tu ssibobo'i to atoranna Nabi Musa. Sininna joo te'da ngasan bua'na na te'da too tujunna.

¹⁰ La mupakainga'i pissen ba'tu penduan to tompaden kasisalan lan tangnga-tangngana tomatappa'. Anna ia ke cia'i mangpesa'ding, danggi'mo musiama' to tau susi joo.

¹¹ Nasaba' la muissen kumua ia to tau susi joo tibalikmo jio mai kamatapparan tongan na ia to dosana la mpamanassai kumua la disessai.

¹² Ia angkusuami mati' Artemas ba'tu Tikhikus, la mupengkulle-kullei ammumadoi' ratu ssikitanna' jio kota Nikopolis, nasaba' kuakkattai la torrona' jio ke wattu macakke'i.

¹³ La mutulung tongan-tonganni to Zenas, mesa' to macca mbicara kara-kara, sola Apolos, dikua anna dipasadian ngasan kaparalluanna nawa'ding mpatarruh kalingkanna.

¹⁴ Makassing ke sininna solata' tomatappa' melajah mpugaukki to apa melo anna angahhi to naparalluinna, danggi' natuo te'da bua'na.

¹⁵ Sininna padanta' tomatappa' kusolan inde' massallang lako iko. Paratuankan sallangki' lako sininna solata' tomatappa'. Dennaa upa', anna barakka'i ngasan kamu' Puang Allataala. Padamo jolo' too. Sallangki' mati', Paulus

Titus

Video Titus 3

Ikuti Kami:

KONTAK | PARTISIPASI | DONASI