Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ponorop kom bayongan jama'at, baí mosia umuran kodu-kodudui kon itoi mita bo pomarentah, diaí momaḷawang bo tantuí mogaid kon inta mopia.
2 Tonggina'ai simbaí mosia diaí umuran mo'ibog moponapud in uboḷ kon intau ibanea andeka mo'ibo-ibog mobobayowan i inekadon, sim manikah umuran mokopopia kon dodia kon tumpaḷa intau bo mokopoaáḷus doman kom pososingog takin bayongan intau.
3 Sing kolipod kita tontanií in nobodokbií doman, diaí no'itutui bo diaí motoindudui. Kita sinonggata in norupa-rupamai in ibog awak na'a ande in dunia na'a; kita noyobiag takin niat mita inta mora'at, tantuí mo'intoi bo mososaturuan.
4 Ta'e ki Allah, Mopoposaḷamat naton ain nopo'ontong in tabi bo kopopia ing gina-Nya ko'i naton.
5 Sia noposaḷamat ko'i naton, ta'e de'emanbií lantaran kita ain nogaid kon inta mopia, ta'e lantaranbií tabi-Nya ko'i naton. Sia noposaḷamat ko'i naton takin Roho i Allah inta ain nobogoi ko'i naton ing kolahiran bo kobiagan mobagu takin cara nondarit ko'i naton.
6 Ki Allah ain nobogoi in Roho-Nya ko'i naton inta pinongin i Yesus Kristus Mopoposaḷamat naton,
7 simbaí saḷaku intau mita inta ain noko'ulií kon totabi i Yesus daí moko'ulií doman kong kobiagan mononoi naí inta harapon makow naton.
8 Totu'ubií in singog tana'a. Ibogonku na'a komintan pota'aumu ko'i monia, simbaí mosia inta ain nopirisaya ko'i Allah totu-totu'udon moramiji mogaid kon inta mopia, sin natuabií im mopia bo inta baraguna kom bayongan intau.
9 Dona'ai tongaí mobobayowan kon soaáḷ mita inta diaí baraguna, bo mongonguman kon asaḷ usuḷ, ande morogenggeng bo moropatoi kon soaáḷ hukum agama. Sin tua komintan diaíbií im baragunanya bo diaíbií doman ing ka'untungannya.
10 Intau inta mokopopisií kon ropatoi kon jama'at musti tonggina'ai komintan ande kodua, aka doií in sia mokidongog yo dikadon moyobayatnya.
11 Baí kota'auanmudon, kon intau mita natua in totu-totu'u bidon moromuí bo dosanya mita noponyatadon ko'inia kong kotaḷaí in sia.
12 ḷagi naonda im potabaíkudon mangoi ko'inimu ing ki Artemas ande ki Tikhikus, yo poramijidon in ikow mamangoi ko'inakoí kon Nikopolis, sin roncanaku im mogutunpa kon tua solama musim in tumping na'a.
13 Poramijidon totu-totu'u im motuḷung ko'i Zenas, ahli hukum tua, bo ko'i Apolos, simbaí mosia diaí kodaitan in rupa-rupa kom binaya'an monia.
14 Tunduídon in intau mita naton mogaid kon soaáḷ mita inta mopia simbaí mosia mota'au mopo'oyuíon im bayongan kaparaḷuan inta paraḷu pakeíon, simbaí oyuíondon im baraguna monia tua.
15 Ki utat mita naton inta noyotakinku kon na'a nokipoyaput in salam ko'inimu. Poyaputpa doman in salam nami kon yobayat mita naton inta mopirisaya ko'i Kristus. Po'igumon makow ki Tuhan naton umuran mobogoi im barakat ko'i monimu komintan. Hormat nami, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA