Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mada' nelun luk badénmu pad ideh ngebeneh bururdeh kuan amung-amung lun ngimet idi lun rayeh pana', dengan maya' baladeh, idi temina' nganau' anid-anid kekamen luk do'.
2 Mada' nedeh pad ideh na nguyo seburur lemulun, idi na pekedaluh, iamo' pad ideh mulai buri', idi megéi' ngegala' do' niatdeh kuan amung-amung lemulun.
3 Ngaceku atun tau pana' mebacé, ngelaba bala, neraruh, mangun ku demulun kuan amung-amung lili idi rot luk dat bang tana' ini. Kareb ineh tau mulun bang luk dat idi ét niat, luk inan lemulun megateh, idi megateh seburur inan seburur.
4 Iamo' kareb éi' idi awa Allah Lun Nengulun netau pangeh ginala',
5 Ieh nengulun netau. Baken ngaceku ratnan kekamen luk do' luk inau' tau, iamo' ngaceku éi'Neh. Ieh nengulun netau ku baru' Roh Meligan luk nguit netau tinganak mebaruh, pad ngalap ulun luk mebaruh.
6 Allah nengutang RohNeh pa luun tau dengan mela ngaceku ratnan Yésus Keristus, Lun Nengulun netau,
7 pad tau miak ruen matu ngaceku ratnan katuNeh, idi ngalap babpat ulun luk meruked luk inan tau merapet ineh.
8 Bala ini matu. Idi luk pianku, do' iko metueh mada' amung bala ini, pad lemulun luk pangeh manu inan Allah ineh mekél nganau' amung-amung luk do'. Amung-amung bala ini do' idi inan ulek kuan lemulun.
9 Iamo' ngado bururmu ratnan saad luk mebacé idi bala ratnan ngadan tepun, kedaluh, idi pesaad ratnan Ukum. Amung-amung luk kudeng ineh mo'-mo' idi na ulek.
10 Lemulun luk ngatad rurum muci ratnan ieh pangeh bida' dueh kua', nala' neneh.
11 Iko kali' nelun luk kudeng ineh pangeh neraruh. Idi sala'neh ngegala' ratnan ieh na matu.
12 Kareb ui ngecuk Artemas amé' namu kian Tikikus lek, do' iko nutun macing negku déi' Nikopolis, ngaceku ui lutep tudo déi' kareb meteneb.
13 Do' iko mekél ngedengan ni Sinas, lun luk ngatum ukum ineh, idi Apolos pana', pad didueh miak nalan. Aleg nima' nedidueh masi' ratnan anun-anun.
14 Nima' amung-amung lun tau sibada' nganau' luk do' pad ideh miak ngedengan asi' lemulun, idi na ideh mulun dengan na ngeruat bua'.
15 Idi amung-amung kinanak luk idi denganku maré tabi' kuanmu. Tabi' kuan amung lun rurum tau bang anu. Idi do' katu Allah ngedengan amung-amung muyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA