Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Persingetilah ia kerina gelah patuh man pemerentah ras si erkuasa. Ibegikennalah katana, dingen nggit ndalanken kerina dahin si mehuli.

² Katakenlah man bana gelah ula ia ncekuraki kalak si deban, tapi erdame dingen meriahlah, janah mehulilah min perbahanenna katawari pe nandangi kerina manusia.

³ Sabap kita pe nai labo sieteh mehuli, nggit ngelawan dingen erbahan salah. Kita ikuasai kerincuhen kula ras erbage-bage sura-sura. Kita nggeluhken kegeluhen si jahat dingen dem ate cian. Segat ate kalak kita, janah kita pe segat ateta kalak.

⁴ Tapi asum Dibata si Engkelini kita nehken perkuah ate ras KiniulinNa man banta,

⁵ kita nggo IkeliniNa. Kita IkeliniNa labo erdandanken perbahanenta si mehuli, tapi erdandanken perkuah AteNa nge. Kita ikelini Dibata arah Kesah Si Badia si erbanca kita tubuh peduakaliken gelah sialoken kegeluhen si mbaru alu mbersihken kita.

⁶ Dibata nguseken Kesah Si Badia si la ersibar man banta arah Jesus Kristus si Engkelini kita,

⁷ gelah erdandanken lias AteNa banci kita rembak ras Ia dingen ngaloken kegeluhen si tuhu-tuhu si la erkeri-kerin, si iarapken kita.

⁸ Kata enda tuhu kap. Ateku min gelah igegehindu ngajarken kerna si enda, gelah kalak si nggo tek man Dibata tutus ndahiken dahin si mehuli, si metunggung dingen erguna man manusia.

⁹ Silahkenlah ranan sijabapen si sia-sia, kerna terombo nini-nini nai, ula rubat, dingen ula sijabapen kerna Undang-undang. Enda kerina si lang-lang dingen la lit gunana.

¹⁰ Kalak si erbahan perpecahen i bas perpulungen ajarken ula kurang dua kali jenari sirangi ia.

¹¹ Ietehndu maka kalak si bage jahat kap. Dosa-dosana nuduhkenca maka ia ersalah.

¹² Kenca kusuruh Artemas ntah Tikikus ndahi kam, usahakenndu kal ndahi aku ku Nikopolis, sabap nggo kutetapken ringan i jah asum musim mbergeh.

¹³ Usahakenndulah nampati Senas, si meteh undang-undang, ras Apolos i bas ia menaken perdalanenna, janah usahaken maka kerina keperlunna icukupi.

¹⁴ Teman-temanta arus erlajar make kesempaten si lit guna ndahiken dahin si mehuli, gelah icukupina kai si perluna kal. Ula min ia sia-sia nggeluh.

¹⁵ Kerina senina-seninanta si ras aku i jenda ngataken mejuah-juah man bandu. Kataken mejuah-juah i bas kami nari man teman-temanta si sada kiniteken. Lias ate Dibata ras kam kerina gelah.

Titus

Video Titus 3

Ikuti Kami:

KONTAK | PARTISIPASI | DONASI