Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wobi-bicarali 'onaka de 'o 'ade-'ade,

² wongose, "Nako ma Jo'oungu ma Dutu wopareta, ge'ena 'isoka 'o 'ade-'ade ne'ena: Ma Koana wimoi 'o rame wodiai ma ngale wi ngowaka wongaamoko.

³ Ma Koana gu'una wosuloko wi ro-riwo yotagi yakitongoono 'o nyawa gee yaki'aso-'asoko 'o rameno, duga 'ona yoolukino.

⁴ Ge'enaka de ma Koana gu'una wosulokoli wi ro-riwo 'ireguka, 'Niakidongose 'o ga-gasoko yamake-makekau go'ona: 'O biono 'iduangukou, 'ai sapi ma balusu de ma goo-gooka yaowa-owa ma 'ikokitoaukou. 'Iodumu 'ikokiduangukou so yainou 'o ngaamoko ma rameno!'

⁵ Ma gee 'o ga-gasoko yamake-make, koyokalesangikawa. Munuka 'ona kayosikaika moi-moi manga manaramika, munuka manga bairika, munuka naga manga manarama 'ireguka,

⁶ de munukali ge'ena yakitagoko ma Koana wi ro-riwo go'ona, de yakipesana yakisongenoka.

⁷ Ma Koana wo'isenoka ma hali ge'ena, de wi do'otasa 'irama so wosuloko wi solodado yaika yakito'oma gee yoto-to'oma go'ona, de manga kota yatuuku.

⁸ Ge'ena 'ipasa de ma Koana gu'una waki'asokino wi ro-riwo de wakidongose, ''O ngaamoko ma biono 'iduangukou, ma 'o ga-gasoko yamake-make go'ona koyakisorawa yodoboa.

⁹ Sababu ge'ena, ma 'orasi ne'ena niotagi naga 'o tapaika, la niakudaino 'o nyawa niaki'asoko 'o ngaamoka ma rameno ne'ena.'

¹⁰ Ge'enaka de 'o ro-riwo go'ona yotagi naga 'o tapaika, de yakikokitoomu nago'ona bato yakimake, 'o nyawa ma owa bolo ma dorou. Sigado 'o ngaamoko ma rame ma ngii ge'ena ya'oma-'omanga.

¹¹ Ge'enaka de ma Koana wowosama wakikokilega wi woa ma gikiri go'ona, de wimake wimoi ge'enaka 'awi baju koyadaenuwa wosiwosanga 'o rameno.

¹² De ma Koana gu'una wosano, ''Esa moi, kokia ngona 'idadi nowosama ne'enano konomasinoakuwa 'o rame ma baju?' Ma 'o nyawa gu'una kaworii-riidika.

¹³ Ge'enaka de ma Koana wosuloko wi ro-riwoka, ''O nyawa gu'una wi dou de wi giama niapusuku, de wini'umo ma dudunika gee 'o ngii 'imoo-moongika. Ge'enakau doka dua 'o gari de 'o sangisara.'"

¹⁴ Ge'enaka de 'o Yesus wositogumu wi 'ade-'ade ge'ena, konee, "Manga gudai waki'asoko, ma ka munuka wakiiriki."

¹⁵ Ma moi ge'ena 'o Farisioka yomatoomu yomasikadibangi ma ngale kokia 'o Yesusika witaili de manga sa-sano.

¹⁶ So yakisuloko manga do-domoteika de 'o nyawa gee de 'o Herodes 'o paratei moi yaika 'o Yesusika. Yaika de yongose 'ato, "'Aba Guru, ngomi mianako ngona noloa. Ngona nodotoko kanositi-tiaika ma Jo'oungu ma Dutu wi mau 'o nyawaka, komoiwa moi manga di-dibangi nodomoteke, sababu ngona konakidomodonguwa nago'ona bato.

¹⁷ So bika nosidemo ngomino, moteke to ngone nanga 'agama ma mau; kaidadi? 'o balasitengi pofangu 'o Kaisarika, bolo koidadiwa?"

¹⁸ 'O Yesus wanako manga singina ma dorou ge'ena, so wongose, "Ee, ngini nioelu-eluku! 'Ido'oa so niomau nitaili?

¹⁹ Bika niosidumutino nia pipi gee niosifangu-fangu 'o balasitengi!" Ge'enaka de 'ona yokula 'o pipi 'o saaka 'o ngai moi.

²⁰ De 'o Yesus wakisano, "Nagu'una 'awi gambari de wi ronga ne'ena?"

²¹ 'Ona yosango 'ato, "To Kaisar, ma Koana ma Amoko." Ge'enaka de 'o Yesus wakidongose, "Nako koge'ena, de niokula ma koanika 'okia naga gee to ma Koana, de niokula ma Jo'oungu ma Dutuka 'okia naga gee to ma Jo'oungu ma Dutu."

²² Gedagee yo'isenoka 'o Yesus wi demo ge'ena, de yoherangi. So kage'ena de yotagiokau so wimadakau 'una ge'enaka.

²³ Ma wange ge'ena mita, 'o Sadukioka yamuruo naga yaino 'o Yesusino, 'ona ge'ena yanako 'o nyawa yosongenokau ge'ena dua koyomomikuawau.

²⁴ 'Ona yongose 'o Yesusika, "'Aba Guru, 'o Musa wosidotoko konee: Nako wimoi wosongene 'ena wi ngowaka koi'iwa, 'awi 'esa moi salingou mingaamoko 'o bao-bao gumuna, la wosonge-songenokau gee, 'unaka deuku 'awi 'asali 'uwa 'iisanga.

²⁵ Ne'enaka naga ngomioka 'o 'esa moi yatumudiingoka. 'O riaka wongaamokino, duga wi ngowaka koi'iwa de wosongenokau. So 'awi bao gumuna wi dodotuku widamada.

²⁶ Ge'enaka de wi dodotoli gu'una ma wi ngowaka koi'iwa de wosongenokau. Deuku wi dodotuku yaruange sigado yatumudiingi ge'ena ka koge'enali.

²⁷ Ma du'uruku 'o ngeweka gumuna mita mosongene.

²⁸ So dua gee yosonge-songenoka yokokimomikoli, de muna dua to nagu'una wi wekata? Sababu yatumudiingi go'ona yoodumu mingaamokoka?"

²⁹ 'O Yesus wosango, "Ngini nioliba ma sala sababu koniasahewa 'o Buku 'Itebi-tebini de ma Jo'oungu ma Dutu wi guata.

³⁰ Sababu dua nako 'o nyawa yosonge-songenoka yomomikie, ge'ena koyongaamokuawau ma yo'ahu 'isoka 'o mala'ekati 'o sorogaaka.

³¹ Koniabacawasi? kokia ma Jo'oungu ma Dutu wosidemokau ma ngale 'o nyawa yosonge-songenoka yakisimomikoli? Ma Jo'oungu ma Dutu wongose,

³² 'Ngoi ne'ena 'o Abraham de 'o Ishak, de 'o Yakub 'isuba-suba.' 'Una ge'ena koyosonge-songenuwa manga Jo'oungu ma Dutu, ma 'ena yowango-wango."

³³ 'O nyawa yoku-kudai go'ona gee yo'isenoka 'o Yesus 'awi do-dotoko koge'ena, de yokokiherangi.

³⁴ Ge'enaka de 'o Farisioka yomatoomu sababu yo'isene 'ato 'o Yesus wakidomoi-moi 'o Saduki ma nyawaka so 'ona kokiawau yongose.

³⁵ Ge'enau so manga 'agamaka wodoto-dotoko wimoi 'o Yesusika witaili wosano,

³⁶ "Ee 'Aba Guru, nanga 'agamaka 'o besesongo ka'ena 'ifoloi 'iamoko?"

³⁷ 'O Yesus wosango, "Winisibosono ma Jo'oungu ma Dutu de nia singina ma gou-goungu, de nia guata, de nia di-dibangi 'iodumu.

³⁸ Ge'ena 'o besesongo ma di-disiraka de ma titi.

³⁹ De 'o besesongo modidi gee kaimatero de 'o besesongo ma di-disiraka, ge'ena: Niomasikabosono moi de moi 'isoka to ngini ma sirete nia roese niosibosono.

⁴⁰ 'O 'agama ma besesongo gee 'o Musa wosidoto-dotoko de 'o nabii manga do-dotoko 'iodumu ge'ena ma titi 'o besesongo ngai modidino ne'ena."

⁴¹ 'O Farisioka kayomatoomunosi ge'enaka de 'o Yesus wosano 'onaka,

⁴² "Kokia moteke ngini ma ngale 'o Koana ma Jo'oungu ma Dutu Wiiri-iriki? 'Una wi 'asali kiano?" 'Ona yosango, "'O Dautino."

⁴³ 'O Yesus wongose, "Nako koge'ena de 'ido'oa so 'o Dautu 'o Ngomasa 'Itebi-tebini widugutiku la 'o Koana ma Jo'oungu ma Dutu Wiiri-iriki gu'una wisironga ma Jou? Sababu 'o Dautu wongose:

⁴⁴ 'Ma Jou wongose 'ai Jouka: Tonigoraka nodadi Koana la nopareta de de ngoi, sigado nisa-saturuu takidiai yo'isene ngonaka.'

⁴⁵ So nako 'o Dautu ma Jo'oungu ma Dutu wi Ngirikika wisironga 'ma Jou', kokia so 'una 'awi 'asali 'o Dautino?"

⁴⁶ Komoiwau yosango, de ge'enau ma 'orasi 'ikurue komoiwau yomoroini yokasano-sano 'unaka.

Matius

Video Matius 22

Ikuti Kami:

KONTAK | PARTISIPASI | DONASI