Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ki Yesus nongonguman bui kom porumpama'an ko'i monia, kai-Nia:
2 "Aka ki Allah momarentah yo náonda bo porumpama'an tana'a: Tobatú raja inta nogaid kon rame sim ponika'an i adínya.
3 Sia nopotabá kom bobantungnya mita mogoiní kon intau mita inta aindon sinoko'undang kon rame ponika'an tatua, ta'e intau mita tatua doí mamangoi.
4 Sia nopotabá bui kom bobantungnya mita ibanea, takin koyow, 'Pogumandon kon intau mita inta ain sinokoundang tatua: Kom bayongan ka'anon aindon sinadiaku. Sapi mita koḷakian, bo biag inta sinokopiaraku aindon iratak. Bo komintan tua aindon sinadia kom meja. Angoidon in rame ponika'an i adíku singgai in na'a!'
5 Ta'e diá im pandung in intau mita inta sinokoundang tatua; oyúon inta minayak ing gobá. Oyúon doman minayak nogaid kon oáidannya,
6 bo oyúon doman in nodomok kom bobantungnya mita bo pinogutú poḷat ilimod.
7 Bo raja tatua totok in sinumorú. Pinotabánya in tontaranya minayak nomutú kom moḷolimod bo nonurub kong kotá monia tua.
8 Nopaḷut makow, sia noguman kom bobantungnya mita: 'Rame ponika'an i adíku na'a aindon sinadia komintan, tongá intau mita inta inundang ko'ina in diádon mota'au mamangoi kon rame tana'a.
9 Manangka intua bayakdon kom pinoyotanga'an daḷan bo oinídon in intau mita inta moyodungkuḷ monimu kon tua, bo dia mamangoi kon rame ponika'an tana'a.'
10 Dá bobantung mita tatua minayak bo nosipun kom bayongan intau inta noyodungkuḷ monia kon daḷan, intau mita mara'at bo intau mita mopia, sahingga nopulingdon intau in ruangan pinonika'an tatua.
11 Naonda in raja tatua sinumu'ot sim mokipodungkuḷ kom mokokíangoi mita tatua, sia noko'ontong kon intau tobatú inta diá nogiḷambung in ḷambung pororame.
12 Dá sia nolibó kon intau tatua: 'Hei utat, nongonu sin ikow in sinumu'ot mangoi ta'e diábí nomaké in ḷambung inta pororame?' Intau tatua tongá kibio-biómai.
13 Dá raja tatua noguman kom bobantungnya mita, 'Tokig in sioḷ bo limanya bo pogarab in intau tanion kon tampat inta nosindip totok, kon tua kodongogan in amui bo rokokot in ingipon.'"
14 Bo pangabisannya ki Yesus noguman, "Nobarong in inoiní, ta'e noyakag im pinilí."
15 Intau mita im Parisi minayakdon nongkon tua, bo noyosingog kon náonda simbá ko'ulían monia kon taḷá ing ki Yesus takin onu inta libo'on monia.
16 Mosia nopotabá kon dumodudui mita monia noyotakin in intau mita i Herodes sim molibó ko'i Yesus nana'a, "Pak Guru, kinota'auan nami ki Pak Guru intau inta motulid ing gina bo takin gina motulid doman ki Pak Guru moguman kon daḷan i Allah, bo diá doman ki Pak Guru mo'ondok ko'i ine kabí sin diábí poyoposion i Guru in intau.
17 Dá pogumankah ko'inami: Mongo mota'au degá im moguboli kom pajak ko'i Kaisar andeka diá mota'au?" Aka podudui in raian-Mu yo náonda?
18 Ki Yesus nonota'au kon raian monia inta diá mopia tatua, dá Sia nolibó: "Nongonu sim mo'ikow im monungkuḷbí ko'i-Nakó? Hei mo'ikow intau mita inta diá motulid ing gina?
19 Yo po'ontongkah ko'i-Nakó in doit inta poguboli monimu kom pajak tua!" Mosia nopo'ontong in doit dinar ko'i-Nia.
20 Bo ilibó-Nya ko'i monia, "Gambar bo pais i ine in tana'a?"
21 Mosia notubag, "Gambar bo pais i Kaisar." Dá ki Yesus noguman ko'i monia, "Ogoidon ko'i Kaisar onu inta musti ogoi monimu ko'i Kaisar, bo ogoi ko'i Allah inta musti ogoi monimu ko'i Allah."
22 Nokodongog kon tubag-Nya natua noherang totok i mosia bo mosia minayak nonaḷámai ko'i Yesus.
23 Kon singgai tatua doman, tongonumai intau in Saduki namangoi ko'i Yesus, mosia momayow kon diábí im mobiag bui aka minatoidon. Mosia nolibó ko'i Yesus nana'a:
24 "Pak Guru, ki Musa in noguman, kon aka tobatú intau bo minatoi bo sia diápa kogadí, dá ki utatnya im musti mobuḷoi ko'i baḷunya tatua simbá oyúon ing katurunan i utatnya tatua.
25 Pernahdon nobalí nana'a: Oyúon pitu mogutat, komintan ḷoḷaki. Inta guya-guyang nobuḷoi, ta'e diá no'onggot bo minatoi. Bo lantaran diápa ing katurunannya dá kibaḷunya tatua pinoki pobuḷoinya ko'i utatnya.
26 Ki utatnya tatua minatoi doman takin diápa kogadí. Soáḷ tatua nobalí doman ko'i utatnya mita nodapot ko'i utatnya impitunya.
27 Bo pangabisannya, bobay tatua minatoi domandon.
28 Yo ki ine ing kon sigad nayapitu tatua im mobalí ki buḷoi im bobay tatua ko wakutu in singgai kobiagan? Sim mosia komintan bidon notonibuḷoi takinya."
29 Ki Yesus noguman ko'i monia nana'a: "Mo'ikow nion no'itaḷá im pororai monimu, sin diá komangalean monimu im bonu in Alkitab bo kawasa i Allah!
30 Ko wakutu ing kobiagan bui intau, diábí im mobuḷoi bo diábí im pobuḷoion sim mosia im mobiag naonda bo malaekat kon soroga.
31 Diápa degá kinobaca'an monimu onu inta pinoguman i Allah soáḷ intau minatoi inta biniag bui. Ki Allah noguman nana'a:
32 'Aku'oi ing ki Allah i Abraham, ki Allah i Ishak bo ki Allah i Yakub!' Sia de'emanbí ki Allah in intau minatoi, ta'e ki Allah in intau nobiag!"
33 Intau noántó inta nokodongog kon tua noibog totok kon onu inta sinundú-Nya.
34 Naonda intau mita im Parisi nokodongog, kon intau mita in Saduki inaidan i Yesus diá nokobuká kom bibig monia, mosia noyosipun.
35 Bo tobatú kon sigad monia, inta totok in nonota'au kon hukum i Musa, nolibó sim monungkuḷ ko'i-Nia,
36 "Pak Guru, hukum táonda degá inta totok im moponting kom bonu in hukum i Musa?"
37 Tubag i Yesus ko'inia, "Kotabidon ki Tuhan, ki Allahmu bo tongádon Sia im musti sumba'an monimu totu-totúu.
38 Tuata in hukum inta totok im moponting.
39 Bo hukum induanya, inta notongkai intua: Kotabidon in tumpaḷa intau náonda bo kotabimu kon awakmu tontaní.
40 Hukum doyowa tana'a inta nobalí dodoyonan im bayongan hukum i Musa bo buk in nabi mita."
41 Wakutu intau mita im Parisi noyosipunpa makow ki Yesus nolibó ko'i monia,
42 "Aka podudui in raian monimu yo katurunan i ine ki Mesias? Ki Adí i ine in Sia?" Tubag monia ko'i-Nia, "Ki Adí i Daud."
43 Dá Sia noguman, "Aka natua, yo nongonu sing ki Daud inta kinawasa'an in Roho i Allah monangoi ko'i-Nia, 'Ki tuangnya,' ko wakutu in sia nosingog,
44 'Ki Tuhan aindon nobogoi im Pirman-Nya ko'i Tuangku: litúdon kon dotá ing koḷanan-Ku, modapot im bayongan saturumu daiton-Ku potungkud kon tayowon-Mu.'
45 Dá aka ki Daud bo monangoi ko'i-Nia, 'Ki Tuang', yo diábi kuma'an kon akaḷ aka Sia katurunan i Daud?"
46 Diá tobatúmai in nokotubag kon singog-Nya tatua. Bo mulai singgai tua, diádon in tobatúmai mokobalí mopolibó-libómai ko'i-Nia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA