Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa bemanik malik lẽq dengan luwẽq kadu perumpamean,

² manik-Ne, "Kerajaan Sorge nike seumpame maraq niki: Sopoq raje ngaraqang gawẽ jari ngawinang bijene.

³ Raje nike ngutus pelayan-pelayanne ngempoh dengan-dengan saq sampun tepesilaq ojok gawẽ nike, laguq dengan-dengan saq tepesilaq nike ndẽq mẽlẽ dateng.

⁴ Beterus raje nike ngutus malik pelayan-pelayan saq lain. Raje nike bebase lẽq pelayan-pelayanne, 'Sampẽang tipaq dengan-dengan saq tepesilaq nike: Pesajiq lẽq gawẽ nike sampun tesiepang. Sampi dait anak sampi tiang saq paling solah sampun tesembelẽh. Selapuqne sampun tesiepang. Silaq side pade dateng ojok gawẽ ngawinang!'

⁵ Laguq temuẽ-temuẽ saq tepesilaq nike ndẽq ngerunguq ie. Ie pade selapuq lumbar ojok taoqne begawẽan -- araq saq ojok lendangne, saq lainne lumbar ojok taoqne berusahe;

⁶ dait saq lainne bau pelayan-pelayan nike, terus tempuk dait ie pade tematẽq.

⁷ Raje nike jari menggah gati. Beterus ie ngutus tentere-tenterene jari nyematẽq tukang nyematẽq pelayan-pelayanne nike, dait sedut kote ie pade.

⁸ Sesampun nike raje ngempoh pelayan-pelayanne, terus bebase, 'Gawẽ niki sampun tesiepang laguq dengan-dengan saq tepesilaq ndẽq pantes.

⁹ Lalo ojok rurung-rurung belẽq, dait pesilaq dengan seluwẽq-luwẽqne dateng ojok gawẽ niki.'

¹⁰ Jari pelayan-pelayan nike lalo ojok rurung-rurung belẽq, terus ngumpulang selapuq dengan saq daitne lẽq derike, saq solẽh dait saq jahat. Make taoq gawẽ ngawinang nike jari penoq siq temuẽ-temuẽ.

¹¹ Beterus raje nike tame serioq temuẽ-temuẽne nike. Laguq araq serioqne sopoq temuẽ saq ndẽq ngengadu kelambi begawẽ.

¹² Beterus raje nike beketuan lẽq ie, 'Semeton, berembẽ entande jangke bau tame ojok deriki, padahal side ndẽq kadu kelambi begawẽ?' Dengan nike ndẽq tao bejawab.

¹³ Beterus raje nike bebase lẽq pelayan-pelayanne, 'Sẽkoq ime dait naẽn dengan niki, terus tetẽh ie ojok luah lẽq taoq saq peteng dedet. Lẽq derike ie gen nangis dait menderite.'"

¹⁴ Beterus maraq niki entan Deside Isa nutuqang perumpamean nike, "Mule luwẽq dengan saq tempoh laguq sekediq saq tepilẽq."

¹⁵ Beterus dengan-dengan Parisi lumbar dait berunding adẽq ie pade mauq langan nyalahang Deside Isa siq care besoal jawab.

¹⁶ Make ie pade ngutus pengiring-pengiring ie pade parek ojok Deside Isa bareng kance dengan-dengan golongan Herodes. Dengan-dengan nike matur lẽq Deside Isa, "Bapaq Guru, tiang pade nenaoq Pelungguh jujur. Pelungguh ngajahang secare terus terang mengenai langan saq kenaq tipaq Allah, dait nẽnten takut lẽq sai juaq. Sẽngaq Pelungguh nẽnten pilẽq kasih.

¹⁷ Keranaq nike tunas Pelungguh ngendike lẽq tiang pade: Menurut aturan agamente, kanggo napi nẽnten bayah pajek lẽq Kaisar?"

¹⁸ Deside Isa wikan maksut jahat dengan-dengan nike, make Ie bemanik lẽq ie pade, "Hai, dengan-dengan munapik! Kembẽq side pade beniat boyaq-boyaq kesalaqan adẽq bau nyalahang Tiang?

¹⁹ Cobaq petitoqang lẽq Tiang sopoq kẽpẽng perak saq side pade kadu bayah pajek!" Beterus dengan-dengan nike ngaturin Deside Isa sopoq kẽpẽng perak.

²⁰ Deside Isa beketuan lẽq ie pade, "Gambar dait aran sai niki?"

²¹ "Gambar dait aran Kaisar," jawab ie pade. Make Deside Isa bemanik tipaq ie pade, "Lamun maraq nike serahang ojok Kaisar napi saq jari dowẽn Kaisar, dait tipaq Allah napi saq jari dowẽn Allah."

²² Waktu ie pade dengah penjelasan nike ie pade bengaq. Ahirne dengan-dengan nike lumbar bilin Deside Isa.

²³ Lẽq jelo nike ẽndah, araq dengan-dengan Saduki parek ojok Deside Isa. Ie pade golongan saq bedowẽ pendapet bahwe dengan ninggal ndẽq gen idup malik.

²⁴ Ie pade metakẽn lẽq Deside Isa, "Bapaq Guru, Musa ngajahang maraq niki: Lamun araq dengan mame ninggal, dait ie ndẽq bedowẽ bije, semetonne harus merariq kance bebalune adẽq ie bau ngebẽng keturunan tipaq dengan saq sampun ninggal nike.

²⁵ Laguq lẽq antare tiang pade araq pituq dengan besemetonan. Saq sengake merariq, terus ninggal ndẽq bedowẽ bije, beterus bebalune tebait siq semetonne.

²⁶ Semetonne nike ẽndah ninggal ndẽq bedowẽ bije. Maraq nike ẽndah lẽq semetonne saq ketelu dait seterusne jangke saq kepituq.

²⁷ Ahirne dengan nine nike ẽndah ninggal.

²⁸ Lẽq waktu dengan ninggal teidupang malik, sai semame dengan nine nike? Sẽngaq kepituq-pituqne sampun merariq kance ie."

²⁹ Jawab Deside Isa, "Side keliru gati, sẽngaq side pade ndẽq ngerti Kitab Suci dait kuase Allah.

³⁰ Sẽngaq ẽraq lamun dengan ninggal teidupang malik, ie pade ndẽq gen merariq malik, laguq ie pade gen idup maraq malaẽkat lẽq sorge.

³¹ Napi side pade ndẽqman bace napi saq temanikang siq Allah mengenai dengan ninggal teidupang malik? Allah bemanik,

³² 'Tiang niki Allah Ibrahim, Allah Ishak dait Allah Yakub.' Allah nike nẽnten Allah dengan ninggal, laguq Allah dengan saq idup!"

³³ Sewaktu dengan luwẽq nike dengah penjelasan Deside Isa, ie pade takjub siq pengajahan-Ne.

³⁴ Sewaktu dengan-dengan Parisi pireng bahwe Deside Isa sampun miaq dengan-dengan Saduki ndẽq tao bejawab malik, ie pade bekumpul.

³⁵ Salaq sopoq lẽq antarene, ahli Taurat, ie metakẽn lẽq Deside Isa jari boyaq kesalaqan-Ne:

³⁶ Ie bebase, "Paq Guru, prẽntah napi saq paling utame lẽq dalem Hukum Taurat?"

³⁷ Jawab Deside Isa, "Kasihin Tuhan Allahde siq segenep atẽnde, dait siq segenep jiwende, dait siq segenep akal budinde.

³⁸ Nike prẽntah saq utame dait saq paling penting!

³⁹ Prẽntah kedue pade maraq saq utame nike: Kasihin sepadende manusie, maraq side ngasihin diriqde mẽsaq.

⁴⁰ Selapuq isi Hukum Taurat dait kitab nabi-nabi dasarne lẽq kedue prẽntah nike."

⁴¹ Sewaktu dengan-dengan Parisi masih bekumpul lẽq derike, Deside Isa beketuan lẽq ie pade,

⁴² "Napi pendapet side pade mengenai Almasih? Ie keturunan sai?" "Keturunan Daud," jawab ie pade.

⁴³ Deside Isa bemanik lẽq ie pade, "Lamun maraq nike, kembẽq Roh Allah ngicanin Daud ilham jari nyebut Almasih nike 'Junjungan Saq Mulie'? Sẽngaq Daud bebase,

⁴⁴ 'Tuhan sampun bemanik lẽq Junjungan tiang: Melinggih lẽq sedi kanan Tiang, jangke Tiang piaq musuh-musuh Deside takluk lẽq Deside.'

⁴⁵ Jari lamun Daud nike nyebut Almasih nike, 'Junjungan Saq Mulie', segerah Junjungan Saq Mulie nike keturunan Daud?"

⁴⁶ Ndẽq araq sopoq dengan juaq saq tao jawab Deside Isa. Dait lẽman jelo nike ndẽq araq dengan bani metakẽn napi-napi lẽq Deside Isa.

Matius

Video Matius 22

Ikuti Kami:

KONTAK | PARTISIPASI | DONASI