Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I Yesus nombatesa porapa ntanina ka pakeni *ntoYahudi. NiuliNa,
2 "Poparenta nu Alatala nasimbayu eva porapa hitu. Naria saito magau novia posusa poboti ka anana langgai.
3 Nituduna batua-batuana hau mompokio pura-pura tona anu nigagana makava ri posusa haitu Tapi ira nigaga haitu, ledo ria saitoa nadota hau.
4 Jadi magau nombatudu batua-batua ntanina ante tevai ivei: 'Koi ulika ira nigagaku, nasadia puramo. Japi bo ana-ana japi toboyana naupumo nisambale, bo nasadia puramo. Kamaimo tumai ri posusa!'
5 Tapi tona nigaga ledo ntoto nompariara pegaga haitu. Ira aga hau nantui bagora mboto. Naria hau ri taluana bo naria hau nombaurusi pogadena,
6 roara ntanina aga nosaka batua-batua nitudu nu magau haitu pade nibobara bo nipatesira.
7 Nangepe anu najadi, nagigi mpuumo rara magau. Nituduna tantara-tantarana hau mompatesi topepatesi haitu bo mombatunju ngatara.
8 Naliutaka haitu nipokiona vai batua-batuana bo nanguli ka ira, 'Nasadiamo posusa poboti, tapi tona nigagaku ledo masipato makava.
9 Jadi koimo hau ri dala-dala jama bo isema-sema raposinggavakamiu, gagamo ira tumai ri posusata hitu.'
10 Jadi haumo batua-batuana ri dala-dala jama nompasiromu pura-pura tona niposinggavakara, tona nabelo, bo tona nadaa sampe naponu puramo banua posusa haitu ante torata.
11 Bo nesuamo magau manggita torata-torata. Ri tatanga ntorata hamai nikitana saito tona ledo nobaju pakea posusa.
12 Nekutana magau nte tona haitu, 'Vega, nakuya tano komiu nesua ri sii ledo nopakea anu masipato rapake niposusa?' Tapi tona haitu ledo notingo.
13 Bo nanguli magau ka batuana, 'Soomo palena bo kadana bo tedeakamo ia hau ri savalikuna ri ponturo nalanda. Hamai tona notumangi bo nasinggiki bagara ante kasusara.'"
14 Bo i Yesus nompakaupu porapaNa ivei: "Nadea tona nipokio, tapi aga sakide nipelisi."
15 Naupu haitu bara sako-ndua *toFarisi nasiromu notesaki anu rapoviara ala mamala mombaopa i Yesus motesa.
16 Nitudura bara sako-ndua ana-anagurura bo bara sako-ndua tona nosabingga nte Magau Herodes hau nte i Yesus bo manguli ivei: "Guru, nisani kamimo Komiu tona nanoa. Komiu nompatuduki pakalanto dota nu Alatala ka manusia. Komiu ledo naeka ante isema-sema sabana Komiu ledo nompelenje.
17 Jadi uli ka kami panggavaMiu. Nangoseaka Atura-atura agamata, masipato kita mombabayari balasitee ka Magau Mbaso Kaisar atau ledo?"
18 Tapi nisani i Yesusmo patujura nadaa. Haitu sampe niuliNa, "Komiu tobelo ri sumba! Nakuya komiu nompasimbuku mombaopa tesaKu?
19 Popakita ka Yaku sampeka doi salaka anu nipakemiu mombayari balasitee." Jadi nipopakitara ka Ia sampeka doi haitu.
20 Nekutana i Yesus, "Lenje bo sanga isema nigambara ri doi hitu?"
21 Nesana ira, "Lenje bo sanga Magau Mbaso Kaisar." Jadi nanguli i Yesus ka ira, "Ane ivesia, dekei ka Magau Mbaso anu masipato radekei ka Magau Mbaso, bo dekei ka Alatala anu masipato radekei ka Alatala!"
22 Nangepe pesana i Yesus haitu, nokumaa mpuumo ira. Jadi kaupuna nalaimo ira.
23 Eo haitu muni naria bara sako-ndua *toSaduki nakava netingu nte i Yesus. ToSaduki nomparasaya tona namate ledo matuvu mpanjili bara maipia.
24 Nipekutanara nte i Yesus, "Guru, Nabi Musa nompatuduki ivei: Ane maria langgai namate ledo noana, sampesuvuna langgai kana mompoberei timbalana haitu ala moana bo ana haitu rareke muli nu sampesuvuna anu namate.
25 Naria nte kami tona nosampesuvu papitu langgai bayangi. Lumbuana noberei tapi dopame ira njamboko noana, namatemo ia. Naupu haitu timbala haitu nipoberei ntuei nu langgai.
26 Dopame noana, namate munimo tueina haitu. Bo ivesia muni najadi ante tuei katataluna sampe ri tuei kapapituna.
27 Kaupuna namate munimo mombine haitu.
28 Jadi tempo bara maipiapa, ane tona namate matuvu mpanjili, mombine haitu majadi berei isema, apa ia nipobereira pura-pura?"
29 Nesana i Yesus, "Nasala mpuu komiu sabana ledo nisanimiu isi Buku Gasa, bo ledo muni nisanimiu kuasa nu Alatala.
30 Tempo tona namate matuvu mpanjili bara maipia, katuvura masimbayu eva *malaeka-malaeka ri suruga, ira domo moberei.
31 Berimbamo? Natantu nibacamiu anu nitesa nu Alatala riara Buku Gasa, haitumo tona namate matuvu mpanjili.
32 Nau nasaemo kamate i Abraham, i Ishak bo i Yakub, Alatala nanguli, 'Yakumo Alatala nisomba i Abraham, i Ishak bo i Yakub.' Batuana, ira da natuvu bo nombasomba Alatala. Apa nisanita Alatala ledo nisomba ntona namate tapi Ia nisomba ntona natuvu."
33 Nangepe pesana i Yesus haitu, nokumaamo todea ka pepatudukiNa.
34 Tempo toFarisi nangepe kareba toSaduki domo nokanano sabana nidagi i Yesus, nasiromumo ira.
35 Bo saito ira guru agama nompasimbuku mombaopa tesa i Yesus. Nipekutanana ivei:
36 "Guru, lako ri pura-pura parenta ri Atura agama, umbana nopoko ntoto?"
37 Nesana i Yesus, "Potovemo Alatala Tupumiu ante mpuu-mpuu raramiu, ante pura-pura noto mpekirimiu, bo ante pura-pura pokainggumiu.
38 Haitumo parenta pamulana anu nopoko ntoto.
39 Bo parenta karanduana nasimbayu ante parenta pamulana ivei: Potovemo singgamanusiamiu nasimbayu eva komiu nompotove karomiu mboto.
40 Pura-pura Atura agama bo pepatuduki nu *nabi-nabi nggaulu nopuna lako ri randua parenta haitu."
41 Tempo toFarisi da nasiromu hamai, i Yesus nompekutana ira,
42 "Berimba panggavamiu? Muli isema Magau Topepakasalama anu nijanji nu Alatala nggaulu?" Nesana ira, "Muli Magau Daud nggaulu."
43 Nanguli i Yesus, "Ane ivesia, nuapa sabana Magau Daud nanguli Topepakasalama haitu Puena? Apa ante pekeniaka Nosa Gasa nu Alatala, i Daud nanguli ivei:
44 Tupu nanguli ka Pueku,
45 Jadi ane i Daud mboto nanguli Magau Topepakasalama haitu Puena, berimba sampe rauli Ia muli Magau Daud?"
46 Ledo ria saitoa tona namala nompesanaka i Yesus. Bo nompamula lako ri eo haitu, domo naria tona nabia nombaopa tesaNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA