Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu manganto’oka wo’u rapa resi kepala- kepala nto pampue pasi to Yahudi to aliran Parisi, Ia manganto’o,
2 “I Pue Allah mawali Makole nto lino maya raporapaka ewa si’i. Rapanya re’e samba’a makole to mangika roa tempo paporongo nu ananya to langkai.
3 Wali makole etu roomo mangadinsi tau boros see sira dama’i mantako. Wali ane ratamo temponya roa, makole etu mampokau to papolaonginya yau damampokio tau to roomo radinsi etu, manganto’oka sira mai mangkoni. Pei tau to radinsi etu bo’onya ma’i.
4 Wali makole etu mampokau wo’u to papolaonginya to yusa. Ia manganto’oka sira, ‘To’oka tau to radinsi etu, “Mai mangkoni ruyu apa sigenamo pangkoni. Sapingku to pongka pasi ana nsapi to maboko roomo ratunu pasi samparia to yusa roomo seja rapasigena.”’
5 “Wali to papolaong makole etu yau mangamporata gombo makole etu resi tau to radinsi. Pei tau etu taa kojo mampodongeka. Re’e sira to yau njo’u nawunya pasi re’e seja to yau njo’u kios nsira.
6 Panewa toronya to taa yau etu, sira mangansoko to papolaong makole pei mangansesai panewa mampopate yau sira.
7 “Wali ojo pangandonge makole mangkonong palaong to naika ntau etu, ia maja’a kojo rayanya. Wali see naka ia mampokau tentaranya yau damampakaja’aka yau samparia tau to mampopate yau pomakaunya etu, panewa mantunju yau kota nsira.
8 Roo see ia manganto’oka wo’u to papolaonginya to yusa, to’onya, ‘Sigenamo pangkoni ri roa mpaporongo si’i pei tau to aku room mangadinsi sira taa maya ma’i mangkoni apa sira mangika palaong to taa masipato.
9 Wali inta njo’u jaya-jaya tikore pei dinsi samparia tau to nurata ngkomi nja’u ria see sira ma’i mangkoni ri roa mpaporongo si’i.’
10 “Wali to papolaonginya yau njo’u jaya-jaya tikore pei mampasiromunaka samparia tau to narata nsira. Tau to napasiromunaka nsira etu re’e to matao pasi re’e seja to maja’a to yau mantako. Wali buke tau ri banua ri tampa roa mpaporongo etu.
11 “Yako etu ma’i makole damangalo’a to pantako etu. Tempo ia mangalo’a etu ia mangkita samba’a tau to pakenya taa masipato rapake tempo roa mpaporongo.
12 Wali ia mampotanaka resi tau etu, ia manganto’o, ‘A’ingku, samparia to pantako to yusa si’i paka mangampake pake to masipato rapake tempo roa mpaporongo, pei pake to si korom taa kojo masipato. Wali wimba nuika ngkorom maya masua rire?’ Ewa wetu napotanaka makole, pei to pantako etu tare mamoni apa tare notonya to maya rato’o.
13 “Wali makole manganto’oka to papolaonginya, ‘Pungu palenya pasi witinya panewa panasok yau ia longko njo’u tampa to mawuri. Nja’u ria tau datumangi-mangi pasi sakangke’i baganginya.’ Ewa wetu nato’o makole.
14 Wali naka pei Aku manganto’oka komi rapa etu, apa boros tau to rasale damawali tau to Makolenya i Pue Allah pei taa boros to rapilis apa taa boros to mampolaika Ia.”
15 Wali ojo karoonya i Yesu magombo etu, to Yahudi to aliran Parisi, sira yau magombo-gombo mangika songka see maya mangakal i Yesu see Ia dasala gomboNya.
16 Wali sira mampokau anaguru to si sira pasi sawei mba’a joa i Makole Herodes yau resi i Yesu. Rata resi Ia sira manganto’o, “Pa’a Guru, kami kunsani Komi tau to monso gomboMu. Pasi tempo Komi mampotundeka tau pamporani i mPue Allah, tempo etu ojo anu to monso to nuto’o ngKomi. Komi taa ojo mangamomis tau, ojo rani mampakasanang raya nsira. Wali manasa resi kami Komi taa mangampilis tau.
17 Wali see naka kami rani Komi manganto’oka kami ewa wimba pampobuukaMo. Apa i Kaisar, makole nto Roma, ia mampakasaaka kita to Yahudi see kita mangabayar asele, pei palaong to etu bara taa matao raika ane ewa porenta i mPue Allah.Wali kami mampotanaka resi Komi, wimba ane ewa pampobuukaMo, bara singkonong pei porenta i Musa ane kita mangabayar asele resi makole nto Roma etu, bara taa?” Wali etu semo pampotanaka nsira rani mangakal i Yesu.
18 Pei i Yesu mangansani songka nsira to maja’a, wali see naka Ia manganto’o, “O komi to ojo gombomu manoto! Maka pei komi ojo rani mangakal Aku?
19 Poraoka Aku sangkomba doi to biasa rapake mangabayar asele etu.” Wali sira mangkenika Ia sangkomba doi pera.
20 Roo see Ia mampotanaka resi sira, to’oNya, “Gambar nsema to re’e ri doi si’i, pasi sanga nsema to ratulis reria?”
21 Wali sira mangansono, “Kaisar semo.” Panewa Ia manganto’oka sira, “Wali ane ewa see, waika i Kaisar anu to masipato rawaika ia. Pasi pampueka resi i Pue Allah anu to masipato rapampueka resi i Pue Allah.”
22 Wali ojo pangandonge nsira gombo i Yesu etu, sira ipu kojo rayanya. Wali sira yau muni mampiyaika Ia apa taa nakoto mangakal Ia see sala gomboNya.
23 Wali yako etu, eo etu semo, ma’i seja sawei mba’a to Yahudi to aliran Saduki, sira ma’i resi i Yesu. Tau to etu ane ewa panto’o nsira tare tau mambangu muni yako ri kapatenya. Wali ojo karata ntau etu resi i Yesu, sira manganto’oka Ia,
24 “Pa’a Guru, ane ewa porenta i Musa, ane to langkai ia marongo pei roo see ia mate yau taa riana, ane ewa see tukakanya bara tua’inya mangoko wo’u balunya etu. Wali ane sira dua re’e ana, ananya etu darato’oka ana ntau to namate yau etu. Ewa see porenta i Musa.
25 Wali wimba ane ewa sarita si’i. Re’e pitu mba’a tau langkai to sintua’i to maroo ri oyo mami seore. Wali re’e seo to tu’anginya ia marongo panewa ia mate yau taa riana. See naka tua’inya to tondanya mangoko yau balunya etu.
26 Panewa roo see ia seja mate yau pei taa seja riana pasi ewa see seja tua’inya to katogo. Wali sira pitu samparia paka nawali ewa see. Paka mate yau taa riana.
27 Panewa roo see tau we’a etu ia seja mate yau.
28 Wali si’i pampotanaka mami resi Komi. Wimba, ane re’e pu’u temponya tau samparia mambangu muni yako ri kapatenya, tau we’a etu, to imba tau pitu etu to darato’oka rongonya, apa sira pitu sintua’i paka re’e mamporongo ia?”
29 Wali i Yesu manganto’oka sira, “Sala pampobuuka ngkomi apa komi taa mangansani batuanginya tuntu i mPue Allah pasi komi taa seja mangansani ewa wimba kabaenya kuasa i mPue Allah.
30 Apa tempo tau mambangu muni yako ri kapatenya, tempo etu katuwu ntau etu damawali ewa katuwu mpomakau i mPue Allah ndate saruga. Pomakau etu sira taa marongo pasi taa seja rapaporongo, wali tau tempo etu tamo seja marongo.
31 Pei mangkonong tau mambangu muni yako ri kapatenya, wimba komi bara tawa re’e mangabasa gombo i mPue Allah resi komi to ratulis nja’u raya ntuntuNya? Ia magombo mangkonong i Abraham sira togo i Ishak pasi i Yakub. Pei tempo Ia magombo mangkonong sira etu, tempo etu sira togo paka masaem kapatenya yau. Pei nempo ewa wetu Ia tiroo manganto’o,
32 ’Aku semo Allah to napue i Abraham, pasi to napue i Ishak, pasi to napue seja i Yakub. Etu semo gombo i mPue Allah resi komi. Wali kita mangansani i Pue Allah Ia taa napue ntau to mate. Ia napue ntau to tuwu wali manasa nempo roomo namate yau koro i Abraham sira togo i Ishak pasi i Yakub, pei sira tiroowa tuwu ndate saruga apa nato’o i mPue Allah sira tiroowa mampue mampakabae Ia.”
33 Wali tempo tau boros mangandonge anu to napotundeka i Yesu sira etu, sira ipu kojo rayanya. Sira mampobuuka, “Gete, pande pu’u tau si’i!
34 Wali yako etu re’e tau to mampakarebaka resi to Yahudi to aliran Parisi, manganto’o, “I Yesu manganangi gombo ntau to aliran Saduki.” Wali ojo pangandonge nto Parisi kareba etu sira siromu pei yau mangampago i Yesu.
35 Wali ri oyo nsira re’e samba’a to pande kojo ane mangkonong porenta i Musa. Wali ojo karata nsira resi i Yesu, tau to pande etu rani mangakal Ia see Ia manganto’o gombo to sala. Wali see naka tau etu mampotanaka, ia manganto’o,
36 “Pa’a Guru, to imba porenta i Musa to bae kojo batuanginya?”
37 Wali i Yesu mangansono, Ia manganto’o, “Porenta to bae kojo batuanginya, etu semo porenta to manganto’o, ‘Pakabae kojo pamporayang ngkomi resi Pue Allahmu. Pasi biakamo pamporayang ngkomi resi Ia etu damampasilonga katuwumu. Pasi biakamo see yako pamporayang ngkomi resi i Pue Allah, see naka komi mampobuuka kojo Ia.’
38 Etu semo porenta to bae kojo batuanginya. Tare yusa porenta to bae wo’u batuanginya pei to etu.
39 Pasi porenta to kadua, bae seja batuanginya sewaju pei to uyunya etu. To kadua etu manganto’o, ‘Porayang sa’e ewa raika mamporayang koro ngkalio.’
40 Wali porenta to dua etu, to etu semo to bae kojo batuanginya apa samparia porenta i Musa, pasi samparia gombo to nato’o nto pantuntu tuntu i mPue Allah tempo owi, samparia to etu paka porenta to dua etu pu’unya.”
41 Wali ojo karoonya i Yesu manganto’o gombo etu, tempo tiroowa re’e to Yahudi to aliran Parisi siromu nja’u ria, tempo etu i Yesu mampotanaka resi sira, Ia manganto’o,
42 “Wimba pampobuuka ngkomi mangkonong i Kerisitu, Makole parajanji i mPue Allah? Bara wiyaa i nsema Ia?” Wali sira mangansono, “Wiyaa i Makole Daud.”
43 Panewa i Yesu manganto’o wo’u, “Monso pu’u Ia wiyaa i Daud, pei re’e gombo to nawaika i Nosa Mapasing i Daud to natulis i Daud nja’u raya ntuntu i mPue Allah tempo owi. Tempo etu i Daud magombo mangkonong i Kerisitu, ia manganto’o, ‘I Pue Allah magombo resi Puengku, Ia manganto’oka Puengku, to’oNya, “Patundamo ri awengKu ri sambali tondo ngkana sampe rata temponya Aku manganangi baliMu pei mangawaika Komi mangkuasang sira.”’ Etu semo gombo to natulis i Daud. Wali pobuuka ruyu batuanginya tempo ia manganto’o, ‘I Pue Allah manganto’oka Puengku’. Pobuuka gombonya etu apa si’i wo’u pampotanakangKu resi komi.
44 (22:43)
45 Wali Makole parajanji i mPue Allah, nempo wiyaa i Daud, pei i Daud tiroo manganto’oka Ia ‘Puengku.’ Wali ane ewa see, wimba, Makole parajanji i mPue Allah etu Ia bara ojo wiyaa i Daud bara napowimba wo’u Ia?”
46 Wali tempo i Yesu manganto’o gombo etu, tare tau to maya mangansono. Pasi yako ri tempo etu tare tau to makoje rayanya mampotanaka wo’u bara kesaa resi Ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA