Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi sekua' teh Yésus nemada' nedeh dengan luk pinginud, keburi'Neh,
2 "Imet surga mepad kudeng aceh raca' luk nenganau' irau paweh kuan anakneh.
3 Ieh nengecuk demulun-demulunneh amé' nawar lemulun luk pangeh titengneh amé' ku irau ineh; idi ideh ara' amé'.
4 Sekua' teh ieh nengecuk demulunneh luk baken, keburi'neh, 'Do muyuh mada' lemulun luk pangeh tinawar, "Ui pangeh netemina' luk kenen; sapi'-sapi' idi pung-pung baken teh luk melamu pangeh kirat, idi amung-amung pangeh temina'; amé' iko ku irau paweh ineh." '
5 Iamo' ideh na nengerawé tawar ineh idi ideh nenalan. Sebuleng iné' lati'neh, sebuleng iné' pepua'.
6 Lun baken teh nengakem demulun raca' ineh, idi nemebal nedeh, idi nengaté nedeh.
7 Raca' ineh pelaba useh; idi ieh nengecuk lun pebunu'neh amé' ngaté lemulun luk nengaté ineh. Idi ideh nenutung bawangdeh.
8 Idi ieh nenawar demulun-demulunneh, kebalaneh, 'Irau paweh pangeh inau' temina', iamo' lun sakai luk tinawar na mayu.
9 Amé' muyuh inan lisangen-lisangen dalan, idi tuda'-tuda' lemulun luk mepapu' muyuh, do' nawar nedeh amé' ku irau paweh.'
10 Demulun-demulun ineh iné' inan anid-anid lisangen dalan, idi nengamung amung-amung lemulun luk nepapu' nedeh, luk dat idi luk do' pana', idi ruma' lun paweh ineh panu' ku lun sakai peh.
11 "Kareb raca' nesemuet sikal nier lemulun luk pangeh nepamung, ieh nenier aceh lemulun luk na nengayung ku ayung lun paweh.
12 Raca' ineh nengitun neneh, 'O Aca', kudeng apehké iko semuet tungé' dengan na nengayung ku ayung lun paweh?' Idi ieh pirud-pirud peh.
13 Idi kebala raca' ineh kuan demulun-demulunneh, 'Ngaling ticu' idi kukudneh, idi nala' neneh bang dacem luk déi' liang. Su ineh ieh nangi' idi pekatep lipen.'"
14 Kebala Yésus, "Ngaceku mula' luk tinawar, iamo' pawa' luk pinili'."
15 Idi lun Parisi iné' pegayam nakap dalan kudeng apeh ideh miak nutun Yésus.
16 Idi ideh nengecuk anak-anak sekola'deh dengan lun Herodiani teh amé' matun Neneh. Idi kebaladeh Neneh, "Guru, kai kali' Iko seburur lemulun luk matu, idi Iko mada' dalan Allah dengan luk matu, idi na Iko mili' ayu lemulun; ngaceku na Iko ngerawé taga burur lemulun.
17 Ngaceku ineh, do' Iko mada' nekai kudeng apeh terawéMu? Petuluké kai maré usin pupuk kuan raca' Rum, kian na lek?"
18 Iamo' Yésus kali' niatdeh luk dat, idi keburi'Neh, "Ngudehké muyuh nutun Negku, O muyuh lun luk siayu?
19 Maré usin pupuk ineh sirenKu." Idi ideh nenguit aceh sin sirenNeh.
20 Idi kebala Yésus nedeh, "Ayu idéké ini idi ngadan idéké ini teh?"
21 Idi keburi'deh Neneh, "Ini raca' kuan." Idi kebala Yésus nedeh, "Ngaceku ineh, do' muyuh maré kuan raca' anun-anun luk raca' kuan; idi kuan Allah anun-anun luk Allah kuan."
22 Kareb ideh neninger balaNeh, idi ideh pelaba awa. Idi ideh nenecan Neneh, idi neburo peh.
23 Bang aco sineh teh, lun Saduki iné' matun Yésus. (Ieh ineh lun luk mala na luk idi tui ratnan até.)
24 Kebaladeh, "O Guru, Musa pangeh nepebala, 'Kudeng aceh deléi maté, idi na anakneh, do' kinanakneh ngaweh tinula'neh, idi nginul anak kuan kinanakneh.'
25 Idi inan arang uned kai tudu' deléi luk denganak. Idi seluk rayeh nengaweh idi naté, dengan na anak. Idi awanneh ticanneh kuan kinanakneh.
26 Kudeng ineh teh kinanak luk kedueh idi luk keteluh, pad macing luk ketudu'.
27 Idi muci ratnan amung-amungdeh, decur ineh pana' naté teh.
28 Ngaceku ineh, kareb aco tul, awan idéké decur ineh, rat arang tudu' deléi ineh? Ngaceku amung-amungdeh pangeh nengaweh neneh."
29 Iamo' kebala Yésus nedeh, "Muyuh sala' ngerawé ngaceku muyuh na kali' Surat idi lalud Allah.
30 Ngaceku kareb aco tui na ideh ngaweh, idi na ideh barén paweh, iamo' ideh mepad kudeng melaikat luk déi' surga.
31 Idi ratnan lun naté tumui, naké muyuh nemaca' teh luk bila Allah nemuyuh, kebalaNeh,
32 'Ui ini Tuhan Ibrahim, Tuhan Isak, idi Tuhan Yakub'? Allah ineh baken Ieh Tuhan lemulun luk maté, iamo' Ieh Tuhan lemulun luk mulun."
33 Kareb lun mula' neninger balaNeh, ideh mawa ku bada'Neh ineh.
34 Kareb lun Parisi neninger kudeng apeh Yésus nemebpeng lun Saduki, macing ideh pirud, idi ideh nepamung.
35 Idi inan sebuleng rat arangdeh, ieh ineh guru Ukum, idi ieh nengitun Yésus, sikal nutun Neneh, keburi'neh,
36 "O Guru, sapehké ukum luk meluun rayeh ratnan Ukum Musa?"
37 Idi Yésus nepebala neneh, "Do' iko mawa inan Tuhan Allahmu dengan amung niatmu, idi amung ulunmu, idi amung terawému.
38 Ini ukum luk meluun rayeh idi luk atun.
39 Ukum luk kedueh mepad kudeng ini teh, ieh ineh, Do' iko mawa nelun denganmu mepad kudeng bururmu sebuleng.
40 Amung Ukum Musa idi bala nabi-nabi pekatu ratnan dueh ukum ini.
41 Kareb lun Parisi nepamung teh, Yésus nengitun nedeh, keburi'Neh,
42 "Kudeng apehké terawé muyuh ratnan Keristus? Anak idéké Ieh?" Idi keburi'deh Neneh, "Anak Daud."
43 Idi kebala Yésus nedeh, "Kudeng pieh kudeng ineh, kudeng apehké Roh nengegio niat Daud pad ieh neten Neneh Tuhan? Ngaceku Daud nepebala,
44 'Tuhan nepebala kuan Tuhanku, Tudo Iko pa tinuehKu, pad Ui nganau' amung bunu'Mu pa liang kukudMu.'
45 Kudeng Daud neten Neneh Tuhan, kudeng apehké Keristus mangun ku Anakneh?"
46 Idi seburur pana' na miak ngor bala Yésus dengan sebila' bala pana'. Idi rat pad aco sineh na lemulun luk mekuu' ngitun Neneh baruh teh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA