Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ma Jo'oungu ma Dutu wopareta 'isi'ade-'ade konee: 'O raki ma dutu ka 'o ngoru-ngorumikasi de wotagi wononu 'o nyawa la yomanarama 'awi 'anggur ma betuoka.

² Gedagee womodekoka yomaka'aturu wofangu 'onaka 'o wange moi 'o pipi 'o saaka 'o ngai moi, de wosuloko yomanarama.

³ Poilia 'o gagini 'idudungu de ma raki ma dutu gu'una wotagioli, de wakimake yamuruo naga 'o pasarioka yosomoaku.

⁴ De wongose 'onaka, 'Tagi niomanarama 'ai rakioka; 'asa tinikula nia sewa 'imakadaenoka.'

⁵ Ge'enaka de yotagiokau. 'O wange 'ikorona de 'o wange 'imasiniporo, wotagioli de koge'enali mita wodiai.

⁶ De 'o wange 'alo, wotagioli de kawakimakesi yosomoaku, de wosano, ''Ido'oa so ngini kanimago-gogere 'o wange yamo-moi?'

⁷ 'Ona yosango, 'Sababu komoiwa misewa miomanarama.' Ge'enaka de ma raki ma dutu wongose, 'Nako koge'ena, de tagi niomanarama 'ai rakioka.'

⁸ 'Iobirou, de ma raki ma dutu wongose yoma-manarama manga balusika, 'Tagi naki'asoko yoma-manarama de manga sewa nofangu 'ikurue gee yotu-tu'uruno yoboa, sigado gee yosira-sirano.'

⁹ Ge'enaka de yoboa yoma-manarama gee yokurue 'o wange 'alo. 'Ona yomadamake manga sewa 'o nyawa moi 'o pipi 'o saaka ngai moi.

¹⁰ Ge'enaka de yoboa mita yomanarama gee ka 'o ngoru-ngorumikasi yokurue. 'Ona yomangano-nganono dua 'ona 'ifoloi 'iamoko yamadamake, 'ena momongo 'ona mita 'o nyawa moi ka koge'enali.

¹¹ Gedagee yadawongo manga sewa, de yokurubungu ma raki ma dutuka,

¹² yongose 'ato, 'Yotu-tu'uruno yoboa, 'ona yomanarama ka 'o takoro moi. 'Ena ngomi 'o wange moi mimasidowoerika, ma ngona nofangu 'onaka kaimatero de ngomino!'

¹³ Ma bairi ma dutu gu'una wosango yoma-manaramika wimoi, ''Esa moi, ngoi kokiawa tasowono ngonaka. Ngonau ma sirete nosimotekokau nomanarama 'o wange moi 'ani sewa 'o pipi 'o saaka ngai moi?

¹⁴ Nee na'ese to ngona ni sewa la notagiou. Ngoi tomau takikula 'o nyawa yotu-tu'uruno gee, kaimatero de to ngini.

¹⁵ Koidadiwa? 'ai kia sonaa 'iodumu ne'ena ta'aturu moteke ngoi? Bolo notaleana sababu 'ai singina 'ima'ai?'

¹⁶ Koge'enali mita 'o nyawa yotu-tu'uru 'asa 'idadi yosira-sira, de yosira-sira 'asa 'idadi yotu-tu'uru."

¹⁷ Ma 'orasi 'o Yesus wosikaie 'o Yerusalemude, de wi do-dagi ma sigoronaka de wi do-domoteke yamogiooko de modidi waki'asokino ka 'onaka, de wakisidemo,

¹⁸ "Nio'isenika! Ne'ena posikaie 'o Yerusalemude, kadaku dua de 'o Nyawa ma Ngowaka wisisarakani 'o 'imam ma saekika de 'o 'agamaka yodoto-dotoika. Ge'enaka de wihukumu wiso-songene.

¹⁹ 'Asa deika wisisarakani gee ko 'o Yahudiokawa ma nyawaka. 'Ona 'asa wisikahaga, wipesana, de wisidele 'o salipoka. Duga ma wange sa'angeka, 'asa wisimomikoli."

²⁰ Ge'enaka de 'o Zebedeus ma wekata de mi ngowa-ngowaka yaino 'o Yesusino. 'O Yesus wi bionoka de mobukuku, ma ngale moga'asoko 'o barangi moi.

²¹ 'O Yesus wosano, "'Okia noparaluu, 'Esa?" De muna mosango, "Ngoi tomau gee dua, 'Aba, nokoana, de 'ai ngowaka yamididi no'ona yogogere 'ani gubalioka de ni giniraoka."

²² 'O Yesus wongose, "Ngini konianakowa 'okia nioga'asoko. Nia'akunoka? niamoku 'o sangisara ma dubuso gee dua 'isoka ngoi tamoku?"

²³ 'O Yesus wongose, "Ma goungu ngini mita dua nia'okere 'ai sawokoka, ma gee dua nago'ona yogogere 'ai gubalika de 'ai ginirakoka, ge'ena ko ngoiwa tositantuu. 'O ngii ge'ena ma nyawa 'ai Dea wakisitantuuokau."

²⁴ Gedagee 'o do-domoteke yamogiooko yo'isenoka ge'ena, de yongamo 'o riaka dodoto ma dutu yamididika go'ona.

²⁵ Sababu ge'ena 'o Yesus wakikoki'asokino de wakidongose, "Ngini nianakokau, gee ma Jo'oungu ma Dutu kowinako-nakowa yakipa-pareta, manga kawasa yahalebiru de 'o nyawa yola-laagomo manga kawasa yokido-doko.

²⁶ Ma ngini koidadiwa koge'ena. Nago'ona yomau yoamoko nginioka ne'ena, salingou yole-leleani nginika.

²⁷ De nago'ona nginioka naga yomau yomadadi ma di-disiraka, salingou yodadi 'o yongosi,

²⁸ 'isoka 'o Nyawa ma Ngowakoli gu'una. 'Una woboa, ge'ena ma ngale kowileleaniwa, ma 'ena woleleani de 'awi 'ahu wokula, la watuusu 'o nyawa gudai manga sowono."

²⁹ Ma moi ge'ena 'o Yesus de wi do-domoteke yamada 'o Yerikho ma kotaka, de manga gudai 'o Yesus wimoteke.

³⁰ 'O ngekomo ma gagaroka yopilo-piloko yamididi yogogerie. Gedagee yo'isenoka 'o Yesus woboa, de yomapoa-poaka, "Ee Dautu wi Ngowaka! Minidora ngomi!"

³¹ 'O nyawa yoku-kudai ge'enaka gee yakigorese la yomaogoro. Ma 'ona kayodaamoko monga yomapoaka, "'Aba, 'o Dautu wi Ngowaka, minidora ngomi!"

³² Ge'enaka de 'o Yesus womaogoruku so waki'asokino de wosano, "Niomau 'okia todiai nginika?"

³³ 'Ona yosango, "'Aba, ngomi miomau mimasimake!"

³⁴ 'O Yesus wakisingina, so wa'ao manga akoka, de kage'ena de yomasimakekau. Ge'enaka de yomotekokau de 'o Yesus.

Matius

Video Matius 20

Ikuti Kami:

KONTAK | PARTISIPASI | DONASI