Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ianna mangparentamo Puang Allataala susi Raja, wa'ding dipasangrapang tomangbara'bah anggoro' melambik male nnangah tokumande gaji la mangjama jio bara'bahna.

² Ia tonna sipatuimi to gajinna mesa' dinar sangngallo, nasuami mangjama jio bara'bahna.

³ Ia tonna tatte' kaseramo, malemi lako pasa' joo ampu bara'bah, na ngkita ba'tu pira-pira tosumongge'-mongge' bang jio.

⁴ Nakuamo ngkuanni, 'Ia ammimadoang kumande gaji, male kamu' lako bara'bah anggoro'ku'. Sitinaja to gaji.'

⁵ Malemi sola ngasan mpangjamanni. Susi too tonna tatte' sangpulo duamo na tatte' tallu karuen, male omi joo ampu bara'bah nnangah tokumande gaji.

⁶ Na agi-agi tatte' lima karuen, male omi, nannampa' unapa tosumongge'-mongge', nasaba' te'dai jaman. Mekutanami lako nakua, 'Ciapari misijenjenan bangra tangmangjama?'

⁷ Mebalimi tuu lako tau nakua, 'Te'da jaman kiampa'.' Nakuamo, 'Ia ke susii tuu, male lako kamu' bara'bah anggoro'ku' mangjama.'

⁸ Ia tonna kabuhmo allo, nakuanmi ampu bara'bah to bandoro'na, 'Tambaimi tuu lako tokumande gaji, nadipagaji. Bajahhi jolo' to undinna mentama, namane' ia to jolona nasitarruhna.'

⁹ Ratumi to tomangjama mammula tatte' lima. Pada natarimami to gajinna simesa' dinar.

¹⁰ Ratu todami to mentama melambi' mangjama. Nasangami kumua te'da na la mesa' manda dinar natarima, apa nang mesa' bang unari dinar dibenni.

¹¹ Ia tonna tarimami, sipangnuku-nukuanmi lako ampu bara'bah nakua,

¹² 'Ia tee mai to mentama tatte' lima, sangjangra ia mangjama. Na ia tee kami' mangjama mabanda'kan siupuh allo nala'da' toopakan allo, na la pada bang una ia dibenkan!'

¹³ Mebalimi joo ampu bara'bah lako sala mesa'na nakua, 'Ee, mane, te'da aku' kusala lako kalemu. Tangmusitujuiraka kumua mesa' dinar kupagajianko sangngallo?

¹⁴ Alami tuu gajimmu mumale. Canning atingku' aku' mbenni tuu lako to undi mentama pada to kubenko.

¹⁵ Te'daraka kusipato' mpugaukki to pakkaeloranku'? Ciapari mumangngimburu ke mamasena'?'"

¹⁶ Nakua omo Puang Isa, "Susimi joo ia to disanga tomala'bih la mentomajiong na ia to disanga tomajiong la mentomala'bih."

¹⁷ Ia tonna malemo Puang Isa de' kota Yerusalem, natambai mesami to sangpulo dua anak gurun-Na, nakuanni,

¹⁸ "Pesa'dingngii! Mangngujumiki' de' kota Yerusalem tee too. Na ia tee Aku', Anak Mentolino, la dipangngolona' lako kapala imang sola lako guru agama, nara'tahhi la mbunona',

¹⁹ namane' mpangbenna' lako bangsa tangngia to-Yahudi nacapa'-capa'na', narambina', namane' mpampangna'. Apa ia ke allo mangpentallun, la dipatuo pole'na'."

²⁰ Ratumi indona Yakub ssolan Yakub na Yahya lako Puang Isa, namessuju' jio olo-Na, nasaba' den peta'danna.

²¹ Nakutanaimi Puang Isa nakua, "Ee indo', denraka parallunta'?" Mebalimi nakua, "Ie', ia ke mangparentamiki' susi Raja keanu', ia tee anakkaku' sola dua ke wa'dingngi tamangparenta sola, mesa' jio sa'de kanan-Ta' na mesa' jio sa'de kairin-Ta'."

²² Nakuamo Puang Isa, "Te'da miissenni to apa mipeta'da. La misararaka mpuparri'i to kamaparrisan-Ku'?" Mebalimi nakua, "Ie', kisara Puang."

²³ Nakuamo Puang Isa, "Nang la mipumaparri' ia to kamaparrisan-Ku'. Apa ia to la cumadokko jio kairi kanan-Ku', tangngia issen-Ku'. Ia joo pura napattantumo ia Ambe'-Ku' Puang Allataala, inda to la napajio."

²⁴ Ia tonna issenmi to sangpulopa anak gurun-Na Puang Isa joo peta'danna Yakub sola Yahya, magalli ngasanmi ngkitai.

²⁵ Iamo joo natambai ngasanni Puang Isa to anak gurun-Na nakuanni, "Miissen kumua ia to tomangparenta lan lino to tangngkalaja' Puang Allataala mpandasa bang taunna. Na ia to tomapangka' mangkada mesa bang.

²⁶ Apa te'da miwa'ding susi joo. Sibalikanna, ia to tomadoang menjaji to toditaratte' la menjaji todisua-sua.

²⁷ Na ia ammiden madoang la menjaonan, parallu mpamajiongan kalena susi kaunan.

²⁸ Susi tee Aku', Anak Mentolino, te'da kuratu tama lino la massua, apa ratura' la menjaji todisua-sua sola la mpangben sunga'-Ku' kumua nadila'bak to tolino jio mai dosana."

²⁹ Ia tonna messunmo Puang Isa jio mai kota Yerikho, buda tau undi nturu'i.

³⁰ Denmi dua tobuta cumadokko jio randan lalan. Ia tonna sa'dingmi sola dua kumua liumi to Puang Isa, metamba-tambami nakua, "Oo Puang, bati'na Raja Daud, takamaseikan dikka'!"

³¹ Nakagallimi tobuda nasuai kamma'. Apa la'bi naandongngi ori metamba nakua, "Oo Puang, bati'na Raja Daud, kamaseikan dikka'!"

³² Kendenmi Puang Isa natambaii. Nakutanaimi nakua, "Apara to mikadoangngi la kupugauk lako kalemi?"

³³ Mebalimi nakua, "Oo Puang, madoangkan pakita."

³⁴ Massemi penawan-Na Puang Isa, nakaka'i to matanna sola dua. Ta'pa pakitami silalona anna undi nturu' Puang Isa.

Matius

Video Matius 20

Ikuti Kami:

KONTAK | PARTISIPASI | DONASI