Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Parkaro Karajaan Sarugo tu, ka adaannyo sarupo jo parumpamoan nan bakcando iko: Ado surang urang nan punyo parak anggur, subuah-subuah inyo payi kaluwa, untuak mancari urang nan ka bakarajo di parak anggurnyo.

² Sasudah paretongan sasuwai, inyo mambayie urang nan ka bakarajo tu, sapitih perak sahari, mako inyo suruahlah urang tu bakarajo di parak anggurnyo.

³ Pukua sambilan pagi, nan punyo parak tu payi pulo mancari urang, inyo manampak babarapo urang nan indak bapaadok di pasa.

⁴ Bakatolah inyo kabake urang-urang tu, 'Payilah angku-angku bakarajo di parak anggur ambo. Ambo agiah angku-angku upah nan sasuwai.'

⁵ Urang-urang tu pun bi payi. Pukua duwo baleh tangah ari, jo pukua tigo sanjo, nan punyo parak tu kaluwa pulo untuak mancari urang nan ka bakarajo sarupo jo nan cako.

⁶ Kiro-kiro pukua limo sanjo, inyo kaluwa pulo, inyo manampak ado juwo lai urang nan indak bapaadok. Inyo batanyo kabake urang-urang tu, 'Baa mangko angku-angku indak bi bakarajo, baa mangko tagak-tagak sajo sahari baneneng disiko?'

⁷ Urang-urang tu bi manjawab, 'Indak ado urang nan ka mambawok kami bakarajo.' 'Jikok baitu,' kecek nan punyo parak tu, 'payilah angku-angku bakarajo di parak anggur ambo.'

⁸ Kutiko arilah sanjo, nan punyo parak tu mangecek kabake manduanyo, 'Imbaulah urang-urang nan bakarajo tu, bayielah upahnyo surang-surang, muloi dari urang nan masuak paliang kudian, sampai ka urang nan masuak paliang dawulu.'

⁹ Mako bi tibolah urang-urang nan muloi bakarajo dari pukua limo sanjo. Satiyok urang tu bi manarimo sapitih perak.

¹⁰ Kudian bi tibo pulo urang-urang bakarajo nan dibayie sajak pagi. Inyo manyangko, inyo ka manarimo labiah banyak. Tapi ruponyo inyo dibayie hanyo sapitih perak pulo.

¹¹ Dikutiko manarimo pitih tu, inyo bi mambirutok kabake nan punyo parak:

¹² 'Urang-urang nan tibo kudian, inyo sajamnyo bakarajo. Sadangkan kami bakarajo sahari panuah, dilantak dek angek matoari, tapi angku ma agiah inyo samo banyak jo kami!'

¹³ Nan punyo parak anggur tu manjawab, kabake salah surang dari urang nan bakarajo tu, 'Oih sanak, ambo indak basalah doh kabake angku. Tadi pagi kito lah supakaik, baraso angku namuah manarimo upah sapitih perak untuak bakarajo sahari, iyo ndak?

¹⁴ Nah apo juwo lai, ambiaklah pitih upah angku tu, pulanglah. Ambo iyo nak mambari upah, sabanyak nan ambo agiahkan kabake angku tu, untuak urang nan masuak kudian.

¹⁵ Apokoh ambo indak buliah mampabuwek sakandak ati ambo, ambo jo arato ambo sorang? Atau angku bingik, dek karano ambo bamurah ati?'"

¹⁶ Sasudah tu Isa Almasih bakato pulo, "Baitu pulolah urang-urang nan kudian, ka manjadi nan tadawulu, urang-urang nan dawulu, ka manjadi nan takudian."

¹⁷ Kutiko Isa Almasih sadang manuju ka Yerusalem, di tangah jalan, Baliau ma imbau kaduwo baleh urang pangikuik-Nyo untuak bakumpua, manyisiah dari urang nan banyak. Baliau bakato ka pangikuik-Nyo tu,

¹⁸ "Dangakanlah apo nan Ambo katokan ko! Kito kiniko sadang manuju ka Yerusalem. Tibo disinan Anak Manusia ka disarahkan kabake imam-imam kapalo, sarato jo ka guru-guru agamo. Sudah tu Inyo ka di ukun mati,

¹⁹ kamudian Inyo disarahkan kabake urang-urang nan indak urang Yahudi. Urang-urang tu ka mampamain-mainkan Inyo, ka ma ajab Inyo, sarato jo ka manyalibkan Inyo. Tapi di ari nan katigo, Inyo ka di iduikkan baliak."

²⁰ Kudian urang rumah pak Zebedeus tibo manamui Isa Almasih jo anak-anaknyo bagai. Di adok-an Baliau inyo sujuik untuak mamintak sasuatu.

²¹ "Apo kiniko nan amai mintak" tanyo Isa Almasih. Ranggaek tu manjawab, "Ambo ko niyo, kok dapek isuak jikok Angku lah manjadi Rajo, anak ambo nan baduwo ko, surang duduak di sabalah kida, nan surang lai di sabalah suwok Angku."

²² Isa Almasih bakato, "Amai ko, jo angku-angku ko, indak tantu dek inyo doh, apo nan inyo mintak, asa banamo ka bamintak sajo, layi ka lanteh angan maminun isi cawan sansaro, nan musti ka Ambo minun?" "Layi," jawabnyo.

²³ Baliau bakato, "Batua angku-angku ka minun juwo dari cawan sansaro Ambo tu. Tapi, tantang siya nan ka duduak di sabalah kida, atau nan ka duduak di sabalah suwok Ambo, indak Ambo doh tu nan manantukan. Kaduwo tampaik tu adolah untuak urang-urang nan lah ditantukan dek Bapak Ambo."

²⁴ Kutiko ka sapuluah pangikuik nan lain, mandanga kajadian tu, inyo bi bangih kabake urang nan baduwo badunsanak tu.

²⁵ Dek karano itu, Isa Almasih ma imbau kasadonyo pangikuik-Nyo sarato bakato, "Angku-angku kan layi tawu, baraso pamimpin-pamimpin banso nan indak ba Tuhan Allah manindeh rakyaiknyo. Baitu pulo panjabaik-panjabaik nagari tu manakannyo.

²⁶ Tapi nan angku-angku indak buliah doh baitu. Malah musti sabaliaknyo, urang nan niyo nak manjadi urang nan takamuko di antaro angku-angku, inyo musti manjadi palayan angku-angku.

²⁷ Urang nan niyo nak takamuko di antaro angku-angku, inyo musti namuah andaknyo manjadi budak angku-angku.

²⁸ Samo jo bakcando Anak Manusia baitu pulo; Inyo datang indak untuak dilayani doh, tapi untuak malayani, sarato jo manyarahkan angok-Nyo, untuak malapehkan umaik manusia dari kabek doso."

²⁹ Kutiko urang-urang tu barangkek dari Yerikho, sambuah urang nan payi manuruikkan Isa Almasih.

³⁰ Ado duwo urang buto nan sadang duduak di tapi jalan. Kutiko inyo mandanga, baraso nan lalu tu adolah Isa Almasih, mako inyo bi ba imbau, "Oih Anak Nabi Daud, iboilah kami!"

³¹ Urang banyak nan ado disinan mambangihinyo, manyuruah inyo supayo anok. Tapi malahan inyo ba imbau labiah kareh lai daripado cako, "Oih Angku, Anak Nabi Daud, iboilah kami!"

³² Dek mandangakan urang nan ba imbau tu, mako barantilah Isa Almasih bajalan, Baliau imbaulah urang tu. Baliau batanyo, "Apo nan bamintak kabake Ambo, nan ka Ambo pabuwek untuak angku-angku?"

³³ Inyo bi manjawab, "Angku, kok dapek, kami niyo mato kami ko bisa untuak maliyek!"

³⁴ Isa Almasih maraso ibo kabake urang-urang tu, Baliau awailah mato urang tu. Sakutiko tu juwo mato urang nan buto tu bisa untuak maliyek. Mako urang-urang tu pun bi payi pulo manuruikkan Isa Almasih.

Matius

Video Matius 20

Ikuti Kami:

KONTAK | PARTISIPASI | DONASI