Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Kerajaan Sorge nike seumpame maraq niki: Araq sopoq dengan bedowẽ kebon anggur. Lẽq waktu kelẽmaq ie sugul boyaq dengan saq mẽlẽ begawẽan lẽq kebon anggurne.

² Sesampun ie sepakat bayah buruh-buruh nike siq sopoq kẽpẽng perak sejelo, dengan nike suruq ie pade begawẽan lẽq kebon anggurne.

³ Jam siwaq kelẽmaq, ẽpẽn dowẽ kebon nike sugul malik, dait serioqne dengan-dengan nganggur lẽq peken.

⁴ Jari ẽpẽn dowẽ kebon nike bebase lẽq dengan-dengan nike, 'Silaq side pade begawẽan lẽq kebon anggur tiang. Tiang gen bayah side pade siq upaq saq pantes.'

⁵ Dengan-dengan nike lumbar. Waktu jam due olas tengari dait jam telu kebian, ẽpẽn dowẽ kebon nike sugul malik dait ngelaksaneang hal saq pade.

⁶ Kire-kire jam lime kebian, ie sugul malik, dait serioqne masih araq dengan saq nganggur. Beterus ẽpẽn dowẽ kebon nike beketuan lẽq ie pade, 'Kembẽq side pade nganjeng sejeloan lẽq deriki dait ndẽq begawẽan napi-napi?'

⁷ Jawab dengan-dengan nike, 'Ndẽq araq dengan saq mẽlẽ bẽng tiang pade pegawẽan.' 'Lamun maraq nike,' basen ẽpẽn dowẽ kebon nike, 'silaq side pade begawẽan lẽq kebon anggur tiang.'

⁸ Lẽq waktu serep jelo, ẽpẽn dowẽ kebon anggur nike bebase lẽq mandorne, 'Empoh buruh-buruh nike, dait bayah gajine sopoq-sopoq, mulai lẽman buruh saq paling mudi begawẽan jangke saq paling julu begawẽan.'

⁹ Beterus dateng buruh-buruh saq begawẽan mulai jam lime kebian. Sopoq-sopoq nerimaq upaq sopoq kẽpẽng perak.

¹⁰ Beterus dateng ẽndah buruh-buruh saq begawẽan lẽman kelẽmaq. Ie pade pikir gen nerimaq upaq saq lebihan. Laguq ie pade nerimaq upaq sopoq kẽpẽng perak ẽndah.

¹¹ Sewaktu ie pade nerimaq kẽpẽng nike, ie pade ngerumun lẽq ẽpẽn dowẽ kebon nike:

¹² 'Dengan saq dateng paling mudi nike begawẽan cume sejam doang. Tiang pade begawẽan sejeloan lẽq bawaq panas jelo, laguq Pelungguh bayah dengan-dengan nike pade maraq tiang!'

¹³ ~Epẽn dowẽ kebon anggur nike bebase lẽq salaq sopoq dengan lẽman buruh nike, 'Semeton, tiang ndẽq gawẽq saq ndẽq adil lẽq side. Tekan side setuju tebayah siq sopoq kẽpẽng perak sejelo?

¹⁴ Mangkin silaq bait upaqde, beterus side lumbar. Tiang mule beniat ngebẽng gaji lẽq dengan saq begawẽan paling mudi nike siq upaq saq pade maraq saq tiang bẽng lẽq side.

¹⁵ Napi tiang ndẽq kanggo gawẽq semẽlẽ angen tiang siq dowẽn tiang mẽsaq? Atao side talon atẽ, sẽngaq tiang murah atẽ?'"

¹⁶ Beterus Deside Isa bemanik malik, "Maraq nike ẽndah dengan-dengan saq penutuq gen jari saq penembẽq, dait dengan-dengan saq penembẽq gen jari saq penutuq."

¹⁷ Sewaktu Deside Isa lumbar ojok Yerusalem, lẽq tengaq langan Ie ngemanikang kedue olas pengiring-Ne adẽqne bekumpul bekelin lẽman dengan-dengan lain. Beterus Deside Isa bemanik lẽq ie pade,

¹⁸ "Dengahang! Mangkin ite lumbar ojok Yerusalem. Lẽq derike Bije Manusie gen teserahang tipaq imam-imam kepale dait ahli-ahli Taurat. Terus Ie gen tehukum matẽ,

¹⁹ sesampun nike Ie gen teserahang tipaq bangse-bangse saq ndẽq kenal kance Allah, adẽq Ie teoloq-oloq, dait tesiksaq, terus tepakuq lẽq kayuq salib. Laguq lẽq jelo saq ketelu, Ie gen teidupang malik."

²⁰ Sesampun nike, senine Zebedeus dait bije-bijene parek tipaq Deside Isa. Lẽq arepan Deside Isa ie sujut tunas sopoq hal.

²¹ Manik Deside Isa, "Napi mẽlẽnde inaq?" Jawab inaq nike, "Prẽntahang adẽqne deduaq anak tiang niki ẽraq bau tokol lẽq kiri dait kanan Pelungguh, lẽq dalem Kerajaan Pelungguh."

²² "Side pade ndẽq nenaoq napi saq side pade tunas," manik Deside Isa lẽq ie pade. "Napi side pade sanggup nginem lẽman cawan penderitean saq harus Tiang inem?" "Sanggup!" jawab ie pade.

²³ Deside Isa bemanik, "Mule side pade gen nginem ẽndah lẽman cawan penderitean Tiang. Laguq mengenai sai saq gen tokol lẽq kanan atao kiri Tiang, nike ndẽqne Tiang saq berhak nentuang. Hal nike tesadangang tipaq dengan saq sampun tetentuang siq Bapa Tiang."

²⁴ Waktu kesepulu pengiring saq lain dengah hal nike, ie pade sili lẽq kedue dengan saq besemetonan nike.

²⁵ Keranaq nike, Deside Isa ngemanikang ie pade selapuq, dait bemanik, "Side pade nenaoq bahwe pemimpin-pemimpin bangse saq ndẽq kenal kance Allah nindes rakyatne. Dait pembelẽq-pembelẽqne bedowẽ wewenang penoq tipaq ie pade.

²⁶ Laguq side pade ndẽq kanggo maraq nike. Sebalikne, dengan saq mẽlẽ jari belẽq lẽq antare side pade, ie harus jari pelayande.

²⁷ Dait dengan saq mẽlẽ jari saq penembẽq lẽq antare side pade, ie harus jari hambende.

²⁸ Pade maraq Bije Manusie nike ẽndah; Ie rauh nẽnten jari telayanin, laguq jari ngelayanin, dait nyerahang nyawe-Ne jari tebusan tipaq dengan luwẽq."

²⁹ Sewaktu ie pade sugul lẽman kote Yeriko, luwẽq dengan ngiring Deside Isa.

³⁰ Araq due dengan bute kenyeke tokol lẽq sedin rurung. Waktu ie pade dengah bahwe Deside Isa bemargi lẽq derike, ie pade bekuih, "Junjungan Saq Mulie, Keturunan Daud, periakang tiang pade!"

³¹ Dengan luwẽq saq araq lẽq derike peringet ie pade adẽq ie pade tedoq. Laguq ie pade bekuih sayan keras, "Junjungan Saq Mulie, Keturunan Daud! Periakang tiang pade!"

³² Beterus Deside Isa mentelah, dait ngemanikang kedue dengan bute nike. Ie bemanik, "Napi saq side pade melẽtang adẽq Tiang piaq lẽq side pade?"

³³ Jawab kedue dengan bute nike, "Junjungan Saq Mulie, tiang pade melẽt tao nyerioq!"

³⁴ Deside Isa periak lẽq deduaqne, terus Ie jamah penenteng ie pade. Langsung waktu nike ẽndah ie pade tao nyerioq. Beterus ie pade ngiring Deside Isa.

Matius

Video Matius 20

Ikuti Kami:

KONTAK | PARTISIPASI | DONASI