Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Pomomarentah i Allah náonda bo porumpama'an tanaa: Oyúon ki togi gobá, subuhpa sia aindon iḷumuai bo notayak kon intau mita inta pokíaidan kong gobá in anggurnya.
2 Naonda in nositantuándon kon tosinggai ubolianan todinar, pinotabányadon mosia tua minayak nogaid kong gobánya.
3 Naonda in degá jam sembilanmaidon doḷo-doḷom, sia iḷumuai bui bo noko'ontong kon intau ibanea inta tongá maya-mayak makow kom pasar sin diá ko'oáidan.
4 Dá sia noguman ko'i monia, 'Bayakdon im mo'ikow bo pogaid kong gobá in anggurku, bain ubolianku im mo'ikow, podudui onu ing ko'ibogku ogoi ko'inimu.' Bo mosia tua minayak doman nogaid.
5 Degá no'utumaidon in singgai bo kon jam tigamaidon moḷoḷabung iḷumuai bui in sia bo nogaid kon ná inta muna inaidannya.
6 Bo naonda im moḷoḷabungdon totok, sia iḷumuai bui bo noyodungkuḷ doman in intau ibanea, bo sia nolibó ko'i monia, 'Nongonu sin tumongo singgai na'a mo'ikow tongábí modondaḷoi magí-makow?'
7 Mosia notubag ko'inia, 'Kaka'a diá onda intau mogoiní ko'inami mogaid.' Dá sia noguman doman ko'i monia, 'Bayakdon mo'ikow pogaid kong gobá in anggurku.'
8 Naonda in nodoḷomdon ki togi gobá tatua noguman kom moḷoḷukad kong gobánya, 'Oinídon intau mita inta nogaid tatua sin uboliankudon im pinogaidan monia, pangkoidon ko'i monia inta nogaid tumi totok nodapot inta nogaid noíuna doman totok.'
9 Bo namangoidon im mosia inta nogaid degá mulai jam limamai ḷoḷabungea, pomuḷoi intau inubolian to dinar.
10 Onda intua namangoidon doman mosia inta muna sinumu'ot nogaid, kai monia kamai dá mosia im moko'ulíbí kom mo'iliu, nongkon imonia tua, ta'e naonda in sinarima monia yo na'anta tumpaḷabí doman tumong-dinar.
11 Naonda im mosia notarima kon tua, mosia nosingo-singogan ko'i togi gobá,
12 kai monia: 'Mosia inta sinumu'ot pangabisan inta nogaid tongá to jam pinotongkaimu doman ko'inami inta nogaid irumoriga to singgai na'a, bo nonahang kom patú in singgai!'
13 Ki tuang tatua notubag kon tobatú intau inta kon sigad monia tua, 'Utat, aku'oi in diábí nongubol ko'i nimu. Kitakan aim bidon nositantuán kon to singgai ubolian to dinar?
14 Gamádon silaimu bo bayakdon; sin aku'oi im mobogoi doman kon intau inta nogaid no'itontumi potongkaion ko'i monimu.
15 Degá diá mota'au in aku'oi mopomaké ing kapunya'anku podudui onu ing ko'ibogku? Andeka moya'at degá ing ginamu aka aku'oi mogaid kon inta mopia kon intau ibanea?'"
16 Bo ki Yesus noguman, "Natuabí im mobalí, intau inta no'itontumi mobalí mo'iuna bo intau inta no'íuna mobalí mo'itontumi."
17 Naonda ing ki Yesus nopobayakdon in Yerusalem. Sia nogoiní kom murí-Nya inta mopuḷuh bodoyowá bo minayak sinumontaní. Onda intua Sia noguman koímonia wakutu im mosia kom binaya'anpa,
18 "Indongogai! Tana'a makow kita mayak in Yerusalem. Kon tua Adí Intau poposarakandon kon imang mita itoi bo kom mototundú mita kon agama. Bo mosia i mopoḷabú in hukuman matoi ko'i Adí Intau.
19 Mo'iduduimai kon tua mosia moposarahkan ko'i-Nia kon intau mita inta diá nonota'au ko'i Allah, simbá poyamba'an monia in Sia, roriga'an bodongka popopakú kong kayu pinoyotalempang, ta'e kon singgai intoḷunya biagondon bui in Sia."
20 Bo ki iná i adí mita i Zebedeus takin ki adínya mita tua namangoi ko'i Yesus, bo sinumungkud kon tayowon-Nya sin oyúon po'igumon monia ko'i-Nia.
21 Ki Yesus nolibo, "Onu iná ing ko'ibogmu?" Tubangnya, "Akuoi mopo'igum simbá ki adíku taya dua na'a i mota'au limitú moyotakin-Mu kom bonu ing Karaja'an-Mu. Tobatú ing kon dotá ing koḷanan, bo tobatú ing kon dotá ing koḷoigi-Mu."
22 Ta'e ki Yesus notubag ko'i-Nia, "Diábí kota'auan monimu, onu in inigum monimu. Degá mokosanggup i mo'ikow monginum kom palo in roriga inta musti inomon-Ku?" Dá mosia notubag ko'i-Nia, "Mokosanggup ing kami".
23 Ki Yesus noguman ko'i monia, "Roriga-Ku memang inumonbí monimu, ta'e aka monantú limitú kon dotá ing koḷanan-Ku andeka kon dotá ing koḷoigi-Ku, diábí in hak-Ku mobogoi. Sin tua in ogoibí kon intau mita inta aindon pinoposadia'an i Amá-Ku."
24 Nokodongogmai kon tua murí-Nya mopuḷuh sinumorú ko'i nayadua mogutat tatua.
25 Ta'e ki Yesus nogoiní ko'i monia bo noguman, "Indongogaipa in singog-Ku na'a: aka pomarentah mita in dunia na'a inta diá nonota'au ko'i Allah nomarentah kon rayatnya takin momakisa totok bo intau mita moḷoben mopobayak in tugas monia, mondorot doman kon intau mita.
26 Aka mo'ikow yo diábí mota'au natua. Ki ine im mo'ibog mobalí moḷoben kon sigad monimu, yo sia i musti mobalí bobantungmu.
27 Bo ki ine im mo'ibog mo'iuna totok kon sigad monimu, yo sia i musti mobalí doman bobantungmu.
28 Ná ki Adí Intau namangoi de'emanbí mokibantung, ta'e mamangoibí mobantung bo mobogoi in nyawa-Nya potobus kon dosa in intau mobarong."
29 Bo naonda ing ki Yesus bo murí-Nya mita iḷumuai nongkon Yerikho, nobarong in intau dinumudui ko'i-Nia.
30 Kon daḷan oyúon intau bilog doyowa ilimitú makow kom bingki in daḷan, dinongog monia kong ki Yesus in no'italib, dá taya dua nomaḷú, kai monia: "Tuhan, Adí i Daud, kotabipa ing kami na'a!"
31 Ta'e intau moántó tatua nongampag ko'i monia, simbá mosia kibio-biómaidon, ta'e tongábí mokodugang kon ropot monia momaḷú, "Tuhan, Adí i Daud, kotabipa ing kami!"
32 Ki Yesus sinumogon bo nogoiní ko'i nayadua, bo nolibó, "Onu ing ko'ibog aidan-Ku ko'i monimu?"
33 Tubag monia, "Tuhan, undamaidon im mata nami simbá moko'indoidon!"
34 Bo noliaidon ing gina i Yesus sin notabi, dá iyapu-Nya im mata monia. Bo kon dodaipa doman tatua bo noko'indoi bo poḷat dinumudui koi-Nia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA