Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu manganto’o wo’u rapa, Ia manganto’o, “Palaong to mawali resi to lino to Makolenya i Pue Allah, palaong etu maya raporapaka ewa si’i. Rapanya re’e tau pue nawu anggur to wuro-wuro mako maliwu tau to danabayar damapalaong nja’u nawu anggur to si ia.
2 Ojo paratanya tau to damapalaong, ia manganto’oka sira ia damangabayar sangkomba doi pera seo mapalaong. Wali sira singkonong, roo see ia mampokau sira yau njo’u nawunya.
3 “Yako etu, ane ratamo jam sio bae eo, tau pue nawu etu mako yau wo’u pei mangkita sawei mba’a tau ojo maroo-roo nja’u pasar.
4 Wali ia manganto’oka sira, ‘Intamo mapalaong nja’u nawungku panewa dakubayar komi saro to masipato komi mangarata.’ Wali sira yau mapalaong.
5 Panewa ewa see seja naika ntau pue nawu ane ratamo ntongo eo pasi jam togo rede eo seja. Tempo etu seja ia yau njo’u pasar pei mangarata tau to yusa to singkonong seja mapalaong damangarata saro to masipato darawaika. Wali sira yau seja mapalaong.
6 “Panewa yako etu, ane mosumo jam lima rede eo ia yau wo’u pei mangangkita wo’u tau to ojo maroo-roo, wali ia mampotanaka resi tau etu, to’onya, ‘Maka pei komi ojo maroo-roo tare mapalaong seo si’i?’
7 “Wali sira mangansono, ‘Apa tare tau to mangansale kami damapalaong.’ “Wali tau pue nawu manganto’oka sira, ‘Inta komi seja njo’u nawungku, aku damangabayar komi saro to masipato komi mangarata.’
8 “Wali yako etu, ojo kawenginya rao, tau pue nawu etu manganto’oka tau to mampasilonga tau to mapalaong, to’onya, ‘Pokio tau to mapalaong pei waika sira saronya samba’a pei samba’a. Mula resi tau to purinya masua rataka tau to uyunya masua.’
9 “Wali tau etu mampokio tau to mapalaong panewa ane ma’i tau to masua mapalaong jam lima rede eo, tau etu rawaika sangkomba doi pera samba’a pei samba’a.
10 Wali yako etu ane ratamo temponya tau to uyunya masua darawaika seja saronya, sira mampobuuka saro nsira dayabi wo’u pei saro nsa’e. Pei sira rawaika seja sangkomba doi pera sewaju pei tau to yusa.
11 Wali tempo sira mangarata doi etu, sira sakambumbu mangkambumbuka tau pue nawu etu.
12 Sira manganto’oka ia, ‘Gete, tau to purinya masua si’i ojo samba’a jam mapalaong! Pei kami seo mapalaong pasi mandasai mapalaong mansabo eo mapoi. Wali maka pei komi mangawaika sira saro to sewaju pei saro mami?’
13 “Pei tau pue nawu etu manganto’oka samba’a tau etu, to’onya, ‘A’ingku, aku tare mangantipu korom, apa korom singkonong tempo aku mamparajanjika damangabayar sangkomba doi pera.
14 Wali oko sarumu etu pei inta muni njo’u banuamu. Aku rani mangawaika tau to purinya masua saro to sewaju pei saro ngkorom.
15 Wali gete, bara taa masipato aku mangampake doingku mangalulu pamporani to si aku? Maka pei korom kaloo apa saba aku manoto resi sa’e?’ Wali ewa wetu nato’o ntau pue nawu.
16 “Wali ewa see seja ane I Pue Allah pasi tau to Ia makolenya. Apa tempo tau etu danawaika i mPue Allah ntanapanya, tempo etu re’e seja tau etu to daipu raya nsira apa sira mampondayaka sira uyunya darawaika ntanapanya etu. Pei si’a sira to uyunya rawaika apa tempo sira mangika palaonginya resi i Pue Allah, sira mangika ojo rani darabarong. Pei re’e tau to yusa to buya rayanya mangika palaonginya resi i Pue Allah, wali tau to etu semo to uyunya darawaika ntanapa nsira apa i Pue Allah rani manga’angga sira. (Wali ewa wetu damawali, apa nempo boros tau to rasale mawali tau to Makolenya i Pue Allah pei taa boros to rapilis damawali bae kojo angganya ri oyo ntau to Ia Makolenya etu.)”
17 Wali yako etu i Yesu sindara-ndara pei kami to boros, kami yau ndeku Yerusalem. Ri raya mpalinja mami etu i Yesu mampokio kami to anaguruNya to sampuyu pei dua panewa kami sampuyu pei togo masepi yau ri sambali njaya see taa nadonge nsa’e gombo mami. Roo see Ia mampakanasaka kami mangkonong palaong to damawali resi Ia, Ia manganto’o,
18 “Kita dayau ndeku Yerusalem, panewa nda’a ria Aku, Wiyaa nto Lino, daraposora yau resi kepala-kepala nto pampue pasi tau to mampoguru porenta i Musa. Wali tau etu damanganto’o Aku taa maya taa darapopate yau.
19 Pasi sira damangawaika Aku resi tau to si’a to Yahudi panewa tau etu damampokore Aku pasi damampedas seja Aku. Roo see sira damampopate yau Aku mangampaku Aku ri kaju pasape. Pei ri rayanya togo eo Aku damambangu muni yako ri kapatengKu.”
20 Wali yako etu indo nu ana i nSebedeus mangampago i Yesu sindara-ndara pei dua maba’a ananya to langkai to anaguru i Yesu. Rata resi i Yesu, tau we’a etu mambokotu ri tangoNya apa manga’angga Ia pei damarapi resi Ia.
21 Wali i Yesu mampotanaka, to’oNya, “Kesaa to nuporani, Indo?” Wali tau we’a etu manganto’o, “Biaka anangku to dua si’i damatunda ri tondo ngkana pasi matunda ri tondo ngkii ngKomi damaporenta sindarandara pei Komi tempo Komi damawali Makole nto lino.”
22 Wali i Yesu manganto’o, “Korom taa mangansani ewa wimba kasulinya palaong to nuporapi ngkorom etu. Apa ri katawanya Aku maporenta, Aku damangarata ruyu kasesa, pasi kasesa to dakurata etu mapari pu’u, raporapaka ewa anu to rainu to mapa’i kojo. (Pasi tau to rani maporenta sindara-ndara pei Aku, tau etu taa maya taa mangarata seja kasesa to ratangKu etu.) Wali wimba, komi dua bara buya rayamu mangarata kasesa etu sindara-ndara pei Aku?” Wali sira dua mangansono, sira manganto’o, “Buya raya mami.”
23 Wali i Yesu manganto’oka sira, Ia manganto’o, “Monso pu’u komi darasesai sewaju pei Aku, pei Aku taa maya mangawaika komi dua matunda ri tondo ngkanangKu pasi ri tondo ngkiingKu. Tampa to bae angganya etu darawaika resi tau to roomo napakatantuka mPa’angKu.”
24 Wali ojo pangandonge mami to sampuyu anu to naporapi ntau we’a etu, kami masusa raya mami resi tau dua sintua’i etu.
25 Pei i Yesu mangkita kami masusa wali Ia mampokio kami, manganto’o, “Mai ruyu.” Panewa Ia manganto’o, “Ne’e mangokotaka koro ngkomi ewa naika ntau to si’a to Yahudi. Komi nunsani ane tau to si’a to Yahudi, makolemakole nsira mapari kojo naika mamporentang sira. Pasi tau to bose angganya, sira mapari seja inikanya mangkuasang sira.
26 Pei ane ri oyo ngkomi si’a ewa see. Ane ri oyo ngkomi, i sema komi to rani mawali bae anggamu tempo Aku mawali Makole, to tao-tao komi mawali ewa tau to kodi angganya see naka buya rayamu mawali to papolaong nu yunumu.
27 Pei ane re’e komi to rani mawali bae kojo wo’u anggamu, to tao-tao komi mawali yau ewa tau to kodi kojo angganya see naka buya raya ngkomi nempo mawali ewa watua nu yunumu.
28 Matao komi sewaju ewa Aku, Wiyaa nto Lino. Aku ma’i si’a ma’i danasawang ntau, Aku ma’i damangansawang tau pasi damangkapateka tau boros damangansompo dosa nsira.”
29 Wali yako etu, ri raya mpalinja i Yesu pasi kami to anaguruNya yau ri Yerusalem, kami liu ri kota Yerikho. Tempo kami polas yako nja’u ria, boros kojo tau to mangalulu i Yesu.
30 Wali tempo etu re’e dua mba’a tau to buta to matunda ri wii njaya. Tau dua etu mangandonge i Yesu semo to malinja liu re ria, wali see naka sira kabooboo manganto’o, “O Pue, Wiyaa i Makole Daud, porayang kami!”
31 Wali tau boros manganseko sira, manganto’o, “Ne’e kanano!” Pei sira dua maroso wo’u loonya kabooboo, manganto’o, “O Pue, Wiyaa i Makole Daud, porayang kami!”
32 Wali i Yesu mangandonge panewa Ia mandoo pei mampokio sira dua, Ia manganto’o, “Kesaa to nuporani ngkomi dakuika resi komi?”
33 Wali sira dua mangansono, “Pue, kami rani matao muni mata mami.”
34 Wali i Yesu mamporayang sira panewa Ia yau mampotaka mata nsira dua. Wali tau dua etu mansaka mangkita muni rao, panewa sira mangalulu seja i Yesu ri raya mpalinjaNya etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA