Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e seore ma’i bara sawei mba’a to Yahudi to aliran Parisi pasi tau to mampoguru porenta i Musa. Sira yako Yerusalem ma’i mangampago i Yesu. Wali ojo parata nsira i Yesu, sira mampotanaka resi Ia,
2 sira manganto’o, “Maka pei anagurumu taa mangalulu ada nto tu’angi ngkita? Apa tempo sira mamue damangkoni, tempo etu sira taa mangika singkonong ewa ada to etu.”
3 Wali i Yesu mangansono, to’oNya, “Ane komi, maka pei komi taa seja mangalulu porenta i mPue Allah? Komi ojo damangaluluka yau ada ngkomi.
4 Apa i Pue Allah manganto’o, ‘Pakabae pa’amu pei indomu.’ Pasi Ia manganto’o seja, ‘I sema tau to mampoja’a pa’anya bara indonya, tau etu taa maya taa rapopate yau.’ Ewa see anu to rapotundeka ri raya ntuntu i mPue Allah.
5 Pei yusa to nupotundeka ngkomi. Apa komi mampotundeka tau taa mawei nempo taa mangalulu porenta etu. Komi manganto’oka sira taa mawei ane taa mangansawang pa’anya bara indonya ane manganto’oka sira ewa si’i, to’onya, ‘Aku taa kukoto mangansawang komi apa anu to masipato aku mangawaika komi, aku roomo mamparajanjika yau darapampueka resi i Pue Allah.’ Wali ewa wetu nuika ngkomi ojo mangaliunaka porenta i mPue Allah see maya mangalulu ada ngkomi.
6 (15:5)
7 O komi to ojo gombomu manoto! Kono kojo gombo i Yesaya tempo ia manganto’o yami mangkonong komi, to’onya,
8 ‘Tau si’i mampakabae Aku ojo ri nganganya, pei rayanya longko yako resi Aku.
9 Wali tau to ewa wetu tare batuanginya mampue resi Aku, apa ane sira mampoguruka tau, sira ojo mampoanika mampoguru tuntu i mPue Allah, pei kamonsonya anu to napoguru nsira etu ojo ada nto lino.’ Wali etu semo to nato’o i Yesaya mangkonong komi.” Wali ewa wetu nato’o i Yesu mampakanasaka tau etu ojo gombo nsira to manoto. Apa sira mampakasala kami to anaguru i Yesu, pei kamonsonya si’a porenta i mPue Allah to naliunaka mami etu, ada nto lino semo.
10 Wali yako etu i Yesu mampokio wo’u tau boros pei manganto’oka sira, to’oNya, “Padongeka kojo pasi pobatuangika gombongKu si’i.
11 Apa tau nempo magege palenya tempo mangkoni, si’a palaong to etu mampakarikasika rayanya ri pangkita i mPue Allah. Apa si’a anu to masua ri raya ntau to mampakarikasika rayanya ri pangkita i mPue Allah. Pei gombo to masuwu yako ri nganga ntau etu, etu semo to mampakarikasika rayanya.”
12 Wali ojo karoonya i Yesu manganto’o gombo etu, kami to anaguruNya yau resi Ia pei manganto’o, “To Yahudi to aliran Parisi, sira kodi rayanya apa saba gombo to nuto’o ngkomi etu.”
13 Wali i Yesu manganto’oka kami ligi to’oNya, “Samparia pinumuya to taa napomuya mPa’angKu to ndate saruga, pinumuya to etu darayali yau.
14 Wali see naka ne’e mangalinga tau to aliran Parisi etu. Sira raporapaka ewa tau to buta to mawali mata njaya ntau to buta seja. Wali ane tau buta nakentar ntau to buta seja, sira dua paka damasou lo’u raya mbayau.”
15 Wali i Petrus mamporapika resi i Yesu, to’onya, “Pakanasaka kami batuanginya gombo to owo to’o ngkomi ngena.”
16 Pei i Yesu manganto’oka kami, “Wimba, pasi komi seja taa manasa gombo etu?
17 Bara taa nunsani ngkomi kesaa anu to nakoni ntau, to etu ojo masua ri raya ngkompo ntau panewa polas yau?
18 Pei gombo to masuwu yako ri nganga ntau, gombo etu masuwu yako ri raya sia ntau. Wali gombo etu semo to mampakarikasika raya ntau ri pangkita i mPue Allah.
19 Apa ri raya sia ntau re’e mampobuuka anu to maja’a sampe napolengkoka anu to maja’a etu, ewamo mampopate sa’e, masala, magoyal, malima, mawali matamanasa to taa monso, pasi manto’o maja’a sa’e.
20 Wali palaong to maja’a etu, etu semo to mampakarikasika raya ntau ri pangkita i mPue Allah. Pei ane tau mangkoni pei taa mamue ruyu singkonong ewa ada nto tu’angi ngkita, palaong to etu taa mampakarikasika raya ntau etu ri pangkita i mPue Allah.”
21 Wali yako etu i Yesu pasi kami to anaguruNya mayoko yako ri Genesaret yau njo’u lipu-lipu to ri awe ngkota Tirus pasi Sidon.
22 Wali nja’u samba’a lipu etu re’e samba’a tau we’a to yako tana Kana’an. Wali tempo tau we’a etu mangansani i Yesu naratamo ri lipu etu, ia ma’i mangampago kami. Panewa rata resi i Yesu ia kaboo-boo manganto’o, “O Pue, Wiyaa i Daud, porayang aku! Apa anangku to we’a masesa kojo naepe naika measa to mamposuak ia.”
23 Pei i Yesu taa mangansono ia nempo ojo santaa. Wali kami to anaguruNya yau resi Ia pei mamporapika, to’onya, “Pokau yau muni tau si’i, apa ia makanano kojo mangalulu payu ngkita.”
24 Wali i Yesu mangansono, to’oNya, “Aku rapokau ojo damangansawang to Israel to ewa domba to pusa.”
25 Wali tau we’a etu yau mambokotu ri tango i Yesu pei manganto’o, “Pue, sawang aku!”
26 Pei i Yesu mangaligi ia, Ia manganto’o, “Taa masipato pangkoni to nakoni nu ngana mayunu pei daratasoka yau asunya.” Ewa wetu sono i Yesu resi tau we’a to Kana’an to si’a to Yahudi etu. Ia manganto’o gombo etu see to we’a etu mangansani masipato to Yahudi semo to uyunya isawangiNya.
27 Wali tau we’a etu manasanya tau to si’a to Yahudi semo raporapaka ewa asu, wali ia manganto’o, “Monso pu’u Pue, pei ane pangkoni to toronya to nakoni ntau puenya pei maranta bara la’ara meja, pasiwa asu maya seja mansaka mangkoni.”
28 Wali i Yesu mangansono tau we’a etu, to’oNya, “Indo, bae kojo pangayamu! Wali pamporani ngkorom etu damawali.” Wali tempo i Yesu manganto’o gombo etu, tempo etu semo ana ntau we’a etu rapakatao muni.
29 Wali yako etu i Yesu pasi kami to anaguruNya mayoko yako ri lipu etu pei malinja rata nja’u towo ndano Galilea. Roo see kami malinja wo’u mangalulu towo ndano etu rata nja’u pantana. Wali i Yesu mandake nto’u pantana etu panewa matunda ndate ria.
30 Wali boros kojo tau to ma’i mangampago Ia. Tau boros etu mangkenika Ia tau to sampungku, tau to buta, tau to malulu koronya, tau to bea, pasi boros tau to yusa to masaki. Wali rata resi i Yesu sira mangampoduli tau masaki etu ri tango mbitinya, panewa i Yesu mampakatao muni sira.
31 Wali ipu kojo raya tau boros tempo sira mangkita tau bea nakurang magombo pasi tau to malulu koronya rapakaroso muni, pasi tau to sampungku nakurang muni malinja, pasi tau buta nakita muni rao. Wali tau boros etu mangabarong i Pue Allah, Allah nto Israel.
32 Wali yako etu i Yesu mampokio kami to anaguruNya pei manganto’oka kami, to’oNya, “Aku mamporayang kojo tau boros si’i apa togo mbengimo sira sindara-ndara pei Aku, pei si’i-si’i puramo pangkoninya. Wali Aku tawa rani mampokau sira mawolili muni njo’u lipunya ane sira tawa mangkoni apa sira bara damatewula ri jaya. Wali kita damampokoni sira.”
33 Wali kami to anaguruNya etu manganto’o, “Lipu si’i taa re’e tau mangkaroos, wali kita tare jaya damangoli pangkoni. Wali yako imbare kita damangarata pangkoni to gana darapokonika tau to ewa si’i kaborosinya?”
34 Pei i Yesu mampotanaka resi kami, Ia manganto’o, “Sawei mpa’iwa roti to re’e resi komi?” Wali kami mangansono, “Pitu mpa’i roti pasi bara sawei mba’a bau to mayunu.”
35 Wali yako etu i Yesu manganto’oka tau boros, “Patunda ri wawo ntana.”
36 Roo see Ia mangoko roti pitu mpa’i pasi bau panewa Ia manganto’oka i Pue Allah, “Tarima matao.” Roo see Ia mangampesumpesutimo roti pasi bau etu pei mangawaika kami to anaguruNya, panewa kami mangampookoka tau boros.
37 Wali sira samparia mangkoni paka mabosu. Ojo karoonya sira mangkoni, kami mangamporomung muni toro mpangkoni etu dapituwa karanji nabuke.
38 Wali kaborosinya tau to mangkoni etu opo nsowu owo to langkai, tawa manto’o to we’a pasi ngana mayunu.
39 Wali yako etu i Yesu mampokau tau boros etu yau muni njo’u lipu nsira. Roo see Ia mapone ri bangka pei yau njo’u lipu to rato’oka Magadan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA