Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sakalompok urang Farisi, sarato jo babarapo urang guru agamo dari Yerusalem, datang kabake Isa Almasih. Inyo bi batanyo kabake Baliau,

² "Baa mangko pangikuik-pangikuik Angku malangga adaik istiadaik niniak muyang kito? Kutiko ka makan, inyo indak bi mambasuah tangan doh labiah dawulu, manuruik nan biaso di adaik kito!"

³ Isa Almasih manjawab, "Baa mangko angku-angku malangga pulo parentah Allah, hanyo dek karano untuak manuruikkan adaik istiadaik niniak muyang angku?

⁴ Dek karano Allah lah mangatokan, 'Aromaik-ilah bapak sarato jo mandeh angkau,' 'Bagi siya nan mangato-ngatowi bapaknyo atau mandehnyo, inyo musti ka di ukun mati.'

⁵ Tapi angku-angku ma ajakan nan bakcando iko: jikok ado urang mangecek ka ranggaeknyo, 'Apo nan samustinyo ambo barikan ka apak jo ka biyai, lah ambo pasambahkan kapado Allah,'

⁶ mako urang tu indak paralu lai untuak mambalo urang gaeknyo. Jadi, dek karano di adaik istiadaik niniak muyang angku, angku maremehkan firman Allah.

⁷ Oih angku-angku urang munapiak! Sabana tapek, apo nan lah dinubuatkan dek Nabi Yesaya tantang diri angku-angku,

⁸ 'Bakcando ikolah Allah bakato: Urang-urang tu manyambah Den hanyo jo muluiknyo sajo, tapi atinyo jauah dari Den.

⁹ Indak ado doh aratinyo, inyo manyambah Den, dek karano atuaran manusia nan inyo ajakan, sa olah-olah nan inyo karajokan tu, atuaran-Den.'"

¹⁰ Sasudah tu, Isa Almasih ma imbau urang-urang nan ado disinan, sarato bakato kabake inyo, "Dangakanlah kato-kato Ambo, supayo angku-angku buliah mangarati!

¹¹ Apo nan masuak ka dalam muluik, indak ka manajihkan urang tu doh; tapi kok sagalo sasuatu nan kaluwa dari muluiknyo, itulah nan ka manajihkannyo."

¹² Sudah tu pangikuik-pangikuik Isa Almasih datang bakato kabake Baliau, "Tawu Angku baraso urang Farisi tu bi tasingguang, kutiko mandanga kato-kato Angku cako?"

¹³ Baliau manjawab, "Satiyok tanam-tanaman, nan indak ditanam dek Bapak Ambo nan di sarugo, sadonyo ka dibokek.

¹⁴ Indak paralu di acuahkan urang-urang Farisi tu. Inyo tu pamimpin-pamimpin buto; jikok urang buto mambimbiang urang buto, mako kaduwo-duwonyo ka balambin masuak banda."

¹⁵ Petrus bakato, "Angku, tolonglah jalehkan kabake kami apo aratinyo parumpamoan tu!"

¹⁶ Isa Almasih manjawab, "Alun mangarati juwo lai angku-angku?

¹⁷ Indak tawu koh angku-angku, baraso nan masuak ka dalam muluik turun ka dalam paruik, sudah tu kaluwa baliak?

¹⁸ Tapi apo nan kaluwa dari muluik, barasa dari ati; itulah nan manjadikan urang banajih.

¹⁹ Dek karano, dari ati timbua pikieran-pikieran jahek, nan manyababkan urang mambunuah, bajina, mangarajokan nan cabul, mancilok, ma agiah katarangan palasu sarato mampitanah.

²⁰ Karajo-karajo nan bakcando itulah nan manyababkan urang jadi banajih, indak parkaro makan jo tangan nan indak babasuah doh."

²¹ Sasudah tu Isa Almasih barangkek dari tampaik tu, Baliau payi ka daerah dakek kota Tirus jo Sidon.

²² Ado surang padusi Kanaan dari daerah tu, datang kabake Baliau sambia ma imbau-imbau, "Oih Anak Daud, iboilah ambo ko! Anak ambo nan padusi ka masuak-an roh jahek. Sabana parah ka adaannyo."

²³ Isa Almasih indak manyauik-i urang padusi tu ba imbau. Pangikuik-pangikuik Baliau datang ka Baliau untuak mambana, "Angku, suruahlah urang padusi tu payi dari siko. Inyo ma eboh sajo di balakang!"

²⁴ Baliau manjawab, "Ambo ko di utuih hanyo kabake banso Israel, sangajo kabake urang-urang Israel nan sasek."

²⁵ Sato tibo urang padusi tu lansuang inyo sujuik di adok-an Isa Almasih sambia bakato, "Angku, tolonglah ambo Ngku."

²⁶ Isa Almasih manjawab, "Indak elok ma ambiak makanan nan ka untuak paja-paja, sudah tu mambarikannyo untuak anjiang."

²⁷ "Iyo, batua tu Angku," jawab padusi tu, "tapi anjiang tu makannyo dari siso-siso makanan tuannyo nan balabiah."

²⁸ Isa Almasih bakato kabake urang padusi tu, "Biyai, sabana gadang iman biyai! Biyalah tajadi apo nan katuju dek biyai!" Di kutiko tu juwo mako cegaklah anaknyo nan sakik tu.

²⁹ Isa Almasih barangkek dari tampaik tu, Baliau taruih juwo bajalan manyisi tapi danau Galilea. Sudah tu nayiak ka ateh sabuwah bukik, tibo disinan Baliau duduak.

³⁰ Sambuah urang nan bi tibo kabake Baliau, nan mambawok-i urang-urang nan pincang, nan buto, nan lumpuah, nan bisu, sarato sambuah lai urang nan babagai-bagai panyakik. Urang-urang tu bi malatakkan urang nan sakik tu di adok-an Isa Almasih, sudah tu Baliau mancegakkannyo.

³¹ Sangaik tacangangnyo urang banyak nan ado disinan, kutiko inyo maliyek urang bisu bisa mangecek, urang pincang cegak, urang lumpuah bisa bajalan, urang buto bisa maliyek. Inyo bi mamuji-muji Allah banso Israel.

³² Kudian Isa Almasih ma imbau sarato bakato ka pangikuik-pangikuik-Nyo, "Ambo maraso ibo kabake urang nan banyak ko. Lah tigo ari lamonyo inyo bi manuruikkan Ambo, kiniko indak ado lai nan ka dimakannyo. Ambo indak niyo doh mampadiyakan inyo bi pulang jo paruik nan indak barisi, baiko bi paniang inyo di tangah jalan."

³³ Sudah tu pangikuik-pangikuik-Nyo bi batanyo kabake Baliau, "Dima kito nan ka bisa mandapekkan makanan, untuak urang nan sabanyak ko di daerah tapancie nan sarupo iko?"

³⁴ Isa Almasih batanyo kabake pangikuik-Nyo, "Lai barado roti nan ado di angku-angku?" Pangikuik-Nyo bi manjawab, "Layi tujuah buwahnyo Ngku, salain dari itu layi ado pulo ikan ketek-ketek babarapo ikua."

³⁵ Mako Isa Almasih manyuruah urang nan banyak tu bi duduak di tanah.

³⁶ Baliau ambiaklah roti nan tujuah buwah sarato jo ikan tu, sudah tu Baliau basyukur kapado Allah. Baliau mambalah-balah roti sarato jo manguduangi ikan tu jo tangan-Nyo, sudah tu Baliau barikan ka pangikuik-Nyo. Pangikuik-pangikuik-Nyo lah nan mambagikan kabake urang nan banyak.

³⁷ Kasadonyo urang tu bi makan sampai kanyang. Lah sudah urang tu bi makan, mako pangikuik-pangikuik Baliau mangumpuakan makanan nan balabiah. Sampai tujuah katidiang panuah labiahnyo.

³⁸ Kutiko tu ado ampek ribu urang laki-laki nan bi makan, alun di etong lai tu urang padusi sarato jo paja-paja ketek.

³⁹ Lah bi salasai makan, barulah Isa Almasih manyuruah urang nan banyak tu bi pulang ka rumahnyo. Baliau sandiri nayiak ka sabuwah parawu, sudah tu barangkek ka daerah Magadan.

Matius

Video Matius 15

Ikuti Kami:

KONTAK | PARTISIPASI | DONASI