Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ineh inan lun Parisi idi guru-guru Ukum rat Yerusalim, luk iné' matun Yésus, keburi'deh,
2 "Ngudehké anak-anak sekola'Mu ngelaba bada' tepun tau? Na ideh maru' ticu'deh maya' adat tau kareb nateh ideh kuman."
3 Idi kebala Yésus, "Ngudeh muyuh pana' ngelaba ukum Allah ngaceku bada' tepun muyuh?
4 Ngaceku kebala Allah, 'Ngedita' taman-tinanmu,' idi teh, 'Lemulun luk ngedat tamanneh idi tinanneh, do' ieh pitayeh.'
5 Iamo' keburi' muyuh, 'Idé-idé luk pebala kuan tamanneh idi tinanneh, Anun-anun luk inan ulek kuan medueh rat negku, pangeh biré kuan Allah,'
6 idi na ulekneh ieh ngedita' tamanneh teh. Idi muyuh pangeh nengebeneh ukum Allah ngaceku bada' tepun muyuh.
7 O muyuh lun luk siayu! Matu luk bila Yesaya ratnan muyuh, kebalaneh,
8 'Pupu ini ngedita' Negku ku bibir tangdeh, Iamo' niatdeh mado rat Negku.
9 Mo'-mo' mo' lemulun ini sembayang Negku, ngaceku ideh mada' ukum-ukum ratnan bada' lemulun.'"
10 Idi Yésus nenawar lun mula' amé' matun Neneh, idi nepebala kuandeh, "Ninger, pad muyuh kali' ilungneh.
11 Baken luk semuet bang tang luk ngelutak lemulun, imao' luk remuat rat bang tangneh, ieh ineh luk ngelutak lemulun."
12 Idi anak-anak sekola' ineh iné' Neneh, idi keburi'deh Neneh, "Kali'Mu lun Parisi nesabeng kareb ideh neninger bala Midi?"
13 Iamo' Yésus nengor baladeh, keburi'Neh, "Anid-anid tibu luk na tinibu TamanKu bang surga, ieh miak bebuten peh.
14 Aganeh lemulun ini, ngaceku ideh lun nguyut luk mebuser, idi kudeng lun mebuser nguyut lun mebuser, kali' rungen didueh miak mebpeh bang lubang."
15 Idi Pétrus nengor balaNeh, keburi'neh, "Mada' nekai ratnan ilung luk pinginud ineh."
16 Idi keburi'Neh, "Macing nekini pana' naké muyuh petap terawé teh?
17 Naké muyuh kali' anun-anun luk semuet bang tang petacu amé' bang batek, idi talan bang temaba'.
18 Iamo' amung-amung luk remuat rat bang tang lemulun, ieh ineh remuat rat bang niatneh; idi ieh ineh luk ngelutak lemulun.
19 Ngaceku rat bang niat remuat teruayen luk dat, ngaté, pasét, mesawa', mano, mebalih, nguyo.
20 Amung-amung kekamen ini luk ngelutak lemulun, iamo' kuman ku ticu' luk na biru', na miak ngelutak lemulun."
21 Idi Yésus neremuat rat bawang ineh idi iné' bang babpat luk muneng ku Sur idi Sidon.
22 Idi seburur decur lun Kanaani iné' ratnan babpat tana' ineh idi nengitang, keburi'neh, "O Tuhan, O Anak Daud, méi' negku; ngaceku anakku luk decur pelaba dereh ngaceku ieh sinuet ada'."
23 Iamo' Yésus na nengor aceh bila' balaneh pana'. Idi anak-anak sekola'Neh iné' mutuh Neneh, kebaladeh, "Ngecuk neneh buro ngaceku ieh ngitang-ngitang maya' puet tau."
24 Idi kebala Yésus, "Na Ui icuk amé' kuan lun baken, iamo' kuan dumba-dumba luk netutu' ratnan pupu lun Israil mo'."
25 Iamo' decur ineh nacing idi netekeradung pa kiungNeh, keburi'neh, "O Tuhan, nengan negku."
26 Idi kebala Yésus, "Na do' ngalap ruti ratnan anak-anak barén kuan uko'."
27 Iamo' keburi' decur ineh, "Matu, Tuhan, iamo' uko' pana' kuman areg-areg luk nebpeh ratnan méja tuandeh."
28 Idi kebala Yésus neneh, "O decur, anumu rayeh tu-tu. Miak mangun kuanmu kudeng luk pianmu." Idi petacu anakneh dino' peh.
29 Idi Yésus nenalan rat déi', idi nacing muneng ku Takung Galilia; idi Ieh numak luun pegkung idi netudo déi'.
30 Idi pelaba ula' lemulun iné' Neneh, idi ideh nenguit lun meliai, lun mebuser, lun mebegkeh, lun mepueg, idi mula' lun baken teh, idi ideh nengerareng nedeh iring kukudNeh, pad Ieh nengedo' amungdeh ineh.
31 Lun mula' ineh mawa, kareb ideh nenier lun mebegkeh pebala-pebala, lun mepueg do', lun meliai nalan do'-do', idi lun mebuser nier peh; idi ideh nengerayeh Allah lun Israil.
32 Yésus nenawar anak-anak sekola'Neh amé' Neneh, kebalaNeh, "Ui méi' nelun mula' ini, ngaceku pangeh teluh aco ideh tudo denganKu idi na luk kenendeh; idi ara' Ui ngecuk nedeh muli' kudeng ideh melau, ngaceku kian ideh melepu arang dalan lek."
33 Idi kebala anak-anak sekola'Neh Neneh, "Rat iapehké tau miak ngalap petap ruti tungé' su luk ali-ali kuan lemulun luk kinula' ini?"
34 Idi kebala Yésus nedeh, "Tuda' ruti luk idi nemuyuh?" Idi keburi'deh, "Tudu' balad, idi sesuut lawid luk medari."
35 Idi Yésus nengecuk lun mula' tudo luun tana'.
36 Idi Ieh nengalap ruti luk tudu' balad idi lawid ineh, idi Ieh nemaré ubur kuan Allah idi nemuri'-muri' neneh, idi nemaré kuan anak-anak sekola' ineh, idi ideh nenganid kuan lun mula' ineh.
37 Idi amungdeh ineh nekuman pad ideh mebor. Idi ideh nengamung tecehneh, panu' tudu' ngebuan.
38 Idi kinula' deléi luk nekuman ineh apat ngeribu, idi inan teh decur idi anak.
39 Idi Yésus nengecuk lun mula' ineh muli' idi Ieh netemaleb bang alud, idi iné' bang babpat Magadan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA