Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Den ba'tu pira-pira to-Farisi sola guru agama jao mai kota Yerusalem ratu ssikitan Puang Isa. Mekutanami lako nakua,

² "Ciapari na te'da naturu'i anak gurun-Ta' to ada' tojolota'? Te'da nabasei limanna jolo', namane' kumande."

³ Mebalimi Puang Isa nakua, "Na ciapari na te'da mituru' parenta-Na Puang Allataala, na ia ora mituru' tongan to atoran migaraga kalena?

⁴ Nasaba' nakua Puang Allataala, 'Kasiri'i to tomatuammu. Na ia to tongkada-kadai tomatuanna la dibuno.'

⁵ Apa sibalikanna to mipangpangngajaran lako tau kumua, te'da nasala ke den tau ngkuan tomatuanna, 'Ia to doi' la kuben kamu' la miputuo, iamo to mangka kupangkaroban lako Puang Allataala',

⁶ Jaji ia joo tau te'damo naparallu ngkasiri' tomatuanna. Ia ke susii joo, te'damo mituru'i to parenta-Na Puang Allataala, napubua' ada' tojolomi.

⁷ Ee, tomajekkong kamu'! Nang tongan to napau Nabi Yesaya tonna anu' mpau kamu' kumua,

⁸ 'Nakua Puang Allataala: Ia tee mai tau kadanna manda kumua napakala'bihna', apa sitonganna te'da nakasiri'na'.

⁹ Te'da bua'na ssompana', nasaba' ia to napangpangngajaran atoran tolino, butung to kumua mpangpangngajaran parenta-Ku'.'"

¹⁰ Natambaimi Puang Isa tuu lako tobuda nakuanni, "Pesa'dingngi, ammipahangngi!

¹¹ Te'da na ia to dikandena ncarepai tau, apa iara to messun jio mai timu, anna mentangsipato'mo to tau ssompa Puang Allataala."

¹² Ratumi to anak gurun-Na Puang Isa ngkutanaii nakua, "Taissenraka kumua ia to kadan-Ta' napugalli to-Farisi?"

¹³ Mebalimi Puang Isa nakua, "Ia to to-Farisi wa'ding dipasangrapang tananan to tangngia pantanan-Na Ambe'-Ku' jao suruga. Iamo joo naladirebu'i.

¹⁴ Paboko'i bangmi penawa tuu mati' to-Farisi. Samanna ia tobuta tuu mati'. Na ia ke pada tobutamo sirenden, tantu la melolinni ia do' garuang."

¹⁵ Nakuamo Petrus, "Oo Puang, meta'dakan, tapauankan battuananna joo pangpasusian."

¹⁶ Mebalimi Puang Isa lako anak gurun-Na nakua, "Oo, te'da todaraka pale' mipahangngi?

¹⁷ Parallu miissen kumua, ia to dikande mentama ba'tang namessun, ke malei mangcarepa to tau.

¹⁸ Jaji, apa to messun jio timu, pole jio ngasan mai penawa, iamo joo to ncarepai tau.

¹⁹ Nasaba' pole lan mai penawa to nanii pangtangngaran gaja' na mpalao sala tau susinna: mangbuno, manggauk sala, ncarepai tananan dapohna tau, boko, sa'bi tangtongan, na mpau gaja' tau.

²⁰ Ia ngasanmo joo to ncarepai tau. Apa ia ke te'da nabasei limanna to tau nakumande, te'da ia naciapa."

²¹ Ke'dehmi Puang Isa jio mai ntuu joo, namale re' tana mengguririkkina kota Tirus sola kota Sidon.

²² Denmi mesa' baine to-Kanaan ratu ngkandoppi' Puang Isa metamba-tamba nakua, "Oo Puang, bati'na Raja Daud, kamaseina'! Natamai setang to anakkaku' baine. Takkajulu' maparri'na!"

²³ Te'da bang napebalii Puang Isa. Meta'dami anak gurun-Na nakua, "Ee Puang, suai palai joo baine. Undi bang jio boko'ta' rrekaiki'."

²⁴ Mebalimi Puang Isa nakua, "Disua lako mandara' to-Israel to susi bembala' lao salamo."

²⁵ Suju'mi joo baine jio olo-Na Puang Isa nameta'da nakua, "Oo Puang, tulungna' dikka'."

²⁶ Mebalimi Puang Isa nakua, "Te'da namelo ke dialai to kandena pea nadiben asu."

²⁷ Mebalimi nakua, "Oo Puang, tongan tuu, apa ia to asu ngkande bota to polloh do' sulluk mejana puangna."

²⁸ Nakuanmi, "Ee, indo', matappa' tonganko! La jaji to mupeta'da." Ia joo wattu ta'pa malagah bang unami joo anakkana.

²⁹ Polemi Puang Isa jio mai ntuu joo, namale mangrundun randan Tasik Galilea, namane' endek de' buntu. Ia tonna cumadokkomo,

³⁰ budami tau ratu mbawa tokupi', tokeppang, tobuta, tomamang na budapa tomasaki laenna napajioi olo-Na Puang Isa. Napamalagahhi.

³¹ Jangngah ngasan to tau ngkitai tuu lako tokupi' lumingka, tokeppang memmaruruh lingkana, tobuta pakita, na tomamang mangkada. Pada mpakala'bihmi Puang Allataala, Puangna to-Israel.

³² Natambaimi Puang Isa to anak gurun-Na nakuanni, "Masse penawang-Ku' ngkitai tee mai tobuda, sanga tallung allomiki' sola na cappu'mi to kinallona. Te'da kueloranni pole ke tangbarahhi, iamo ke limpui lako lalan."

³³ Mekutanami anak gurun-Na Puang Isa nakua, "Umbo tanii nnala kande la dipakandeanni tee tau gaja buda, na padang pallawangan tee tanii?"

³⁴ Mekutanami Puang Isa nakua, "Pirapara roti miampui?" Mebalimi nakua, "Pitumora na ba'tu pira bale'-bale' sibiccuk."

³⁵ Nasuami Puang Isa cumadokko tuu lako tobuda jiong padang.

³⁶ Naalami joo pitu roti sola bale'-bale', namangkurru sumanga' lako Puang Allataala. Mangkai joo nati'pek-ti'pekmi joo roti sola bale, nabenni anak gurun-Na, anna tawa-tawanni joo tobuda.

³⁷ Kumande ngasanmi tuu lako tau sabarahna. Ia tonna mangkamo kumande, napasirempunmi anak gurun-Na Puang Isa to torrona, ponnopa pitu baku'.

³⁸ Den patang sa'bu muane to kumande, tangdibilangpa to baine sola pea.

³⁹ Ia tonna polemo tuu lako tobuda endekmi de' lopi Puang Isa, namale lako tana Magadan.

Matius

Video Matius 15

Ikuti Kami:

KONTAK | PARTISIPASI | DONASI