Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lapatao ma lonao mayi ode oli Isa ngololota tawu ta o pahamu Parisi wawu mongoahali lo Tawurat lonto kota lo Yerusalem wawu lohintu odiye,

² ”Longola mongomuri-Mu lolambanga adati lo mongotiyombunto? Timongoliyo yilonga lo olu'u dila huwa-huwalo moturuti mao aturu lo adati.”

³ Bo ti Isa lolametao ode olimongoliyo odiye, ”Longola olo timongoli hepolambanga parenta lo Allahuta'ala asali adati limongoli u dudualo?

⁴ Sababu Allahuta'ala ma longohi mayi Pirimani-Liyo odiye, ’Hurumatiyamu mao ti papamu woli mamamu.’ Wawu woluwo olo Pirimani lo Allahuta'ala odiye, ’Titalotita ta mola'anati oli papaliyo meyalo oli mamaliyo, tiyo musi mate.’”

⁵ Lapatao ti Isa loloiya ode olimongoliyo odiye, ”Bo timongoli hepongajariya to tawu odiye, ’Titalotita ta mopolele mao ode oli papaliyo meyalo ode oli mamaliyo odiye: Nga'amila harata u woluwo to olatiya u musi popohuna mayi latiya momiyahe oli papa woli mama, ma yilohi mao latiya ode Allahuta'ala.’

⁶ Wolo uodito, tawu boyito ma didu wajibu mohurumati oli papa woli mamaliyo. Pirimani lo Allahuta'ala ma bilatali limongoli alihu adati limongoli u dudualo.

⁷ Weyi timongoli ta munapiki! Banari po'ota lo Allahuta'ala loli oli nabi Yesaya tomimbihu timongoli to delomo kitabi odiye,

⁸ ’Bangusa boti hepohurumatiya ola-U wolo tunggili mongoliyo wawu hila limongoliyo molamingo to ola-U.

⁹ Dila ohunaliyo timongoliyo hepoibadatiya ode ola-U, sababu bo parenta lo manusiya u hepongajari limongoliyo to tawu.’ Odito Pirimani lo Allahuta'ala.”

¹⁰ Lapatao ti Isa lotiyangayi tawu ngohuntuwa wawu loloiya ode olimongoliyo odiye, ”Po'odungohe wawu po'ongaratiya mao limongoli,

¹¹ dila u momaso ode delomo ngango u mo'onajisi to tawu, bo u mokaluwari mayi monto ngango.”

¹² Lapatao mongomuri li Isa lonao mayi ode o-Liyo lohintu odiye, ”Dila otawa li Guru deu loiya li Guru boyito ma lo'ongongota nyawa lo tawu-tawuwala ta o pahamu Parisi boyito?”

¹³ Ti Isa lolametao, ”Timi'idu pilomulo u dila pilomulo lo Allahuta'ala ti Papa-U ta to soroga, ma bunggato-Liyo sambe demola wuwa-wuwa'atiyo lomao.

¹⁴ Hulimao timongoliyo boyito. Timongoliyo mongotauwa hepitoa wawu hepodedea ta hepitoa. Wonu ta pito'o modedea ta pito'o dudulota, ma tantu modehu to huwanga modelomo da'a.”

¹⁵ Lapatao te Petrus loloiya ode o-Liyo odiye, ”Tombangi mayi olamiyatiya lumade boti.”

¹⁶ Ti Isa lolametao odiye, ”Timongoli olo debo dipo mongarati lo lumade boti.

¹⁷ Dila ongaratiya limongoli deu nga'amila u momaso ode ngango ma molahe mola ode ombongo lapatao mao pomailiyo to kakusi?

¹⁸ Bo u lumuwalayi monto ngango asaliliyo monto delomo hilawo wawu uwito u mo'onajisi to tawu.

¹⁹ Sababu monto delomo hilawo timimbulu mayi nga'amila pikirangi moleto, mohinggi nyawa lo tawu, mojina, huloto, mototaowa, mosakusi lo u yimbulo wawu hujati.

²⁰ Pasa-pasaliyala boti u mo'onajisi to tawu. Bo monga lo olu'u dila huwa-huwalo dila mo'onajisi to tawu.”

²¹ Lapatao ti Isa lolola mao tambati boyito wawu lonao ode lipu lo Tirus wawu lipu lo Sidon.

²² Tabuwa ngota tawu lo kota lo Kana'an ta tola-tola to lipu boyito lonao mayi ode oli Isa wawu pipiuwa hemonguwatia odiye, ”Wu Eya, waliya li nabi Dawud otolianga mayi watiya, sababu walao latiya tabuwa ilotuwanga lo lati wawu tiyo siki-sikisa masatiya.”

²³ Bo ti Isa dila lolameta wolo-wolo. Mongomuri li Isa lonao mayi ode o-Liyo wawu lohile odiye, ”Guru, popowuwalinga lomao tabuwa botiye. Tiyo tunu-tunuhe olanto wolo uwuwa-wuwatio.”

²⁴ Tametao li Isa, ”Wau bo ilahula mayi lo Allahuta'ala ode himba-himbawala yiloli to wolota lo bangusa lo Israel.”

²⁵ Bo tabuwa boyito lodudula mota ode oli Isa losujudu to talu-Liyo wawu loloiya odiye, ”Wu Eya, turungi mayi watiya.”

²⁶ Pilolametao li Isa ode oliyo, ”Dila patuti mohama mayi roti u ma siladiya mao to mongowalao lapatao pomai mota ode apula.”

²⁷ Loiya lo tabuwa boyito, ”Wu Eya, banari uwito, bo apula yito monga momo'o ualo hepodulahuwa mayi monto meja li tuwaniliyo.”

²⁸ Lapatao ti Isa loloiya ode oliyo, ”Weyi tabuwa, uda'a da'a imanimu! Sababu uwito, powalilo to olemu odelo u otohilamu.” Wawu tou boyitolo walao tabuwa boyito ma lato loluli.

²⁹ Tou ma lolola mao tambati boyito, ti Isa ma loduluhe mota to bihu bulalo lo Galileya lapatao ma lotaodu hulude tuwawu mola lotihuloa teto.

³⁰ Lapatao tawu ngohuntuwa u'uyuhe helodelo mao ode talu li Isa ta hepepea, ta hepitoa, ta hepenggowa, ta hebubuwa wawu donggo ngohuntuwa pomao tawu wuwewo. Ti Isa lopo'oluli olimongoliyo nga'amila.

³¹ Tawu ngohuntuwa ta woluwo teto boyito helinggolabe lo'onto mao ta hebubuwa ma lowali lobisala, ta hepenggowa ma loluli, ta hepepea ma lo'owali lonao, ta hepitoa ma lowali lo'onto. Timongoliyo nga'amila ma lomuji Allahuta'ala Eya lo bangusa lo Israel.

³² Lapatao ti Isa ma lotiyangayi mongomuri-Liyo wawu loloiya ode olimongoliyo odiye, ”Wau pilotimbuluwa lotoliango ode tawu ngohuntuwa boti. Ma tolohuyi timongoliyo hetolawa pe'enta wola-U wawu diyaluwo ualo limongoliyo. Wau dila yinawo mopowuwalinga olimongoliyo wolo uhepolanga, bolo ma pole-poleta mota lohilawo to dalalo.”

³³ Mongomuri-Liyo loloiya ode o-Liyo, ”Wololo to polowantoa odiye ito mo'otapu roti po'obutuhe tawu malo odiye huntuwaliyo?”

³⁴ Ti Isa lohintu ode olimongoli, ”Ngolo botu roti u woluwo to olimongoli?” Tametao limongoliyo, ”Pitu lobotu wawu woluwo olo tanu ngolobotu ponula kekei.”

³⁵ Lapatao ma piloihuloa li Isa to huta tawu ngohuntuwa boyito.

³⁶ Lapato ti Isa ma lohama mayi roti wawu ponula boyito losukuru wawu lodua lohile barakati ode Allahuta'ala wawu lomita-mitangao wawu longohi mao ode mongomuri-Liyo. Mongomuri-Liyo ma lolaya-layade mota ode tawu ngohuntuwa.

³⁷ Timongoliyo nga'amila yilonga sambe lobutuhu. Ualo ilolabita pitu lokaranji hepoluwa jumulaliyo.

³⁸ Ta yilonga jumulaliyo wopatolihulota mongololai dipo lewayito jumula lo mongobuwa wawu ta ukekeingo.

³⁹ Lapatao tawu ngohuntuwa boyito ma piloiwuwalinga li Isa wawu Tiyo ma lotitae to bulotu ode lipu lo Magadan.

Matius

Video Matius 15

Ikuti Kami:

KONTAK | PARTISIPASI | DONASI