Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Momõi ndra Farizai'o awõ ndra Sangila Amakhoita moroi ba Yeruzalema wangondrasi Yesu. Manofu ira khõ Yesu,
2 "Hana wa lasawõ huku ndra tuada ira nifaha'õ-U? Na manga ira ba lõ lasasai dangara ua molo'õ huku!"
3 Imane wanema li Yesu, "Ba hana gõi wa misawõ goroisa Lowalangi, ha bõrõ huku ndra tuami?
4 No Iw̃a'õ Lowalangi, 'Mifosumange zatuami,' ba 'Dozi sanguma'õ fehede si lõ atulõ khõ zatuania, ba huku famunu hukumania.'
5 Ba ya'ami mifahaõ niha: na so zanguma'õ khõ zatuania, 'Hadia zinangea nitema nama ba ina, no ube'e khõ Lowalangi,'
6 andrõ niha da'õ lõ sa'ae ifosumange zatuania. Tobali bõrõ hada ndra tuami, wa lõ ba dõdõmi Lowalangi.
7 Samini tõdõ ami! Faudu sibai ba nifa'ele'õ Yesaya sanandrõsa khõmi, me imane,
8 'Si mane niw̃a'õ Lowalangi: Lafosumange Ndra'o niha andre ha ba mbewe, ba tõdõra ba no arõu khõ-Gu, si manõ wehede Lowalangi.
9 Lõ guna lafosumange Ndra'o, bõrõ me amakhoita niha nifahaõra, ba hulõ na amakhoita-Gu!'"
10 Aefa da'õ Ikaoni niha Yesu ena'õ lahatõ'õ ira khõ-Nia, ba Imane khõra, "Mifondrondrongo ba mihaogõ wanõngõni!
11 Si mõi bakha ba mbawa tenga da'õ zana'unõi niha; no si mõi baero soroi mbawania, da'õ zana'unõi ya'ia."
12 La'ondrasi Ia ira nifahaõ-Nia ba lamane khõ-Nia, "He Ama, hadia Õ'ila wa abao dõdõ ndra Farizai'o andrõ me Õmanõ wehede khõra?"
13 Itema li Yesu, "Fefu zinanõ si tenga nitanõ nama-Gu andrõ si so ba zorugo, ba lasõbi dania.
14 Bõi mihalõ fõkhõ hõgõmi ndra Farizai'o andrõ. No sau'a ira. Ba na sau'a ifasao nawõnia sau'a, lualua aekhu ira bakha ba gohokoho."
15 Imane Fetero, "Tandraigõ ombakha'õ khõma gamaedola andrõ!"
16 Itema li Yesu, "He Fetero, hadia lõ nasa saboto ba dõdõu?
17 Hadia, lõ õ'ila wa si mõi ba mbawa niha andrõ numalõ ba mbetu'ania, aefa da'õ aheta moroi ba mbotonia?
18 Ba salua baero moroi ba mbawania, no moroi ba dõdõ; da'õ zana'unõi ya'ia.
19 Bõrõ me moroi ba dõdõ andrõ i'otarai wangerangera si lõ sõkhi, irege mamunu niha, mohorõ, molau si lõ atulõ ba ndra alawe, managõ, falimo ba manandraw̃a.
20 Da'õ zana'unõi niha. Tobali, lõ ta'unõ niha na manga ia lõ mombanõ!"
21 Moroi ba nahia da'õ numalõ Yesu ba mbanua ba zahatõ ba Zidona ba ba Diro.
22 Samõsa ndra alawe moroi ba mbanua Gana'ana, i'ondrasi Yesu ba mu'ao ia, "Ma'uwu Dawido, hakhõsi tõdõ ndra'o! No ira'u fa'abõlõ zi lõ sõkhi nonogu alawe. Abõlõbõlõ sibai wõkhõnia."
23 Lõ Itema li ndra alawe andrõ Yesu. Aefa da'õ la'ondrasi Yesu ira nifahaõ-Nia ba lamane khõ-Nia, "He Ama, fofanõ ndra alawe andrõ. Lõ manõ ahono ia moroi furida!"
24 Itema li ndra alawe andrõ Yesu, "Mufatenge Ndra'o ba niha Gizera'eli si lõ mamalua somasi Lowalangi."
25 Ba hew̃a'ae Imanõ Yesu, ba i'ondrasi sa'atõ Ia ira alawe andrõ, ifaõndrõ ia wangalulu ba imane, "He Tuha, tolodo."
26 Imane Yesu, "Lõ sõkhi na lahalõ gõ ndraono ba latibo'õ õ nasu."
27 Itema li ira alawe andrõ, "Duhu da'õ Tuha, ba i'a sa'atõ asu gakhõkhõla satoru moroi ba meza zokhõ ya'ia."
28 Imane khõnia Yesu, "He Ina, ebua si'ai wamatimõ! Ya'alua khõu zomasi ndra'ugõ!" Ba da'õ sibai gõi i'anema'õ dõhõ wõkhõ nono ndra alawe andrõ.
29 Irõi nahia andrõ Yesu, I'osisi zinga Mbaw̃a Galilea. Aefa da'õ numalõ Ia yaw̃a ba hilihili ba mudadao Ia ba da'õ.
30 Ato niha sangondrasi Ya'ia solohe niha sakelakela, niha sau'a, sombuyumbuyu, si lõ hede, ba ato na zofõkhõ tanõ bõ'õ. Latou'õ tou fefu zofõkhõ andrõ ba gahe Yesu, ba Ifadõhõ ira.
31 Oi ahõli dõdõ niha si so ba da'õ me la'ila ifuli muhedehede zi lõ hede, dõhõ zakelakela, niha sombuyumbuyu tola mowaõwaõ mangawuli ba niha sau'a tola la'ila mangawuli niha. Ba lasunosuno Lowalangi niha Gizera'eli andrõ.
32 Aefa da'õ Ikaoni Yesu ndra nifahaõ-Nia ba Imane khõra, "Ahakhõ dõdõ-Gu wamaigi niha sato andre. No tõlu ngaluo faofao ira khõ-Gu, lõ si manga. Lõ omasi-Do na mangawuli ira ba wa'olofo, ma dania awuwu dõdõra ba dalu lala."
33 Lasofu ira nifahaõ khõ Yesu, "Heza tasõndra gõ soya ba danõ si mate andre?"
34 Isofu khõra Yesu, "Hawa'oya zi so khõmi roti?" Latema li-Nia, "Ha fitu ngawua roti ba so mato ma'ifu gi'a si gide'ide."
35 Ba Ifaw̃a'õgõ ena'õ mudadao niha sato andrõ yaw̃a ba dete danõ.
36 Awena Ihalõ roti si fitu ngawua awõ gi'a, I'aohasi gõlõ Lowalangi. Iboboto roti awõ gi'a andrõ, ba Ibe'e khõ ndra nifahaõ-Nia. Ba lafaosafaosa ba niha sato gõ andrõ.
37 Manga ira fefu irege abuso. Ba me la'owuloi zi torõi ira nifahaõ, so nasa fitu daga afõnu.
38 Fa'ato ndra matua si manga me luo da'õ õfa ribu, baero ndra alawe awõ ndraono.
39 Aefa da'õ Ifofanõ niha sato andrõ Yesu. Si manõ Ia gõi, mõi Ia yaw̃a ba dundraha numalõ ba danõ Magada.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA